1. นาคสมาลตฺเถรอปทานํ

[1]

‘‘อปาฏลิํ อหํ ปุปฺผํ, อุชฺฌิตํ สุมหาปเถ;

ถูปมฺหิ อภิโรเปสิํ, สิขิโน โลกพนฺธุโนฯ

[2]

‘‘เอกตฺติํเส อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, ถูปปูชายิทํ ผลํฯ

[3]

‘‘อิโต ปนฺนรเส กปฺเป, ภูมิโย [ปุปฺผิโย (สฺยา.)] นาม ขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[4]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา นาคสมาโล เถโร อิมา คาถาโย อภาสิตฺถาติฯ

นาคสมาลตฺเถรสฺสาปทานํ ปฐมํฯ

2. ปทสญฺญกตฺเถรอปทานํ

[5]

‘‘อกฺกนฺตญฺจ ปทํ ทิสฺวา, ติสฺสสฺสาทิจฺจพนฺธุโน;

หฏฺโฐ หฏฺเฐน จิตฺเตน, ปเท จิตฺตํ ปสาทยิํฯ

[6]

‘‘ทฺเวนวุเต อิโต กปฺเป, ยํ สญฺญมลภิํ ตทา;

ทุคฺคติํ นาภิชานามิ, ปทสญฺญายิทํ ผลํฯ

[7]

‘‘อิโต สตฺตมเก กปฺเป, สุเมโธ นาม ขตฺติโย;

สตฺตรตนสมฺปนฺโน, จกฺกวตี มหพฺพโลฯ

[8]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปทสญฺญโก เถโร อิมา คาถาโย อภาสิตฺถาติฯ

ปทสญฺญกตฺเถรสฺสาปทานํ ทุติยํฯ

3. พุทฺธสญฺญกตฺเถรอปทานํ

[9]

‘‘ทุมคฺเค ปํสุกูลิกํ, ลคฺคํ ทิสฺวาน สตฺถุโน;

ตโต ตมญฺชลิํ กตฺวา, ปํสุกูลํ อวนฺทหํฯ

[10]

‘‘ทฺเวนวุเต อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, พุทฺธสญฺญายิทํ ผลํฯ

[11]

‘‘อิโต จตุตฺถเก กปฺเป, ทุมสาโรสิ ขตฺติโย;

จาตุรนฺโต วิชิตาวี, จกฺกวตฺตี มหพฺพโลฯ

[12]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา พุทฺธสญฺญโก เถโร อิมา คาถาโย อภาสิตฺถาติฯ

พุทฺธสญฺญกตฺเถรสฺสาปทานํ ตติยํฯ

4. ภิสาลุวทายกตฺเถรอปทานํ

[13]

‘‘กานนํ วนโมคยฺห, วสามิ วิปิเน อหํ;

วิปสฺสิํ อทฺทสํ พุทฺธํ, อาหุตีนํ ปฏิคฺคหํฯ

[14]

‘‘ภิสาลุวญฺจ ปาทาสิํ, อุทกํ หตฺถโธวนํ;

วนฺทิตฺวา สิรสา ปาเท, ปกฺกามิ อุตฺตรามุโขฯ

[15]

‘‘เอกนวุติโต กปฺเป, ภิสาลุวมทํ ตทา;

ทุคฺคติํ นาภิชานามิ, ปุญฺญกมฺมสฺสิทํ ผลํฯ

[16]

‘‘อิโต ตติยเก กปฺเป, ภิสสมฺมตขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[17]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ภิสาลุวทายโก เถโร อิมา คาถาโย อภาสิตฺถาติฯ

ภิสาลุวทายกตฺเถรสฺสาปทานํ จตุตฺถํฯ

ฉฏฺฐภาณวารํฯ