‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา วีถิสมฺมชฺชโก เถโร อิมา คาถาโย อภาสิตฺถาติฯ
วีถิสมฺมชฺชกตฺเถรสฺสาปทานํ ตติยํฯ
4. กกฺการุปุปฺผปูชกตฺเถรอปทานํ
[21]
‘‘เทวปุตฺโต อหํ สนฺโต, ปูชยิํ สิขินายกํ;
กกฺการุปุปฺผํ ปคฺคยฺห, พุทฺธสฺส อภิโรปยิํฯ
[22]
‘‘เอกตฺติํเส อิโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[23]
‘‘อิโต จ นวเม กปฺเป, ราชา สตฺตุตฺตโม อหุํ;
สตฺตรตนสมฺปนฺโน, จกฺกวตฺตี มหพฺพโลฯ
[24]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กกฺการุปุปฺผปูชโก เถโร อิมา คาถาโย อภาสิตฺถาติฯ
กกฺการุปุปฺผปูชกตฺเถรสฺสาปทานํ จตุตฺถํฯ
5. มนฺทารวปุปฺผปูชกตฺเถรอปทานํ
[25]
‘‘เทวปุตฺโต อหํ สนฺโต, ปูชยิํ สิขินายกํ;
มนฺทารเวน ปุปฺเผน, พุทฺธสฺส อภิโรปยิํฯ
[26]
‘‘สตฺตาหํ ฉทนํ อาสิ, ทิพฺพํ มาลํ ตถาคเต;
สพฺเพ ชนา สมาคนฺตฺวา, นมสฺสิํสุ ตถาคตํฯ
[27]
‘‘เอกตฺติํเส อิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[28]
‘‘อิโต จ ทสเม กปฺเป, ราชาโหสิํ ชุตินฺธโร;
สตฺตรตนสมฺปนฺโน, จกฺกวตฺตี มหพฺพโลฯ
[29]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มนฺทารวปุปฺผปูชโก เถโร อิมา คาถาโย อภาสิตฺถาติฯ
มนฺทารวปุปฺผปูชกตฺเถรสฺสาปทานํ ปญฺจมํฯ
6. กทมฺพปุปฺผิยตฺเถรอปทานํ
[30]
‘‘หิมวนฺตสฺสาวิทูเร , กุกฺกุโฏ นาม ปพฺพโต;
ตมฺหิ ปพฺพตปาทมฺหิ, สตฺต พุทฺธา วสนฺติ เตฯ
[31]
‘‘กทมฺพํ ปุปฺผิตํ ทิสฺวา, ทีปราชํว อุคฺคตํ;
อุโภ หตฺเถหิ ปคฺคยฺห, สตฺต พุทฺเธ สโมกิริํฯ
[32]
‘‘จตุนฺนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[33]
‘‘ทฺเวนวุเต อิโต กปฺเป, สตฺตาสุํ ปุปฺผนามกา;
สตฺตรตนสมฺปนฺนา, จกฺกวตฺตี มหพฺพลาฯ
[34]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กทมฺพปุปฺผิโย เถโร อิมา คาถาโย อภาสิตฺถาติ;
กทมฺพปุปฺผิยตฺเถรสฺสาปทานํ ฉฏฺฐํฯ
7. ติณสูลกตฺเถรอปทานํ
[35]
‘‘หิมวนฺตสฺสาวิทูเร , ภูตคโณ นาม ปพฺพโต;
วสเตโก ชิโน ตตฺถ, สยมฺภู โลกนิสฺสโฏฯ
[36]
‘‘ติณสูลํ คเหตฺวาน, พุทฺธสฺส อภิโรปยิํ;
เอกูนสตสหสฺสํ, กปฺปํ น วินิปาติโกฯ
[37]
‘‘อิโต เอกาทเส กปฺเป, เอโกสิํ ธรณีรุโห;
สตฺตรตนสมฺปนฺโน, จกฺกวตฺตี มหพฺพโลฯ
[38]