‘‘กุสุโมทกมาทาย , โพธิยา โอกิริํ อหํ;

โมจยิสฺสติ โน มุตฺโต, นิพฺพาเปสฺสติ นิพฺพุโตฯ

[48]

‘‘เอกนวุติโต กปฺเป, ยํ โพธิมภิสิญฺจยิํ;

ทุคฺคติํ นาภิชานามิ, โพธิสิญฺจายิทํ ผลํฯ

[49]

‘‘เตตฺติํเส วตฺตมานมฺหิ, กปฺเป อาสุํ ชนาธิปา;

อุทกเสจนา นาม, อฏฺเฐเต จกฺกวตฺติโนฯ

[50]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โพธิสิญฺจโก เถโร อิมา คาถาโย อภาสิตฺถาติฯ

โพธิสิญฺจกตฺเถรสฺสาปทานํ นวมํฯ

10. ปทุมปุปฺผิยตฺเถรอปทานํ

[51]

‘‘โปกฺขรวนํ ปวิฏฺโฐ, ภญฺชนฺโต ปทุมานิหํ;

ตตฺถทฺทสํ ผุสฺสํ พุทฺธํ [อทฺทสํ ผุสฺสสมฺพุทฺธํ (สี. สฺยา.)], พาตฺติํสวรลกฺขณํฯ

[52]

‘‘ปทุมปุปฺผํ คเหตฺวาน, อากาเส อุกฺขิปิํ อหํ;

ปาปกมฺมํ สริตฺวาน, ปพฺพชิํ อนคาริยํฯ

[53]

‘‘ปพฺพชิตฺวาน กาเยน, มนสา สํวุเตน จ;

วจีทุจฺจริตํ หิตฺวา, อาชีวํ ปริโสธยิํฯ

[54]

‘‘ทฺเวนวุเต อิโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, พุทฺธปูชายิทํ ผลํฯ

[55]

‘‘ปทุมาภาสนามา จ, อฏฺฐารส มหีปตี;

อฏฺฐารเสสุ กปฺเปสุ, อฏฺฐตาลีสมาสิสุํฯ

[56]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปทุมปุปฺผิโย เถโร อิมา คาถาโย อภาสิตฺถาติ;

ปทุมปุปฺผิยตฺเถรสฺสาปทานํ ทสมํฯ

ติมิรวคฺโค นวโมฯ

ตสฺสุทฺทานํ –

ติมิรนงฺคลีปุปฺผ, นิปฺปนฺนญฺชลิโก อโธ;

ทฺเว รํสิสญฺญี ผลโท, สทฺทสญฺญี จ เสจโก;

ปทฺมปุปฺผี จ คาถาโย, ฉปฺปญฺญาส ปกิตฺติตาฯ

10. สุธาวคฺโค