‘‘มณิํ ปคฺคยฺห ปลฺลงฺกํ, สาธุจิตฺตํ มโนรมํ;

ปสนฺนจิตฺโต สุมโน, พุทฺธสฺส อภิโรปยิํฯ

[36]

‘‘จตุนฺนวุติโต กปฺเป, ยํ มณิํ อภิโรปยิํ;

ทุคฺคติํ นาภิชานามิ, พุทฺธปูชายิทํ ผลํฯ

[37]

‘‘อิโต จ ทฺวาทเส กปฺเป, สตรํสีสนามกา;

อฏฺฐ เต อาสุํ ราชาโน, จกฺกวตฺตี มหพฺพลาฯ

[38]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา มณิปูชโก เถโร อิมา คาถาโย อภาสิตฺถาติฯ

มณิปูชกตฺเถรสฺสาปทานํ อฏฺฐมํฯ

9. ติกิจฺฉกตฺเถรอปทานํ

[39]

‘‘นคเร พนฺธุมติยา, เวชฺโช อาสิํ สุสิกฺขิโต;

อาตุรานํ สทุกฺขานํ, มหาชนสุขาวโหฯ

[40]

‘‘พฺยาธิตํ สมณํ ทิสฺวา, สีลวนฺตํ มหาชุติํ;

ปสนฺนจิตฺโต สุมโน, เภสชฺชมททิํ ตทาฯ

[41]

‘‘อโรโค อาสิ เตเนว, สมโณ สํวุตินฺทฺริโย;

อโสโก นาม นาเมน, อุปฏฺฐาโก วิปสฺสิโนฯ

[42]

‘‘เอกนวุติโต กปฺเป, ยํ โอสธมทาสหํ;

ทุคฺคติํ นาภิชานามิ, เภสชฺชสฺส อิทํ ผลํฯ

[43]

‘‘อิโต จ อฏฺฐเม กปฺเป, สพฺโพสธสนามโก;

สตฺตรตนสมฺปนฺโน, จกฺกวตฺตี มหพฺพโลฯ

[44]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ติกิจฺฉโก เถโร อิมา คาถาโย อภาสิตฺถาติฯ

ติกิจฺฉกตฺเถรสฺสาปทานํ นวมํฯ

10. สงฺฆุปฏฺฐากตฺเถรอปทานํ

[45]

‘‘เวสฺสภุมฺหิ ภควติ, อโหสารามิโก อหํ;

ปสนฺนจิตฺโต สุมโน, อุปฏฺฐิํ สงฺฆมุตฺตมํฯ

[46]

‘‘เอกตฺติํเส อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, อุปฏฺฐานสฺสิทํ ผลํฯ

[47]

‘‘อิโต เต สตฺตเม กปฺเป, สตฺเตวาสุํ สโมทกา;

สตฺตรตนสมฺปนฺนา, จกฺกวตฺตี มหพฺพลาฯ

[48]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สงฺฆุปฏฺฐาโก เถโร อิมา คาถาโย อภาสิตฺถาติฯ

สงฺฆุปฏฺฐากตฺเถรสฺสาปทานํ ทสมํฯ

กุมุทวคฺโค อฏฺฐารสโมฯ

ตสฺสุทฺทานํ –

กุมุโท อถ นิสฺเสณี, รตฺติโก อุทปานโท;

สีหาสนี มคฺคทโท, เอกทีปี มณิปฺปโท;

ติกิจฺฉโก อุปฏฺฐาโก, เอกปญฺญาส คาถกาติฯ

19. กุฏชปุปฺผิยวคฺโค