‘‘คตมคฺคํ คเวสนฺตา, อาคจฺฉุํ มม สนฺติกํ;
เต จ ทิสฺวานหํ ตตฺถ, อาวชฺชิํ โพธิมุตฺตมํฯ
[11]
‘‘วนฺทิตฺวาน อหํ โพธิํ, วิปฺปสนฺเนน เจตสา;
อเนกตาเล ปปติํ, คิริทุคฺเค ภยานเกฯ
[12]
‘‘เอกนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, โพธิปูชายิทํ ผลํฯ
[13]
‘‘อิโต จ ตติเย กปฺเป, ราชา สุสญฺญโต อหํ [สํถุสิโต อหุํ (สี.)];
สตฺตรตนสมฺปนฺโน, จกฺกวตฺตี มหพฺพโลฯ
[14]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ตมฺพปุปฺผิโย เถโร อิมา คาถาโย อภาสิตฺถาติฯ
ตมฺพปุปฺผิยตฺเถรสฺสาปทานํ ทุติยํฯ
3. วีถิสมฺมชฺชกตฺเถรอปทานํ
[15]
‘‘อุเทนฺตํ สตรํสิํว, ปีตรํสิํว [สิตรํสิํว (สี. สฺยา.)] ภาณุมํ;
ปนฺนรเส ยถา จนฺทํ, นิยฺยนฺตํ โลกนายกํฯ
[16]
‘‘อฏฺฐสฏฺฐิสหสฺสานิ, สพฺเพ ขีณาสวา อหุํ;
ปริวาริํสุ สมฺพุทฺธํ, ทฺวิปทินฺทํ นราสภํฯ
[17]
‘‘สมฺมชฺชิตฺวาน ตํ วีถิํ, นิยฺยนฺเต โลกนายเก;
อุสฺสาเปสิํ ธชํ ตตฺถ, วิปฺปสนฺเนน เจตสาฯ
[18]
‘‘เอกนวุติโต กปฺเป, ยํ ธชํ อภิโรปยิํ;
ทุคฺคติํ นาภิชานามิ, ธชทานสฺสิทํ ผลํฯ
[19]
‘‘อิโต จตุตฺถเก กปฺเป, ราชาโหสิํ มหพฺพโล;
สพฺพากาเรน สมฺปนฺโน, สุธโช อิติ วิสฺสุโตฯ
[20]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา วีถิสมฺมชฺชโก เถโร อิมา คาถาโย อภาสิตฺถาติฯ
วีถิสมฺมชฺชกตฺเถรสฺสาปทานํ ตติยํฯ
4. กกฺการุปุปฺผปูชกตฺเถรอปทานํ
[21]
‘‘เทวปุตฺโต อหํ สนฺโต, ปูชยิํ สิขินายกํ;
กกฺการุปุปฺผํ ปคฺคยฺห, พุทฺธสฺส อภิโรปยิํฯ
[22]
‘‘เอกตฺติํเส อิโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[23]
‘‘อิโต จ นวเม กปฺเป, ราชา สตฺตุตฺตโม อหุํ;
สตฺตรตนสมฺปนฺโน, จกฺกวตฺตี มหพฺพโลฯ
[24]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กกฺการุปุปฺผปูชโก เถโร อิมา คาถาโย อภาสิตฺถาติฯ
กกฺการุปุปฺผปูชกตฺเถรสฺสาปทานํ จตุตฺถํฯ
5. มนฺทารวปุปฺผปูชกตฺเถรอปทานํ
[25]
‘‘เทวปุตฺโต อหํ สนฺโต, ปูชยิํ สิขินายกํ;
มนฺทารเวน ปุปฺเผน, พุทฺธสฺส อภิโรปยิํฯ
[26]
‘‘สตฺตาหํ ฉทนํ อาสิ, ทิพฺพํ มาลํ ตถาคเต;
สพฺเพ ชนา สมาคนฺตฺวา, นมสฺสิํสุ ตถาคตํฯ
[27]
‘‘เอกตฺติํเส อิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[28]
‘‘อิโต จ ทสเม กปฺเป, ราชาโหสิํ ชุตินฺธโร;
สตฺตรตนสมฺปนฺโน, จกฺกวตฺตี มหพฺพโลฯ
[29]