เมนู

‘‘อิโต จาตุทฺทเส กปฺเป, เอโก อาสิํ ชนาธิโป;

สมุทฺทกปฺโป นาเมน, จกฺกวตฺตี มหพฺพโลฯ

[11]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา พนฺธุชีวโก เถโร อิมา คาถาโย อภาสิตฺถาติฯ

พนฺธุชีวกตฺเถรสฺสาปทานํ ทุติยํฯ

3. โกฏุมฺพริยตฺเถรอปทานํ

[12]

‘‘กณิการํว โชตนฺตํ, นิสินฺนํ ปพฺพตนฺตเร;

อปฺปเมยฺยํว อุทธิํ, วิตฺถตํ ธรณิํ ยถาฯ

[13]

‘‘ปูชิตํ [ปเรตํ (สี.)] เทวสงฺเฆน, นิสภาชานิยํ ยถา;

หฏฺโฐ หฏฺเฐน จิตฺเตน, อุปาคจฺฉิํ นรุตฺตมํฯ

[14]

‘‘สตฺตปุปฺผานิ ปคฺคยฺห, โกฏุมฺพรสมากุลํ;

พุทฺธสฺส อภิโรเปสิํ, สิขิโน โลกพนฺธุโนฯ

[15]

‘‘เอกตฺติํเส อิโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, พุทฺธปูชายิทํ ผลํฯ

[16]

‘‘อิโต วีสติกปฺปมฺหิ, มหาเนลสนามโก;

เอโก อาสิ มหาเตโช, จกฺกวตฺตี มหพฺพโลฯ

[17]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โกฏุมฺพริโย เถโร อิมา คาถาโย อภาสิตฺถาติฯ

โกฏุมฺพริยตฺเถรสฺสาปทานํ ตติยํฯ

4. ปญฺจหตฺถิยตฺเถรอปทานํ

[18]

‘‘ติสฺโส นามาสิ ภควา, โลกเชฏฺโฐ นราสโภ;

ปุรกฺขโต สาวเกหิ, รถิยํ ปฏิปชฺชถฯ

[19]

‘‘ปญฺจ อุปฺปลหตฺถา จ, จาตุรา ฐปิตา มยา;

อาหุติํ ทาตุกาโมหํ, ปคฺคณฺหิํ วตสิทฺธิยา [ปุตฺโตมฺหิ หิตสิทฺธิยา (สฺยา.)]

[20]

‘‘สุวณฺณวณฺณํ สมฺพุทฺธํ, คจฺฉนฺตํ อนฺตราปเณ;

พุทฺธรํสีหิ ผุฏฺโฐสฺมิ [พุทฺธรํสฺยาภิผุฏฺโฐมฺหิ (สี.), พุทฺธรํสาภิฆุฏฺโฐสฺมิ (ก.)], ปูเชสิํ ทฺวิปทุตฺตมํฯ

[21]

‘‘ทฺเวนวุเต อิโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[22]

‘‘อิโต เตรสกปฺปมฺหิ, ปญฺจ สุสภสมฺมตา;

สตฺตรตนสมฺปนฺนา, จกฺกวตฺตี มหพฺพลาฯ

[23]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปญฺจหตฺถิโย เถโร อิมา คาถาโย อภาสิตฺถาติฯ

ปญฺจหตฺถิยตฺเถรสฺสาปทานํ จตุตฺถํฯ

5. อิสิมุคฺคทายกตฺเถรอปทานํ

[24]

‘‘อุเทนฺตํ สตรํสิํว, ปีตรํสิํว [สิตรํสิํว (สี.)] ภาณุมํ;

กกุธํ วิลสนฺตํว, ปทุมุตฺตรนายกํฯ

[25]

‘‘อิสิมุคฺคานิ ปิสิตฺวา [อิสิสุคฺคานิ ปิํเสตฺวา (สี.), อิสิมุคฺคํ นิมนฺเตตฺวา (สฺยา.)], มธุขุทฺเท อนีฬเก;

ปาสาเทว ฐิโต สนฺโต, อทาสิํ โลกพนฺธุโนฯ

[26]

‘‘อฏฺฐสตสหสฺสานิ, อเหสุํ พุทฺธสาวกา;

สพฺเพสํ ปตฺตปูเรนฺตํ [ปตฺตปูรํ ตํ (สี.)], ตโต จาปิ พหุตฺตรํฯ

[27]

‘‘เตน จิตฺตปฺปสาเทน, สุกฺกมูเลน โจทิโต;

กปฺปานํ สตสหสฺสํ, ทุคฺคติํ นุปปชฺชหํฯ

[28]

‘‘จตฺตาลีสมฺหิ สหสฺเส, กปฺปานํ อฏฺฐติํส เต;

อิสิมุคฺคสนามา [มหิสมนฺตนามา (สฺยา.)] เต, จกฺกวตฺตี มหพฺพลาฯ

[29]