‘‘ทุลฺลทฺธํ วต เม อาสิ, ทุปฺปภาตํ ทุรุฏฺฐิตํ;
ยํ เม โภเค วิชฺชมาเน, ปรินิพฺพายิ จกฺขุมาฯ
[74]
‘‘มม สงฺกปฺปมญฺญาย, สาคโร นาม สาวโก;
มมุทฺธริตุกาโม โส, อาคจฺฉิ มม สนฺติกํฯ
[75]
‘‘กิํ นุ โสจสิ มา ภายิ, จร ธมฺมํ สุเมธส;
อนุปฺปทินฺนา พุทฺเธน, สพฺเพสํ พีชสมฺปทาฯ
[76]
‘‘โส เจ ปูเชยฺย สมฺพุทฺธํ, ติฏฺฐนฺตํ โลกนายกํ;
ธาตุํ สาสปมตฺตมฺปิ, นิพฺพุตสฺสาปิ ปูชเยฯ
[77]
‘‘สเม จิตฺตปฺปสาทมฺหิ, สมํ ปุญฺญํ มหคฺคตํ;
ตสฺมา ถูปํ กริตฺวาน, ปูเชหิ ชินธาตุโยฯ
[78]
‘‘สาครสฺส วโจ สุตฺวา, พุทฺธถูปํ อกาสหํ;
ปญฺจวสฺเส ปริจริํ, มุนิโน ถูปมุตฺตมํฯ
[79]
‘‘เตน กมฺเมน ทฺวิปทินฺท, โลกเชฏฺฐ นราสภ;
สมฺปตฺติํ อนุโภตฺวาน, อรหตฺตมปาปุณิํฯ
[80]
‘‘ภูริปญฺญา จ จตฺตาโร, สตฺตกปฺปสเต อิโต;
สตฺตรตนสมฺปนฺนา, จกฺกวตฺตี มหพฺพลาฯ
[81]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปจฺจุปฏฺฐานสญฺญโก เถโร อิมา คาถาโย อภาสิตฺถาติฯ
ปจฺจุปฏฺฐานสญฺญกตฺเถรสฺสาปทานํ นวมํฯ
10. ชาติปูชกตฺเถรอปทานํ
[82]
‘‘ชายนฺตสฺส วิปสฺสิสฺส, อาโลโก วิปุโล อหุ;
ปถวี จ ปกมฺปิตฺถ, สสาครา สปพฺพตาฯ
[83]
‘‘เนมิตฺตา จ วิยากํสุ, พุทฺโธ โลเก ภวิสฺสติ;
อคฺโค จ สพฺพสตฺตานํ, ชนตํ อุทฺธริสฺสติฯ
[84]
‘‘เนมิตฺตานํ สุณิตฺวาน, ชาติปูชมกาสหํ;
เอทิสา ปูชนา นตฺถิ, ยาทิสา ชาติปูชนาฯ
[85]
‘‘สงฺขริตฺวาน [สํหริตฺวาน (สี. สฺยา.), สงฺกริตฺวาน (ก.)]
กุสลํ, สกํ จิตฺตํ ปสาทยิํฯ
ชาติปูชํ กริตฺวาน, ตตฺถ กาลงฺกโต อหํฯ
[86]
‘‘ยํ ยํ โยนุปปชฺชามิ, เทวตฺตํ อถ มานุสํ;
สพฺเพ สตฺเต อภิโภมิ, ชาติปูชายิทํ ผลํฯ
[87]
‘‘ธาติโย มํ อุปฏฺฐนฺติ, มม จิตฺตวสานุคา;
น ตา สกฺโกนฺติ โกเปตุํ, ชาติปูชายิทํ ผลํฯ
[88]
‘‘เอกนวุติโต กปฺเป, ยํ ปูชมกริํ ตทา;
ทุคฺคติํ นาภิชานามิ, ชาติปูชายิทํ ผลํฯ
[89]
‘‘สุปาริจริยา นาม, จตุตฺติํส ชนาธิปา;
อิโต ตติยกปฺปมฺหิ, จกฺกวตฺตี มหพฺพลาฯ
[90]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ชาติปูชโก เถโร อิมา คาถาโย อภาสิตฺถาติฯ
ชาติปูชกตฺเถรสฺสาปทานํ ทสมํฯ
มหาปริวารวคฺโค ทฺวาทสโมฯ
ตสฺสุทฺทานํ –
ปริวารสุมงฺคลา, สรณาสนปุปฺผิยา;
จิตปูชี พุทฺธสญฺญี, มคฺคุปฏฺฐานชาตินา;
คาถาโย นวุติ วุตฺตา, คณิตาโย วิภาวิหิฯ
13. เสเรยฺยวคฺโค