‘‘ยมฺหิ เทเส ฐิโต สตฺถา, อพฺภุคฺคจฺฉิ มหามุนิ;
ตาหํ เทสํ อปูเชสิํ, ปสนฺโน เสหิ ปาณิภิฯ
[20]
‘‘อฏฺฐารเส กปฺปสเต, อทฺทสํ ยํ มหามุนิํ;
ทุคฺคติํ นาภิชานามิ, เทสปูชายิทํ ผลํฯ
[21]
‘‘เอกาทเส กปฺปสเต, โคสุชาตสนามโก;
สตฺตรตนสมฺปนฺโน, จกฺกวตฺตี มหพฺพโลฯ
[22]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เทสปูชโก เถโร อิมา คาถาโย อภาสิตฺถาติฯ
เทสปูชกตฺเถรสฺสาปทานํ จตุตฺถํฯ
5. กณิการฉตฺติยตฺเถรอปทานํ
[23]
‘‘เวสฺสภู นาม สมฺพุทฺโธ, โลกเชฏฺโฐ นราสโภ;
ทิวาวิหาราย มุนิ, โอคาหยิ มหาวนํฯ
[24]
‘‘กณิการํ โอจินิตฺวา, ฉตฺตํ กตฺวานหํ ตทา;
ปุปฺผจฺฉทนํ กตฺวาน, พุทฺธสฺส อภิโรปยิํฯ
[25]
‘‘เอกตฺติํเส อิโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[26]
‘‘อิโต วีสติกปฺปมฺหิ, โสณฺณาภา อฏฺฐ ขตฺติยา;
สตฺตรตนสมฺปนฺนา, จกฺกวตฺตี มหพฺพลาฯ
[27]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กณิการฉตฺติโย เถโร อิมา คาถาโย อภาสิตฺถาติฯ
กณิการฉตฺติยตฺเถรสฺสาปทานํ ปญฺจมํฯ
6. สปฺปิทายกตฺเถรอปทานํ
[28]
‘‘ผุสฺโส นามาสิ [นามาถ (สี.)] ภควา, อาหุตีนํ ปฏิคฺคโห;
คจฺฉเต วีถิยํ วีโร, นิพฺพาเปนฺโต มหาชนํฯ
[29]
‘‘อนุปุพฺเพน ภควา, อาคจฺฉิ มม สนฺติกํ;
ตโต ตํ [ตโตหํ (สี. สฺยา.)] ปตฺตํ ปคฺคยฺห, สปฺปิเตลมทาสหํฯ
[30]
‘‘ทฺเวนวุเต อิโต กปฺเป, ยํ สปฺปิมททิํ ตทา;
ทุคฺคติํ นาภิชานามิ, สปฺปิทานสฺสิทํ ผลํฯ
[31]
‘‘ฉปฺปญฺญาเส อิโต กปฺเป, เอโก อาสิ สโมทโก;
สตฺตรตนสมฺปนฺโน, จกฺกวตฺตี มหพฺพโลฯ
[32]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สปฺปิทายโก เถโร อิมา คาถาโย อภาสิตฺถาติฯ
สปฺปิทายกตฺเถรสฺสาปทานํ ฉฏฺฐํฯ
7. ยูถิกปุปฺผิยตฺเถรอปทานํ
[33]
‘‘จนฺทภาคานทีตีเร , อนุโสตํ วชามหํ;
สยมฺภุํ อทฺทสํ ตตฺถ, สาลราชํว ผุลฺลิตํฯ
[34]
‘‘ปุปฺผํ ยูถิกมาทาย, อุปคจฺฉิํ มหามุนิํ;
ปสนฺนจิตฺโต สุมโน, พุทฺธสฺส อภิโรปยิํฯ
[35]
‘‘จตุนฺนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[36]
‘‘สตฺตสฏฺฐิมฺหิโต กปฺเป, เอโก สามุทฺธโร อหุ;
สตฺตรตนสมฺปนฺโน, จกฺกวตฺตี มหพฺพโลฯ
[37]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ยูถิกปุปฺผิโย เถโร อิมา คาถาโย อภาสิตฺถาติฯ
ยูถิกปุปฺผิยตฺเถรสฺสาปทานํ สตฺตมํฯ