‘‘อรุณวา [อรุณกา (สี.), อรุณสา (สฺยา.)] สตฺต ชนา, จกฺกวตฺตี มหพฺพลา;
ฉตฺติํสติมฺหิ อาสิํสุ, กปฺปมฺหิ มนุชาธิปาฯ
[52]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา วตฺถทายโก เถโร อิมา คาถาโย อภาสิตฺถาติฯ
วตฺถทายกตฺเถรสฺสาปทานํ สตฺตมํฯ
8. อมฺพทายกตฺเถรอปทานํ
[53]
‘‘อโนมทสฺสี ภควา, นิสินฺโน ปพฺพตนฺตเร;
เมตฺตาย อผริ โลเก, อปฺปมาเณ นิรูปธิฯ
[54]
‘‘กปิ อหํ ตทา อาสิํ, หิมวนฺเต นคุตฺตเม;
ทิสฺวา อโนมทสฺสิํ ตํ [อโนมํ อมิตํ (สี.), อโนมมธิตํ (สฺยา.)], พุทฺเธ จิตฺตํ ปสาทยิํฯ
[55]
‘‘อวิทูเร หิมวนฺตสฺส, อมฺพาสุํ ผลิโน ตทา;
ตโต ปกฺกํ คเหตฺวาน, อมฺพํ สมธุกํ อทํฯ
[56]
‘‘ตํ เม พุทฺโธ วิยากาสิ, อโนมทสฺสี มหามุนิ;
อิมินา มธุทาเนน, อมฺพทาเนน จูภยํฯ
[57]
‘‘สตฺตปญฺญาสกปฺปมฺหิ, เทวโลเก รมิสฺสติ;
อวเสเสสุ กปฺเปสุ, โวกิณฺณํ สํสริสฺสติฯ
[58]
‘‘เขเปตฺวา ปาปกํ กมฺมํ, ปริปกฺกาย พุทฺธิยา;
วินิปาตมคนฺตฺวาน, กิเลเส ฌาปยิสฺสติฯ
[59]
‘‘ทเมน อุตฺตเมนาหํ, ทมิโตมฺหิ มเหสินา;
ปตฺโตมฺหิ อจลํ ฐานํ, หิตฺวา ชยปราชยํฯ
[60]
‘‘สตฺตสตฺตติกปฺปสเต, อมฺพฏฺฐชสนามกา;
จตุทฺทส เต ราชาโน, จกฺกวตฺตี มหพฺพลาฯ
[61]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อมฺพทายโก เถโร อิมา คาถาโย อภาสิตฺถาติฯ
อมฺพทายกตฺเถรสฺสาปทานํ อฏฺฐมํฯ
9. สุมนตฺเถรอปทานํ
[62]
‘‘สุมโน นาม นาเมน, มาลากาโร อหํ ตทา;
อทฺทสํ วิรชํ พุทฺธํ, โลกาหุติปฏิคฺคหํฯ
[63]
‘‘อุโภ หตฺเถหิ ปคฺคยฺห, สุมนํ ปุปฺผมุตฺตมํ;
พุทฺธสฺส อภิโรเปสิํ, สิขิโน โลกพนฺธุโนฯ
[64]
‘‘อิมาย ปุปฺผปูชาย, เจตนาปณิธีหิ จ;
ทุคฺคติํ นาภิชานามิ, พุทฺธปูชายิทํ ผลํฯ
[65]
‘‘เอกตฺติํเส อิโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ [ปุปฺผปูชายิทํ (สี.)] ผลํฯ
[66]
‘‘ฉพฺพีสติมฺหิ กปฺปมฺหิ, จตฺตาโรสุํ มหายสา;
สตฺตรตนสมฺปนฺนา, ราชาโน จกฺกวตฺติโนฯ
[67]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สุมโน เถโร อิมา คาถาโย อภาสิตฺถาติฯ
สุมนตฺเถรสฺสาปทานํ นวมํฯ
10. ปุปฺผจงฺโกฏิยตฺเถรอปทานํ
[68]
‘‘อภีตรูปํ สีหํว, ครุฬคฺคํว ปกฺขินํ;
พฺยคฺฆูสภํว ปวรํ, อภิชาตํว เกสริํฯ
[69]
‘‘สิขิํ ติโลกสรณํ, อเนชํ อปราชิตํ;
นิสินฺนํ สมณานคฺคํ, ภิกฺขุสงฺฆปุรกฺขตํฯ
[70]
‘‘จงฺโกฏเก [จงฺโคฏเก (สี.)] ฐเปตฺวาน, อโนชํ ปุปฺผมุตฺตมํ;
สห จงฺโกฏเกเนว, พุทฺธเสฏฺฐํ สโมกิริํฯ
[71]
‘‘เตน จิตฺตปฺปสาเทน, ทฺวิปทินฺท นราสภ;
ปตฺโตมฺหิ อจลํ ฐานํ, หิตฺวา ชยปราชยํฯ
[72]
‘‘เอกตฺติํเส อิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, พุทฺธปูชายิทํ ผลํฯ
[73]