‘‘ทิสฺวา ตํ สุกตํ กมฺมํ, อโนมทสฺสี นรุตฺตโม;
ภิกฺขุสงฺเฆ ฐิโต สตฺถา, อิมํ คาถํ อภาสถฯ
[28]
‘‘‘อิมินา สุธกมฺเมน, เจตนาปณิธีหิ จ;
สมฺปตฺติํ อนุโภตฺวาน, ทุกฺขสฺสนฺตํ กริสฺสติ’ฯ
[29]
‘‘ปสนฺนมุขวณฺโณมฺหิ , เอกคฺโค สุสมาหิโต;
ธาเรมิ อนฺติมํ เทหํ, สมฺมาสมฺพุทฺธสาสเนฯ
[30]
‘‘อิโต กปฺปสเต อาสิํ, ปริปุณฺเณ อนูนเก [ปริปุณฺโณ อนูนโก (สฺยา.)];
ราชา สพฺพฆโน นาม, จกฺกวตฺตี มหพฺพโลฯ
[31]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อนุเลปทายโก เถโร อิมา คาถาโย อภาสิตฺถาติฯ
อนุเลปทายกตฺเถรสฺสาปทานํ ฉฏฺฐํฯ
7. มคฺคทายกตฺเถรอปทานํ
[32]
‘‘อุตฺตริตฺวาน นทิกํ, วนํ คจฺฉติ จกฺขุมา;
ตมทฺทสาสิํ สมฺพุทฺธํ, สิทฺธตฺถํ วรลกฺขณํฯ
[33]
‘‘กุทาล [กุทฺทาล (สี. สฺยา.)] ปิฏกมาทาย, สมํ กตฺวาน ตํ ปถํ;
สตฺถารํ อภิวาเทตฺวา, สกํ จิตฺตํ ปสาทยิํฯ
[34]
‘‘จตุนฺนวุติโต กปฺเป, ยํ กมฺมมกริํ ตทา;
ทุคฺคติํ นาภิชานามิ, มคฺคทานสฺสิทํ ผลํฯ
[35]
‘‘สตฺตปญฺญาสกปฺปมฺหิ, เอโก อาสิํ ชนาธิโป;
นาเมน สุปฺปพุทฺโธติ, นายโก โส นริสฺสโรฯ
[36]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มคฺคทายโก เถโร อิมา คาถาโย อภาสิตฺถาติฯ
มคฺคทายกตฺเถรสฺสาปทานํ สตฺตมํฯ
8. ผลกทายกตฺเถรอปทานํ
[37]
‘‘ยานกาโร ปุเร อาสิํ, ทารุกมฺเม สุสิกฺขิโต;
จนฺทนํ ผลกํ กตฺวา, อทาสิํ โลกพนฺธุโนฯ
[38]
‘‘ปภาสติ อิทํ พฺยมฺหํ, สุวณฺณสฺส สุนิมฺมิตํ;
หตฺถิยานํ อสฺสยานํ, ทิพฺพยานํ อุปฏฺฐิตํฯ
[39]
‘‘ปาสาทา สิวิกา เจว, นิพฺพตฺตนฺติ ยทิจฺฉกํ;
อกฺขุพฺภํ [อกฺโขภํ (สี.)] รตนํ มยฺหํ, ผลกสฺส อิทํ ผลํฯ
[40]
‘‘เอกนวุติโต กปฺเป, ผลกํ ยมหํ ททิํ;
ทุคฺคติํ นาภิชานามิ, ผลกสฺส อิทํ ผลํฯ
[41]
‘‘สตฺตปญฺญาสกปฺปมฺหิ, จตุโร นิมฺมิตาวฺหยา;
สตฺตรตนสมฺปนฺนา, จกฺกวตฺตี มหพฺพลาฯ
[42]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ผลกทายโก เถโร อิมา คาถาโย อภาสิตฺถาติฯ
ผลกทายกตฺเถรสฺสาปทานํ อฏฺฐมํฯ
9. วฏํสกิยตฺเถรอปทานํ
[43]
‘‘สุเมโธ นาม นาเมน, สยมฺภู อปราชิโต;
วิเวกมนุพฺรูหนฺโต, อชฺโฌคหิ มหาวนํฯ
[44]
‘‘สฬลํ ปุปฺผิตํ ทิสฺวา, คนฺถิตฺวาน [พนฺธิตฺวาน (สี.)] วฏํสกํ;
พุทฺธสฺส อภิโรเปสิํ, สมฺมุขา โลกนายกํฯ
[45]
‘‘ติํสกปฺปสหสฺสมฺหิ , ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[46]
‘‘อูนวีเส กปฺปสเต, โสฬสาสุํ สุนิมฺมิตา;
สตฺตรตนสมฺปนฺนา, จกฺกวตฺตี มหพฺพลาฯ
[47]
