4. ปทปูชกตฺเถรอปทานํ
[19]
‘‘สิทฺธตฺถสฺส ภควโต, ชาติปุปฺผมทาสหํ;
ปาเทสุ สตฺต ปุปฺผานิ, หาเสโนกิริตานิ เมฯ
[20]
‘‘เตน กมฺเมนหํ อชฺช, อภิโภมิ นรามเร;
ธาเรมิ อนฺติมํ เทหํ, สมฺมาสมฺพุทฺธสาสเนฯ
[21]
‘‘จตุนฺนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, ปุปฺผปูชายิทํ ผลํฯ
[22]
‘‘สมนฺตคนฺธนามาสุํ, เตรส จกฺกวตฺติโน;
อิโต ปญฺจมเก กปฺเป, จาตุรนฺตา ชนาธิปาฯ
[23]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปทปูชโก เถโร อิมา คาถาโย อภาสิตฺถาติฯ
ปทปูชกตฺเถรสฺสาปทานํ จตุตฺถํฯ
5. มุฏฺฐิปุปฺผิยตฺเถรอปทานํ
[24]
‘‘สุทสฺสโนติ นาเมน, มาลากาโร อหํ ตทา;
อทฺทสํ วิรชํ พุทฺธํ, โลกเชฏฺฐํ นราสภํฯ
[25]
‘‘ชาติปุปฺผํ คเหตฺวาน, ปูชยิํ ปทุมุตฺตรํ;
วิสุทฺธจกฺขุ สุมโน, ทิพฺพจกฺขุํ สมชฺฌคํฯ
[26]
‘‘เอติสฺสา ปุปฺผปูชาย, จิตฺตสฺส ปณิธีหิ จ;
กปฺปานํ สตสหสฺสํ, ทุคฺคติํ นุปปชฺชหํฯ
[27]
‘‘โสฬสาสิํสุ ราชาโน, เทวุตฺตรสนามกา;
ฉตฺติํสมฺหิ อิโต กปฺเป, จกฺกวตฺตี มหพฺพลาฯ
[28]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มุฏฺฐิปุปฺผิโย เถโร อิมา คาถาโย อภาสิตฺถาติฯ
มุฏฺฐิปุปฺผิยตฺเถรสฺสาปทานํ ปญฺจมํฯ
6. อุทกปูชกตฺเถรอปทานํ
[29]
‘‘สุวณฺณวณฺณํ สมฺพุทฺธํ, คจฺฉนฺตํ อนิลญฺชเส;
ฆตาสนํว ชลิตํ, อาทิตฺตํว หุตาสนํฯ
[30]
‘‘ปาณินา อุทกํ คยฺห, อากาเส อุกฺขิปิํ อหํ;
สมฺปฏิจฺฉิ มหาวีโร, พุทฺโธ การุณิโก อิสิ [มยิ (สฺยา.)]ฯ
[31]
‘‘อนฺตลิกฺเข ฐิโต สตฺถา, ปทุมุตฺตรนามโก;
มม สงฺกปฺปมญฺญาย, อิมํ คาถํ อภาสถฯ
[32]
‘‘‘อิมินา ทกทาเนน, ปีติอุปฺปาทเนน จ;
กปฺปสตสหสฺสมฺปิ, ทุคฺคติํ นุปปชฺชติ’ [นุปปชฺชสิ (ก.)]ฯ
[33]
‘‘เตน กมฺเมน ทฺวิปทินฺท, โลกเชฏฺฐ นราสภ;
ปตฺโตมฺหิ อจลํ ฐานํ, หิตฺวา ชยปราชยํฯ
[34]
‘‘สหสฺสราชนาเมน , ตโย เต จกฺกวตฺติโน;
ปญฺจสฏฺฐิกปฺปสเต, จาตุรนฺตา ชนาธิปาฯ
[35]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อุทกปูชโก เถโร อิมา คาถาโย อภาสิตฺถาติฯ
อุทกปูชกตฺเถรสฺสาปทานํ ฉฏฺฐํฯ
7. นฬมาลิยตฺเถรอปทานํ
[36]
‘‘ปทุมุตฺตรพุทฺธสฺส, โลกเชฏฺฐสฺส ตาทิโน;
ติณตฺถเร นิสินฺนสฺส, อุปสนฺตสฺส ตาทิโนฯ
[37]
‘‘นฬมาลํ คเหตฺวาน, พนฺธิตฺวา [พีชิตฺวา (ก.)] พีชนิํ อหํ;
พุทฺธสฺส อุปนาเมสิํ, ทฺวิปทินฺทสฺส ตาทิโนฯ
[38]
‘‘ปฏิคฺคเหตฺวา สพฺพญฺญู, พีชนิํ โลกนายโก;
มม สงฺกปฺปมญฺญาย, อิมํ คาถํ อภาสถฯ
[39]