7. ผลทายกตฺเถรอปทานํ
[39]
‘‘ปพฺพเต หิมวนฺตมฺหิ, ขราชินธโร อหํ;
ผุสฺสํ ชินวรํ ทิสฺวา, ผลหตฺโถ ผลํ อทํฯ
[40]
‘‘ยมหํ ผลมทาสิํ, วิปฺปสนฺเนน เจตสา;
ภเว นิพฺพตฺตมานมฺหิ, ผลํ นิพฺพตฺตเต มมฯ
[41]
‘‘ทฺเวนวุเต อิโต กปฺเป, ยํ ผลํ อททิํ อหํ;
ทุคฺคติํ นาภิชานามิ, ผลทานสฺสิทํ ผลํฯ
[42]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ผลทายโก เถโร อิมา คาถาโย อภาสิตฺถาติฯ
ผลทายกตฺเถรสฺสาปทานํ สตฺตมํฯ
8. สทฺทสญฺญกตฺเถรอปทานํ
[43]
‘‘ปพฺพเต หิมวนฺตมฺหิ, วสามิ ปณฺณสนฺถเร;
ผุสฺสสฺส ธมฺมํ ภณโต, สทฺเท จิตฺตํ ปสาทยิํฯ
[44]
‘‘ทฺเวนวุเต อิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, ปุญฺญกมฺมสฺสิทํ ผลํฯ
[45]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สทฺทสญฺญโก เถโร อิมา คาถาโย อภาสิตฺถาติฯ
สทฺทสญฺญกตฺเถรสฺสาปทานํ อฏฺฐมํฯ
9. โพธิสิญฺจกตฺเถรอปทานํ
[46]
‘‘วิปสฺสิสฺส ภควโต, มหาโพธิมโห อหุ;
ปพฺพชฺชุปคโต สนฺโต, อุปคจฺฉิํ อหํ ตทาฯ
[47]
‘‘กุสุโมทกมาทาย , โพธิยา โอกิริํ อหํ;
โมจยิสฺสติ โน มุตฺโต, นิพฺพาเปสฺสติ นิพฺพุโตฯ
[48]
‘‘เอกนวุติโต กปฺเป, ยํ โพธิมภิสิญฺจยิํ;
ทุคฺคติํ นาภิชานามิ, โพธิสิญฺจายิทํ ผลํฯ
[49]
‘‘เตตฺติํเส วตฺตมานมฺหิ, กปฺเป อาสุํ ชนาธิปา;
อุทกเสจนา นาม, อฏฺเฐเต จกฺกวตฺติโนฯ
[50]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา โพธิสิญฺจโก เถโร อิมา คาถาโย อภาสิตฺถาติฯ
โพธิสิญฺจกตฺเถรสฺสาปทานํ นวมํฯ
10. ปทุมปุปฺผิยตฺเถรอปทานํ
[51]
‘‘โปกฺขรวนํ ปวิฏฺโฐ, ภญฺชนฺโต ปทุมานิหํ;
ตตฺถทฺทสํ ผุสฺสํ พุทฺธํ [อทฺทสํ ผุสฺสสมฺพุทฺธํ (สี. สฺยา.)], พาตฺติํสวรลกฺขณํฯ
[52]
‘‘ปทุมปุปฺผํ คเหตฺวาน, อากาเส อุกฺขิปิํ อหํ;
ปาปกมฺมํ สริตฺวาน, ปพฺพชิํ อนคาริยํฯ
[53]
‘‘ปพฺพชิตฺวาน กาเยน, มนสา สํวุเตน จ;
วจีทุจฺจริตํ หิตฺวา, อาชีวํ ปริโสธยิํฯ
[54]
‘‘ทฺเวนวุเต อิโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[55]
‘‘ปทุมาภาสนามา จ, อฏฺฐารส มหีปตี;
อฏฺฐารเสสุ กปฺเปสุ, อฏฺฐตาลีสมาสิสุํฯ
[56]