1. กุมุทมาลิยตฺเถรอปทานํ
[1]
‘‘ปพฺพเต หิมวนฺตมฺหิ, มหาชาตสฺสโร อหุ;
ตตฺถโช รกฺขโส อาสิํ, โฆรรูโป มหพฺพโลฯ
[2]
‘‘กุมุทํ ปุปฺผเต ตตฺถ, จกฺกมตฺตานิ ชายเร;
โอจินามิ จ ตํ ปุปฺผํ, พลิโน สมิติํ ตทาฯ
[3]
‘‘อตฺถทสฺสี ตุ ภควา, ทฺวิปทินฺโท นราสโภ;
ปุปฺผสงฺโกจิตํ [ปุปฺผํ สงฺโกจิตํ (สี. สฺยา.), ปุปฺผํ สโมจิตํ (?)] ทิสฺวา, อาคจฺฉิ มม สนฺติกํฯ
[4]
‘‘อุปาคตญฺจ สมฺพุทฺธํ, เทวเทวํ นราสภํ;
สพฺพญฺจ ปุปฺผํ ปคฺคยฺห, พุทฺธสฺส อภิโรปยิํฯ
[5]
‘‘ยาวตา หิมวนฺตนฺตา, ปริสา สา [หิมวนฺตสฺมิํ, ยาว มาลา (สฺยา.)] ตทา อหุ;
ตาวจฺฉทนสมฺปนฺโน, อคมาสิ ตถาคโตฯ
[6]
‘‘อฏฺฐารเส กปฺปสเต, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[7]
‘‘อิโต ปนฺนรเส กปฺเป, สตฺตาเหสุํ ชนาธิปา;
สหสฺสรถนามา เต, จกฺกวตฺตี มหพฺพลาฯ
[8]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา กุมุทมาลิโย เถโร อิมา คาถาโย อภาสิตฺถาติฯ
กุมุทมาลิยตฺเถรสฺสาปทานํ ปฐมํฯ
2. นิสฺเสณิทายกตฺเถรอปทานํ
[9]
‘‘โกณฺฑญฺญสฺส ภควโต, โลกเชฏฺฐสฺส ตาทิโน;
อาโรหตฺถาย ปาสาทํ, นิสฺเสณี การิตา มยาฯ
[10]
‘‘เตน จิตฺตปฺปสาเทน, อนุโภตฺวาน สมฺปทา;
ธาเรมิ อนฺติมํ เทหํ, สมฺมาสมฺพุทฺธสาสเนฯ
[11]
‘‘เอกตฺติํสมฺหิ กปฺปานํ, สหสฺสมฺหิ ตโย อหุํ [มหา (สี. สฺยา.)];
สมฺพหุลา นาม ราชาโน, จกฺกวตฺตี มหพฺพลาฯ
[12]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา นิสฺเสณิทายโก เถโร อิมา คาถาโย อภาสิตฺถาติฯ
นิสฺเสณิทายกตฺเถรสฺสาปทานํ ทุติยํฯ
3. รตฺติปุปฺผิยตฺเถรอปทานํ
[13]
‘‘มิคลุทฺโท ปุเร อาสิํ, อรญฺเญ กานเน อหํ;
วิปสฺสิํ อทฺทสํ พุทฺธํ, เทวเทวํ นราสภํฯ
[14]
‘‘รตฺติกํ ปุปฺผิตํ ทิสฺวา, กุฏชํ ธรณีรุหํ;
สมูลํ ปคฺคเหตฺวาน, อุปเนสิํ มเหสิโนฯ
[15]
‘‘เอกนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, ปุปฺผทานสฺสิทํ ผลํฯ
[16]
‘‘อิโต จ อฏฺฐเม กปฺเป, สุปฺปสนฺนสนามโก;
สตฺตรตนสมฺปนฺโน, ราชาโหสิํ มหพฺพโลฯ
[17]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา รตฺติปุปฺผิโย เถโร อิมา คาถาโย อภาสิตฺถาติฯ
รตฺติปุปฺผิยตฺเถรสฺสาปทานํ ตติยํฯ
4. อุทปานทายกตฺเถรอปทานํ
[18]
‘‘วิปสฺสิโน ภควโต, อุทปาโน กโต มยา;
ปิณฺฑปาตญฺจ ทตฺวาน [คเหตฺวาน (สฺยา.)], นิยฺยาเทสิมหํ ตทาฯ
[19]