3. พุทฺธสญฺญกตฺเถรอปทานํ

[9]

‘‘ทุมคฺเค ปํสุกูลิกํ, ลคฺคํ ทิสฺวาน สตฺถุโน;

ตโต ตมญฺชลิํ กตฺวา, ปํสุกูลํ อวนฺทหํฯ

[10]

‘‘ทฺเวนวุเต อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, พุทฺธสญฺญายิทํ ผลํฯ

[11]

‘‘อิโต จตุตฺถเก กปฺเป, ทุมสาโรสิ ขตฺติโย;

จาตุรนฺโต วิชิตาวี, จกฺกวตฺตี มหพฺพโลฯ

[12]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา พุทฺธสญฺญโก เถโร อิมา คาถาโย อภาสิตฺถาติฯ

พุทฺธสญฺญกตฺเถรสฺสาปทานํ ตติยํฯ

4. ภิสาลุวทายกตฺเถรอปทานํ

[13]

‘‘กานนํ วนโมคยฺห, วสามิ วิปิเน อหํ;

วิปสฺสิํ อทฺทสํ พุทฺธํ, อาหุตีนํ ปฏิคฺคหํฯ

[14]

‘‘ภิสาลุวญฺจ ปาทาสิํ, อุทกํ หตฺถโธวนํ;

วนฺทิตฺวา สิรสา ปาเท, ปกฺกามิ อุตฺตรามุโขฯ

[15]

‘‘เอกนวุติโต กปฺเป, ภิสาลุวมทํ ตทา;

ทุคฺคติํ นาภิชานามิ, ปุญฺญกมฺมสฺสิทํ ผลํฯ

[16]

‘‘อิโต ตติยเก กปฺเป, ภิสสมฺมตขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[17]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ภิสาลุวทายโก เถโร อิมา คาถาโย อภาสิตฺถาติฯ

ภิสาลุวทายกตฺเถรสฺสาปทานํ จตุตฺถํฯ

ฉฏฺฐภาณวารํฯ

5. เอกสญฺญกตฺเถรอปทานํ

[18]

‘‘ขณฺโฑ นามาสิ นาเมน, วิปสฺสิสฺสคฺคสาวโก;

เอกา ภิกฺขา มยา ทินฺนา, โลกาหุติปฏิคฺคเหฯ

[19]

‘‘เตน จิตฺตปฺปสาเทน, ทฺวิปทินฺท นราสภ;

ทุคฺคติํ นาภิชานามิ, เอกภิกฺขายิทํ ผลํฯ

[20]

‘‘จตฺตาลีสมฺหิโต กปฺเป, วรุโณ นาม ขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[21]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา เอกสญฺญโก เถโร อิมา คาถาโย อภาสิตฺถาติฯ

เอกสญฺญกตฺเถรสฺสาปทานํ ปญฺจมํฯ

6. ติณสนฺถรทายกตฺเถรอปทานํ

[22]

‘‘หิมวนฺตสฺสาวิทูเร, มหาชาตสฺสโร อหุ;

สตปตฺเตหิ สญฺฉนฺโน, นานาสกุณมาลโยฯ

[23]

‘‘ตมฺหิ นฺหตฺวา จ ปิตฺวา [ปีตฺวา (สี. สฺยา.)] จ, อวิทูเร วสามหํ;

อทฺทสํ สมณานคฺคํ, คจฺฉนฺตํ อนิลญฺชเสฯ

[24]

‘‘มม สงฺกปฺปมญฺญาย, สตฺถา โลเก อนุตฺตโร;

อพฺภโต โอรุหิตฺวาน, ภูมิยํฐาสิ ตาวเทฯ

[25]

‘‘วิสาเณน [ลายเนน (สฺยา.)] ติณํ คยฺห, นิสีทนมทาสหํ;

นิสีทิ ภควา ตตฺถ, ติสฺโส โลกคฺคนายโกฯ

[26]

‘‘สกํ จิตฺตํ ปสาเทตฺวา, อวนฺทิ โลกนายกํ;

ปฏิกุฏิโก [อุกฺกุฏิโก (สฺยา. ก.)] อปสกฺกิํ, นิชฺฌายนฺโต มหามุนิํฯ

[27]

‘‘เตน จิตฺตปฺปสาเทน, นิมฺมานํ อุปปชฺชหํ;

ทุคฺคติํ นาภิชานามิ, สนฺถรสฺส อิทํ ผลํฯ

[28]