‘‘อุทคฺคจิตฺโต สุมโน, เวทชาโต กตญฺชลี;
วิตฺติสญฺชนโน เตสํ, ทิฏฺฐธมฺมสุขาวโหฯ
[44]
‘‘อายาจิตฺวาน สมฺพุทฺธํ, วนฺทิตฺวาน จ สุพฺพตํ;
ปาโมชฺชํ ชนยิตฺวาน, สกํ ภวนุปาคมิํฯ
[45]
‘‘ภวเน อุปวิฏฺโฐหํ, พุทฺธเสฏฺฐํ อนุสฺสริํ;
เตน จิตฺตปฺปสาเทน, ตุสิตํ อุปปชฺชหํฯ
[46]
‘‘เอกนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[47]
‘‘โสฬสาสิํสุ ราชาโน, เนมิสมฺมตนามกา;
เตตาลีเส อิโต กปฺเป, จกฺกวตฺตี มหพฺพลาฯ
[48]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สุวณฺณปุปฺผิโย เถโร อิมา คาถาโย อภาสิตฺถาติฯ
สุวณฺณปุปฺผิยตฺเถรสฺสาปทานํ ปญฺจมํฯ
6. จิตกปูชกตฺเถรอปทานํ
[49]
‘‘วสามิ ราชายตเน, สามจฺโจ สปริชฺชโน;
ปรินิพฺพุเต ภควติ, สิขิโน โลกพนฺธุโนฯ
[50]
‘‘ปสนฺนจิตฺโต สุมโน, จิตกํ อคมาสหํ;
ตูริยํ ตตฺถ วาเทตฺวา, คนฺธมาลํ สโมกิริํฯ
[51]
‘‘จิตมฺหิ ปูชํ กตฺวาน, วนฺทิตฺวา จิตกํ อหํ;
ปสนฺนจิตฺโต สุมโน, สกํ ภวนุปาคมิํฯ
[52]
‘‘ภวเน อุปวิฏฺโฐหํ, จิตปูชํ อนุสฺสริํ;
เตน กมฺเมน ทฺวิปทินฺท, โลกเชฏฺฐ นราสภฯ
[53]
‘‘อนุโภตฺวาน สมฺปตฺติํ, เทเวสุ มานุเสสุ จ;
ปตฺโตมฺหิ อจลํ ฐานํ, หิตฺวา ชยปราชยํฯ
[54]
‘‘เอกตฺติํเส อิโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, จิตปูชายิทํ ผลํฯ
[55]
‘‘เอกูนติํสกปฺปมฺหิ, อิโต โสฬส ราชาโน;
อุคฺคตา นาม นาเมน, จกฺกวตฺตี มหพฺพลาฯ
[56]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา จิตกปูชโก เถโร อิมา คาถาโย อภาสิตฺถาติฯ
จิตกปูชกตฺเถรสฺสาปทานํ ฉฏฺฐํฯ
7. พุทฺธสญฺญกตฺเถรอปทานํ
[57]
‘‘ยทา วิปสฺสี โลกคฺโค, อายุสงฺขารโมสฺสชิ;
ปถวี สมฺปกมฺปิตฺถ, เมทนี ชลเมขลาฯ
[58]
‘‘โอตตํ วิตฺถตํ [โอตตํ วิตตํ (สฺยา.)] มยฺหํ, สุวิจิตฺตวฏํสกํ [สุจิจิตฺตํ ปปญฺจกํ (สฺยา.)];
ภวนมฺปิ ปกมฺปิตฺถ, พุทฺธสฺส อายุสงฺขเยฯ
[59]
‘‘ตาโส มยฺหํ สมุปฺปนฺโน, ภวเน สมฺปกมฺปิเต;
อุปฺปาโท [อุปฺปาโต (?)] นุ กิมตฺถาย, อาโลโก วิปุโล อหุฯ
[60]
‘‘เวสฺสวโณ อิธาคมฺม, นิพฺพาเปสิ มหาชนํ;
ปาณภูเต [ปาณภุตํ (สฺยา.), ปาณภูนํ (สี. ก.)] ภยํ นตฺถิ, เอกคฺคา โหถ สํวุตา [สคารวา (สฺยา.)]ฯ
[61]
‘‘อโห พุทฺโธ อโห ธมฺโม, อโห โน สตฺถุ สมฺปทา;
ยสฺมิํ อุปฺปชฺชมานมฺหิ, ปถวี [ปฐวี (สี. สฺยา.)] สมฺปกมฺปติฯ
[62]
‘‘พุทฺธานุภาวํ กิตฺเตตฺวา, กปฺปํ สคฺคมฺหิ โมทหํ;
อวเสเสสุ กปฺเปสุ, กุสลํ จริตํ [กริตํ (สี. สฺยา.), การิตํ (ก.)] มยาฯ
[63]
‘‘เอกนวุติโต กปฺเป, ยํ สญฺญมลภิํ ตทา;
ทุคฺคติํ นาภิชานามิ, พุทฺธสญฺญายิทํ ผลํฯ
[64]