‘‘ปทุมุตฺตโร โลกวิทู, อาหุตีนํ ปฏิคฺคโห;
มมุทฺธริตุกาโม โส, ภิกฺขนฺโต มมุปาคมิฯ
[78]
‘‘ปสนฺนจิตฺโต สุมโน, ผลํ พุทฺธสฺสทาสหํ;
วิตฺติสญฺชนโน มยฺหํ, ทิฏฺฐธมฺมสุขาวโหฯ
[79]
‘‘สุวณฺณวณฺโณ สมฺพุทฺโธ, อาหุตีนํ ปฏิคฺคโห;
อนฺตลิกฺเข ฐิโต สตฺถา, อิมํ คาถํ อภาสถฯ
[80]
‘‘‘อิมินา ผลทาเนน, เจตนาปณิธีหิ จ;
กปฺปานํ สตสหสฺสํ, ทุคฺคติํ นุปปชฺชสิ’ฯ
[81]
‘‘เตเนว สุกฺกมูเลน, อนุโภตฺวาน สมฺปทา;
ปตฺโตมฺหิ อจลํ ฐานํ, หิตฺวา ชยปราชยํฯ
[82]
‘‘อิโต สตฺตสเต กปฺเป, ราชา อาสิํ สุมงฺคโล;
สตฺตรตนสมฺปนฺโน จกฺกวตฺตี มหพฺพโลฯ
[83]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ผลทายโก เถโร อิมา คาถาโย อภาสิตฺถาติฯ
ผลทายกตฺเถรสฺสาปทานํ สตฺตมํฯ
8. ญาณสญฺญิกตฺเถรอปทานํ
[84]
‘‘ปพฺพเต หิมวนฺตมฺหิ, วสามิ ปพฺพตนฺตเร;
ปุลินํ โสภนํ ทิสฺวา, พุทฺธเสฏฺฐํ อนุสฺสริํฯ
[85]
‘‘ญาเณ อุปนิธา นตฺถิ, สงฺขารํ [สงฺคามํ (สี. สฺยา.), สงฺขาตํ (เถรคาถา อฏฺฐ.)] นตฺถิ สตฺถุโน;
สพฺพธมฺมํ อภิญฺญาย, ญาเณน อธิมุจฺจติฯ
[86]
‘‘นโม เต ปุริสาชญฺญ, นโม เต ปุริสุตฺตม;
ญาเณน เต สโม นตฺถิ, ยาวตา ญาณมุตฺตมํฯ
[87]
‘‘ญาเณ จิตฺตํ ปสาเทตฺวา, กปฺปํ สคฺคมฺหิ โมทหํ;
อวเสเสสุ กปฺเปสุ, กุสลํ จริตํ [กริตํ (สี. สฺยา.), กิริยํ (ก.)] มยาฯ
[88]
‘‘เอกนวุติโต กปฺเป, ยํ สญฺญมลภิํ ตทา;
ทุคฺคติํ นาภิชานามิ, ญาณสญฺญายิทํ ผลํฯ
[89]
‘‘อิโต สตฺตติกปฺปมฺหิ [เตสตฺตติกปฺเป (สี. สฺยา.)], เอโก ปุลินปุปฺผิโย;
สตฺตรตนสมฺปนฺโน, จกฺกวตฺตี มหพฺพโลฯ
[90]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ญาณสญฺญิโก เถโร อิมา คาถาโย อภาสิตฺถาติฯ
ญาณสญฺญิกตฺเถรสฺสาปทานํ อฏฺฐมํฯ
9. คณฺฐิปุปฺผิยตฺเถรอปทานํ
[91]
‘‘สุวณฺณวณฺโณ สมฺพุทฺโธ, วิปสฺสี ทกฺขิณารโห;
ปุรกฺขโต สาวเกหิ, อารามา อภินิกฺขมิฯ
[92]
‘‘ทิสฺวานหํ พุทฺธเสฏฺฐํ, สพฺพญฺญุํ ตมนาสกํ;
ปสนฺนจิตฺโต สุมโน, คณฺฐิปุปฺผํ [คตมคฺคํ (สฺยา. ก.)] อปูชยิํฯ
[93]
‘‘เตน จิตฺตปฺปสาเทน, ทฺวิปทินฺทสฺส ตาทิโน;
หฏฺโฐ หฏฺเฐน จิตฺเตน, ปุน วนฺทิํ ตถาคตํฯ
[94]
‘‘เอกนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[95]
‘‘เอกตาลีสิโต กปฺเป, จรโณ นาม ขตฺติโย;
สตฺตรตนสมฺปนฺโน, จกฺกวตฺตี มหพฺพโลฯ
[96]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา คณฺฐิปุปฺผิโย [คนฺธปุปฺผิโย (สฺยา. ก.)] เถโร อิมา คาถาโย อภาสิตฺถาติฯ
คณฺฐิปุปฺผิยตฺเถรสฺสาปทานํ นวมํฯ