เมนู

‘‘เตน จิตฺตปฺปสาเทน, อนุโภตฺวาน สมฺปทา;

ธาเรมิ อนฺติมํ เทหํ, สมฺมาสมฺพุทฺธสาสเนฯ

[11]

‘‘เอกตฺติํสมฺหิ กปฺปานํ, สหสฺสมฺหิ ตโย อหุํ [มหา (สี. สฺยา.)];

สมฺพหุลา นาม ราชาโน, จกฺกวตฺตี มหพฺพลาฯ

[12]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา นิสฺเสณิทายโก เถโร อิมา คาถาโย อภาสิตฺถาติฯ

นิสฺเสณิทายกตฺเถรสฺสาปทานํ ทุติยํฯ

3. รตฺติปุปฺผิยตฺเถรอปทานํ

[13]

‘‘มิคลุทฺโท ปุเร อาสิํ, อรญฺเญ กานเน อหํ;

วิปสฺสิํ อทฺทสํ พุทฺธํ, เทวเทวํ นราสภํฯ

[14]

‘‘รตฺติกํ ปุปฺผิตํ ทิสฺวา, กุฏชํ ธรณีรุหํ;

สมูลํ ปคฺคเหตฺวาน, อุปเนสิํ มเหสิโนฯ

[15]

‘‘เอกนวุติโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, ปุปฺผทานสฺสิทํ ผลํฯ

[16]

‘‘อิโต จ อฏฺฐเม กปฺเป, สุปฺปสนฺนสนามโก;

สตฺตรตนสมฺปนฺโน, ราชาโหสิํ มหพฺพโลฯ

[17]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา รตฺติปุปฺผิโย เถโร อิมา คาถาโย อภาสิตฺถาติฯ

รตฺติปุปฺผิยตฺเถรสฺสาปทานํ ตติยํฯ

4. อุทปานทายกตฺเถรอปทานํ

[18]

‘‘วิปสฺสิโน ภควโต, อุทปาโน กโต มยา;

ปิณฺฑปาตญฺจ ทตฺวาน [คเหตฺวาน (สฺยา.)], นิยฺยาเทสิมหํ ตทาฯ

[19]

‘‘เอกนวุติโต กปฺเป, ยํ กมฺมมกริํ ตทา;

ทุคฺคติํ นาภิชานามิ, อุทปานสฺสิทํ ผลํฯ

[20]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อุทปานทายโก เถโร อิมา คาถาโย อภาสิตฺถาติฯ

อุทปานทายกตฺเถรสฺสาปทานํ จตุตฺถํฯ

5. สีหาสนทายกตฺเถรอปทานํ

[21]

‘‘นิพฺพุเต โลกนาถมฺหิ, ปทุมุตฺตรนายเก;

ปสนฺนจิตฺโต สุมโน, สีหาสนมทาสหํฯ

[22]

‘‘พหูหิ คนฺธมาเลหิ, ทิฏฺฐธมฺมสุขาวเห;

ตตฺถ ปูชญฺจ กตฺวาน, นิพฺพายติ พหุชฺชโนฯ

[23]

‘‘ปสนฺนจิตฺโต สุมโน, วนฺทิตฺวา โพธิมุตฺตมํ;

กปฺปานํ สตสหสฺสํ, ทุคฺคติํ นุปปชฺชหํฯ

[24]

‘‘ปนฺนรสสหสฺสมฺหิ, กปฺปานํ อฏฺฐ อาสุ เต [อฏฺฐ อาสยุํ (ก.)];

สิลุจฺจยสนามา จ, ราชาโน จกฺกวตฺติโนฯ

[25]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สีหาสนทายโก เถโร อิมา คาถาโย อภาสิตฺถาติ;

สีหาสนทายกตฺเถรสฺสาปทานํ ปญฺจมํฯ

6. มคฺคทตฺติกตฺเถรอปทานํ

[26]

‘‘อโนมทสฺสี ภควา, ทฺวิปทินฺโท นราสโภ;

ทิฏฺฐธมฺมสุขตฺถาย, อพฺโภกาสมฺหิ จงฺกมิฯ

[27]