2. สุมงฺคลตฺเถรอปทานํ

[11]

‘‘อตฺถทสฺสี ชินวโร, โลกเชฏฺโฐ นราสโภ;

วิหารา อภินิกฺขมฺม, ตฬากํ อุปสงฺกมิฯ

[12]

‘‘นฺหตฺวา ปิตฺวา จ สมฺพุทฺโธ, อุตฺตริตฺเวกจีวโร;

อฏฺฐาสิ ภควา ตตฺถ, วิโลเกนฺโต ทิโสทิสํฯ

[13]

‘‘ภวเน อุปวิฏฺโฐหํ, อทฺทสํ โลกนายกํ;

หฏฺโฐ หฏฺเฐน จิตฺเตน, อปฺโผเฏสิํ อหํ ตทาฯ

[14]

‘‘สตรํสิํว โชตนฺตํ, ปภาสนฺตํว กญฺจนํ [อิมินา ปาททฺวเยน ปุริมปาททฺวยสฺส ปุรโต ภวิตพฺพํ];

นจฺจคีเต ปยุตฺโตหํ, ปญฺจงฺคตูริยมฺหิ จฯ

[15]

‘‘ยํ ยํ โยนุปปชฺชามิ, เทวตฺตํ อถ มานุสํ;

สพฺเพ สตฺเต อภิโภมิ, วิปุโล โหติ เม ยโส [อยญฺจ คาถา ปริคฺคเหติคาถาย อนนฺตรเมว ฐาตุํ ยุตฺตา]ฯ

[16]

‘‘นโม เต ปุริสาชญฺญ, นโม เต ปุริสุตฺตม;

อตฺตานํ โตสยิตฺวาน, ปเร โตเสสิ ตฺวํ มุนิฯ

[17]

‘‘ปริคฺคเห [ปริคฺคยฺห (สี.), ปริคฺคหิตฺวา (สฺยา.), ปริคฺคเหน (ก.)] นิสีทิตฺวา, หาสํ กตฺวาน สุพฺพเต;

อุปฏฺฐหิตฺวา สมฺพุทฺธํ, ตุสิตํ อุปปชฺชหํฯ

[18]

‘‘โสฬเสโต กปฺปสเต, ทฺวินวเอกจินฺติตา;

สตฺตรตนสมฺปนฺนา, จกฺกวตฺตี มหพฺพลาฯ

[19]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สุมงฺคโล เถโร อิมา คาถาโย อภาสิตฺถาติฯ

สุมงฺคลตฺเถรสฺสาปทานํ ทุติยํฯ

3. สรณคมนิยตฺเถรอปทานํ

[20]

‘‘อุภินฺนํ เทวราชูนํ, สงฺคาโม สมุปฏฺฐิโต;

อโหสิ สมุปพฺยูฬฺโห [สมุปพฺพูฬฺโห (สี.)], มหาโฆโส อวตฺตถ [ปวตฺตถ (สี.)]ฯ

[21]

‘‘ปทุมุตฺตโร โลกวิทู, อาหุตีนํ ปฏิคฺคโห;

อนฺตลิกฺเข ฐิโต สตฺถา, สํเวเชสิ มหาชนํฯ

[22]

‘‘สพฺเพ เทวา อตฺตมนา, นิกฺขิตฺตกวจาวุธา;

สมฺพุทฺธํ อภิวาเทตฺวา, เอกคฺคาสิํสุ ตาวเทฯ

[23]

‘‘มยฺหํ [อมฺหํ (สี.)] สงฺกปฺปมญฺญาย, วาจาสภิมุทีรยิ;

อนุกมฺปโก โลกวิทู, นิพฺพาเปสิ มหาชนํฯ

[24]

‘‘ปทุฏฺฐจิตฺโต มนุโช, เอกปาณํ วิเหฐยํ;

เตน จิตฺตปฺปโทเสน, อปายํ อุปปชฺชติฯ

[25]

‘‘สงฺคามสีเส นาโคว, พหู ปาเณ วิเหฐยํ;

นิพฺพาเปถ สกํ จิตฺตํ, มา หญฺญิตฺโถ ปุนปฺปุนํฯ

[26]

‘‘ทฺวินฺนมฺปิ ยกฺขราชูนํ, เสนา สา วิมฺหิตา อหุ [เสนาโย วิมฺหิตา อหู (สี.), เสนาปิ สมิตา อหุ (สฺยา.)];

สรณญฺจ อุปาคจฺฉุํ, โลกเชฏฺฐํ สุตาทินํฯ

[27]

‘‘สญฺญาเปตฺวาน ชนตํ, ปทมุทฺธริ [อุทฺธริ ปน (สี. สฺยา.)] จกฺขุมา;

เปกฺขมาโนว เทเวหิ, ปกฺกามิ อุตฺตรามุโขฯ

[28]

‘‘ปฐมํ สรณํ คจฺฉิํ, ทฺวิปทินฺทสฺส ตาทิโน;

กปฺปานํ สตสหสฺสํ, ทุคฺคติํ นุปปชฺชหํฯ

[29]

‘‘มหาทุนฺทุภินามา จ, โสฬสาสุํ รเถสภา;

ติํสกปฺปสหสฺสมฺหิ, ราชาโน จกฺกวตฺติโนฯ

[30]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สรณคมนิโย เถโร อิมา คาถาโย อภาสิตฺถาติฯ

สรณคมนิยตฺเถรสฺสาปทานํ ตติยํฯ

4. เอกาสนิยตฺเถรอปทานํ

[31]

‘‘วรุโณ นาม นาเมน, เทวราชา อหํ ตทา;

อุปฏฺฐเหสิํ สมฺพุทฺธํ, สโยคฺคพลวาหโนฯ

[32]