‘‘มณิํ ปคฺคยฺห ปลฺลงฺกํ, สาธุจิตฺตํ มโนรมํ;
ปสนฺนจิตฺโต สุมโน, พุทฺธสฺส อภิโรปยิํฯ
[36]
‘‘จตุนฺนวุติโต กปฺเป, ยํ มณิํ อภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[37]
‘‘อิโต จ ทฺวาทเส กปฺเป, สตรํสีสนามกา;
อฏฺฐ เต อาสุํ ราชาโน, จกฺกวตฺตี มหพฺพลาฯ
[38]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มณิปูชโก เถโร อิมา คาถาโย อภาสิตฺถาติฯ
มณิปูชกตฺเถรสฺสาปทานํ อฏฺฐมํฯ
9. ติกิจฺฉกตฺเถรอปทานํ
[39]
‘‘นคเร พนฺธุมติยา, เวชฺโช อาสิํ สุสิกฺขิโต;
อาตุรานํ สทุกฺขานํ, มหาชนสุขาวโหฯ
[40]
‘‘พฺยาธิตํ สมณํ ทิสฺวา, สีลวนฺตํ มหาชุติํ;
ปสนฺนจิตฺโต สุมโน, เภสชฺชมททิํ ตทาฯ
[41]
‘‘อโรโค อาสิ เตเนว, สมโณ สํวุตินฺทฺริโย;
อโสโก นาม นาเมน, อุปฏฺฐาโก วิปสฺสิโนฯ
[42]
‘‘เอกนวุติโต กปฺเป, ยํ โอสธมทาสหํ;
ทุคฺคติํ นาภิชานามิ, เภสชฺชสฺส อิทํ ผลํฯ
[43]
‘‘อิโต จ อฏฺฐเม กปฺเป, สพฺโพสธสนามโก;
สตฺตรตนสมฺปนฺโน, จกฺกวตฺตี มหพฺพโลฯ
[44]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ติกิจฺฉโก เถโร อิมา คาถาโย อภาสิตฺถาติฯ
ติกิจฺฉกตฺเถรสฺสาปทานํ นวมํฯ