1. กุฏชปุปฺผิยตฺเถรอปทานํ

[1]

‘‘สุวณฺณวณฺณํ สมฺพุทฺธํ, สตรํสิํว อุคฺคตํ;

ทิสํ อนุวิโลเกนฺตํ, คจฺฉนฺตํ อนิลญฺชเสฯ

[2]

‘‘กุฏชํ ปุปฺผิตํ ทิสฺวา, สํวิตฺถตสโมตฺถตํ;

รุกฺขโต โอจินิตฺวาน, ผุสฺสสฺส อภิโรปยิํฯ

[3]

‘‘ทฺเวนวุเต อิโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, พุทฺธปูชายิทํ ผลํฯ

[4]

‘‘อิโต สตฺตรเส กปฺเป, ตโย อาสุํ สุปุปฺผิตา;

สตฺตรตนสมฺปนฺนา, จกฺกวตฺตี มหพฺพลาฯ

[5]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา กุฏชปุปฺผิโย เถโร อิมา คาถาโย อภาสิตฺถาติฯ

กุฏชปุปฺผิยตฺเถรสฺสาปทานํ ปฐมํฯ

2. พนฺธุชีวกตฺเถรอปทานํ

[6]

‘‘สิทฺธตฺโถ นาม สมฺพุทฺโธ, สยมฺภู สพฺภิ วณฺณิโต;

สมาธิํ โส สมาปนฺโน, นิสีทิ ปพฺพตนฺตเรฯ

[7]

‘‘ชาตสฺสเร คเวสนฺโต, ทกชํ ปุปฺผมุตฺตมํ;

พนฺธุชีวกปุปฺผานิ, อทฺทสํ สมนนฺตรํฯ

[8]

‘‘อุโภ หตฺเถหิ ปคฺคยฺห, อุปาคจฺฉิํ มหามุนิํ;

ปสนฺนจิตฺโต สุมโน, สิทฺธตฺถสฺสาภิโรปยิํฯ

[9]

‘‘จตุนฺนวุติโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, พุทฺธปูชายิทํ ผลํฯ

[10]

‘‘อิโต จาตุทฺทเส กปฺเป, เอโก อาสิํ ชนาธิโป;

สมุทฺทกปฺโป นาเมน, จกฺกวตฺตี มหพฺพโลฯ

[11]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา พนฺธุชีวโก เถโร อิมา คาถาโย อภาสิตฺถาติฯ

พนฺธุชีวกตฺเถรสฺสาปทานํ ทุติยํฯ

3. โกฏุมฺพริยตฺเถรอปทานํ

[12]

‘‘กณิการํว โชตนฺตํ, นิสินฺนํ ปพฺพตนฺตเร;

อปฺปเมยฺยํว อุทธิํ, วิตฺถตํ ธรณิํ ยถาฯ

[13]

‘‘ปูชิตํ [ปเรตํ (สี.)] เทวสงฺเฆน, นิสภาชานิยํ ยถา;

หฏฺโฐ หฏฺเฐน จิตฺเตน, อุปาคจฺฉิํ นรุตฺตมํฯ

[14]

‘‘สตฺตปุปฺผานิ ปคฺคยฺห, โกฏุมฺพรสมากุลํ;

พุทฺธสฺส อภิโรเปสิํ, สิขิโน โลกพนฺธุโนฯ

[15]

‘‘เอกตฺติํเส อิโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, พุทฺธปูชายิทํ ผลํฯ

[16]

‘‘อิโต วีสติกปฺปมฺหิ, มหาเนลสนามโก;

เอโก อาสิ มหาเตโช, จกฺกวตฺตี มหพฺพโลฯ

[17]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โกฏุมฺพริโย เถโร อิมา คาถาโย อภาสิตฺถาติฯ

โกฏุมฺพริยตฺเถรสฺสาปทานํ ตติยํฯ

4. ปญฺจหตฺถิยตฺเถรอปทานํ

[18]

‘‘ติสฺโส นามาสิ ภควา, โลกเชฏฺโฐ นราสโภ;

ปุรกฺขโต สาวเกหิ, รถิยํ ปฏิปชฺชถฯ

[19]