‘‘อิโต ทุติยเก กปฺเป, มิค [มิตฺต (สฺยา.)] สมฺมตขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[29]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ติณสนฺถรทายโก เถโร อิมา คาถาโย อภาสิตฺถาติฯ

ติณสนฺถรทายกตฺเถรสฺสาปทานํ ฉฏฺฐํฯ

7. สูจิทายกตฺเถรอปทานํ

[30]

‘‘ติํสกปฺปสหสฺสมฺหิ, สมฺพุทฺโธ โลกนายโก;

สุเมโธ นาม นาเมน, พาตฺติํสวรลกฺขโณฯ

[31]

‘‘ตสฺส กญฺจนวณฺณสฺส, ทฺวิปทินฺทสฺส ตาทิโน;

ปญฺจ สูจี มยา ทินฺนา, สิพฺพนตฺถาย จีวรํฯ

[32]

‘‘เตเนว สูจิทาเนน, นิปุณตฺถวิปสฺสกํ;

ติกฺขํ ลหุญฺจ ผาสุญฺจ, ญาณํ เม อุทปชฺชถฯ

[33]

‘‘กิเลสา ฌาปิตา มยฺหํ, ภวา สพฺเพ สมูหตา;

ธาเรมิ อนฺติมํ เทหํ, สมฺมาสมฺพุทฺธสาสเนฯ

[34]

‘‘ทฺวิปทาธิปตี นาม, ราชาโน จตุโร อหุํ;

สตฺตรตนสมฺปนฺนา, จกฺกวตฺตี มหพฺพลาฯ

[35]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สูจิทายโก เถโร อิมา คาถาโย อภาสิตฺถาติฯ

สูจิทายกตฺเถรสฺสาปทานํ สตฺตมํฯ

8. ปาฏลิปุปฺผิยตฺเถรอปทานํ

[36]

‘‘สุวณฺณวณฺณํ สมฺพุทฺธํ, คจฺฉนฺตํ อนฺตราปเณ;

กญฺจนคฺฆิยสงฺกาสํ, พาตฺติํสวรลกฺขณํฯ

[37]

‘‘เสฏฺฐิปุตฺโต ตทา อาสิํ, สุขุมาโล สุเขธิโต;

อุจฺฉงฺเค ปาฏลิปุปฺผํ, กตฺวาน [กตฺวา ตํ (สี. สฺยา.)] อภิสํหริํฯ

[38]

‘‘หฏฺโฐ หฏฺเฐน จิตฺเตน, ปุปฺเผหิ อภิปูชยิํ;

ติสฺสํ โลกวิทุํ นาถํ, นรเทวํ นมสฺสหํฯ

[39]

‘‘ทฺเวนวุเต อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, ปุปฺผปูชายิทํ ผลํฯ

[40]

‘‘อิโต เตสฏฺฐิกปฺปมฺหิ, อภิสมฺมตนามโก;

สตฺตรตนสมฺปนฺโน, จกฺกวตฺตี มหพฺพโลฯ

[41]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปาฏลิปุปฺผิโย เถโร อิมา คาถาโย อภาสิตฺถาติฯ

ปาฏลิปุปฺผิยตฺเถรสฺสาปทานํ อฏฺฐมํฯ

9. ฐิตญฺชลิยตฺเถรอปทานํ

[42]

‘‘มิคลุทฺโท ปุเร อาสิํ, อรญฺเญ กานเน อหํ;

ตตฺถ อทฺทสํ [ตตฺถทฺทสาสิํ (สี. สฺยา.)] สมฺพุทฺธํ, พาตฺติํสวรลกฺขณํฯ

[43]

‘‘ตตฺถาหํ อญฺชลิํ กตฺวา, ปกฺกามิํ ปาจินามุโข;

อวิทูเร นิสินฺนสฺส, นิยเก ปณฺณสนฺถเรฯ

[44]

‘‘ตโต เม อสนีปาโต, มตฺถเก นิปตี ตทา;

โสหํ มรณกาลมฺหิ, อกาสิํ ปุนรญฺชลิํฯ

[45]

‘‘ทฺเวนวุเต อิโต กปฺเป, อญฺชลิํ อกริํ ตทา;

ทุคฺคติํ นาภิชานามิ, อญฺชลิสฺส อิทํ ผลํฯ

[46]

‘‘จตุปณฺณาสกปฺปมฺหิ, มิคเกตุสนามโก;

สตฺตรตนสมฺปนฺโน, จกฺกวตฺตี มหพฺพโลฯ

[47]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ฐิตญฺชลิโย เถโร อิมา คาถาโย อภาสิตฺถาติฯ

ฐิตญฺชลิยตฺเถรสฺสาปทานํ นวมํฯ