10. ติปทุมิยตฺเถรอปทานํ
[48]
‘‘ปทุมุตฺตโร นาม ชิโน, สพฺพธมฺมาน ปารคู;
ทนฺโต ทนฺตปริวุโต, นครา นิกฺขมี ตทาฯ
[49]
‘‘นคเร หํสวติยํ, อโหสิํ มาลิโก ตทา;
ยํ ตตฺถ อุตฺตมํ โตณิ, ปทฺมปุปฺผานิ [อุตฺตมํ ปุปฺผํ, ตีณิ ปุปฺผานิ (สี.)] อคฺคหิํฯ
[50]
‘‘อทฺทสํ วิรชํ พุทฺธํ, ปฏิมคฺคนฺตราปเณ;
สห [โสหํ (สี.)] ทิสฺวาน สมฺพุทฺธํ, เอวํ จินฺเตสหํ ตทาฯ
[51]
‘‘กิํ เม อิเมหิ ปุปฺเผหิ, รญฺโญ อุปนิเตหิ เม;
คามํ วา คามเขตฺตํ วา, สหสฺสํ วา ลเภยฺยหํฯ
[52]
‘‘อทนฺตทมนํ วีรํ, สพฺพสตฺตสุขาวหํ;
โลกนาถํ ปูชยิตฺวา, ลจฺฉามิ อมตํ ธนํฯ
[53]
‘‘เอวาหํ จินฺตยิตฺวาน, สกํ จิตฺตํ ปสาทยิํ;
ตีณิ โลหิตเก คยฺห, อากาเส อุกฺขิปิํ ตทาฯ
[54]
‘‘มยา อุกฺขิตฺตมตฺตมฺหิ, อากาเส ปตฺถริํสุ เต;
ธาริํสุ มตฺถเก ตตฺถ, อุทฺธํวณฺฏา อโธมุขาฯ
[55]
‘‘เย เกจิ มนุชา ทิสฺวา, อุกฺกุฏฺฐิํ สมฺปวตฺตยุํ;
เทวตา อนฺตลิกฺขมฺหิ, สาธุการํ ปวตฺตยุํฯ
[56]
‘‘อจฺเฉรํ โลเก อุปฺปนฺนํ, พุทฺธเสฏฺฐสฺส วาหสา;
สพฺเพ ธมฺมํ สุณิสฺสาม, ปุปฺผานํ วาหสา มยํฯ
[57]
‘‘ปทุมุตฺตโร โลกวิทู, อาหุตีนํ ปฏิคฺคโห;
วีถิยญฺหิ ฐิโต สนฺโต, อิมา คาถา อภาสถฯ
[58]
‘‘‘โย โส พุทฺธํ อปูเชสิ, รตฺตปทฺเมหิ [รตฺตปทุเมหิ (สี. สฺยา.)] มาณโว;
ตมหํ กิตฺตยิสฺสามิ, สุณาถ มม ภาสโตฯ
[59]
‘‘‘ติํสกปฺปสหสฺสานิ, เทวโลเก รมิสฺสติ;
ติํสกปฺปานิ [ติํสกฺขตฺตุญฺจ (สฺยา.)] เทวินฺโท, เทวรชฺชํ กริสฺสติฯ
[60]
‘‘‘มหาวิตฺถาริกํ นาม, พฺยมฺหํ เหสฺสติ ตาวเท;
ติโยชนสตุพฺพิทฺธํ, ทิยฑฺฒสตวิตฺถตํฯ
[61]
‘‘‘จตฺตาริสตสหสฺสานิ , นิยฺยูหา จ สุมาปิตา;
กูฏาคารวรูเปตา, มหาสยนมณฺฑิตาฯ
[62]
‘‘‘โกฏิสตสหสฺสิโย , ปริวาเรสฺสนฺติ อจฺฉรา;
กุสลา นจฺจคีตสฺส, วาทิเตปิ ปทกฺขิณาฯ
[63]
‘‘‘เอตาทิเส พฺยมฺหวเร, นารีคณสมากุเล;
วสฺสิสฺสติ ปุปฺผวสฺโส, ทิพฺโพ [ปท (ก.)] โลหิตโก สทาฯ
[64]
‘‘‘ภิตฺติขีเล นาคทนฺเต, ทฺวารพาหาย โตรเณ;
จกฺกมตฺตา โลหิตกา, โอลมฺพิสฺสนฺติ ตาวเทฯ
[65]
‘‘‘ปตฺเตน ปตฺตสญฺฉนฺเน, อนฺโตพฺยมฺหวเร อิมํ;
อตฺถริตฺวา ปารุปิตฺวา, ตุวฏฺฏิสฺสนฺติ ตาวเทฯ
[66]
‘‘‘ภวนํ ปริวาเรตฺวา, สมนฺตา สตโยชเน;
เตปิ ปทฺมา [เต วิสุทฺธา (สี. สฺยา.)] โลหิตกา, ทิพฺพคนฺธํ ปวายเรฯ
[67]
‘‘‘ปญฺจสตฺตติกฺขตฺตุญฺจ, จกฺกวตฺตี ภวิสฺสติ;
ปเทสรชฺชํ วิปุลํ, คณนาโต อสงฺขิยํฯ
[68]
‘‘‘สมฺปตฺติโย ทุเว ภุตฺวา, อนีติ อนุปทฺทโว;
สมฺปตฺเต ปริโยสาเน, นิพฺพานํ ปาปุณิสฺสติ’ [ผสฺสยิสฺสติ (สี.), ปสฺสยิสฺสติ (ก.)]ฯ
[69]
‘‘สุทิฏฺโฐ วต เม พุทฺโธ, วาณิชฺชํ สุปโยชิตํ;
ปทฺมานิ ตีณิ ปูเชตฺวา, อนุโภสิํ ติสมฺปทา [อนุภูยนฺติ สมฺปทา (ก.)]ฯ
[70]
‘‘อชฺช เม ธมฺมปฺปตฺตสฺส, วิปฺปมุตฺตสฺส สพฺพโส;
สุปุปฺผิตํ โลหิตกํ, ธารยิสฺสติ มตฺถเกฯ
[71]
‘‘มม กมฺมํ กเถนฺตสฺส, ปทุมุตฺตรสตฺถุโน;
สตปาณสหสฺสานํ, ธมฺมาภิสมโย อหุฯ
[72]
‘‘สตสหสฺสิโต กปฺเป, ยํ พุทฺธมภิปูชยิํ;
ทุคฺคติํ นาภิชานามิ, ติปทุมานิทํ ผลํฯ
[73]
‘‘กิเลสา ฌาปิตา มยฺหํ, ภวา สพฺเพ สมูหตา;
สพฺพาสวา ปริกฺขีณา, นตฺถิ ทานิ ปุนพฺภโวฯ
[74]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ติปทุมิโย เถโร อิมา คาถาโย อภาสิตฺถาติฯ
ติปทุมิยตฺเถรสฺสาปทานํ ทสมํฯ
นาคสมาลวคฺโค อฏฺฐโมฯ
ตสฺสุทฺทานํ –
นาคสมาโล ปทสญฺญี, สญฺญกาลุวทายโก;
เอกสญฺญี ติณสนฺถาโร, สูจิปาฏลิปุปฺผิโย;
ฐิตญฺชลี ติปทุมี, คาถาโย ปญฺจสตฺตติฯ
9. ติมิรวคฺโค