‘‘เอเตน มํสทาเนน, จิตฺตสฺส ปณิธีหิ จ;

ปนฺนรเส กปฺปสเต, เทวโลเก รมิํ อหํฯ

[42]

‘‘อวเสเสสุ กปฺเปสุ, กุสลํ จินฺติตํ [นิจิตํ (สี.), กริตํ (สฺยา.)] มยา;

เตเนว มํสทาเนน, พุทฺธานุสฺสรเณน จฯ

[43]

‘‘อฏฺฐตฺติํสมฺหิ กปฺปมฺหิ, อฏฺฐ ทีฆายุนามกา;

สฏฺฐิมฺหิโต กปฺปสเต, ทุเว วรุณนามกา [สรณนามกา (สฺยา.)]ฯ

[44]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สุจินฺติโต เถโร อิมา คาถาโย อภาสิตฺถาติฯ

สุจินฺติตตฺเถรสฺสาปทานํ ฉฏฺฐํฯ

7. วตฺถทายกตฺเถรอปทานํ

[45]

‘‘ปกฺขิชาโต ตทา อาสิํ, สุปณฺโณ ครุฬาธิโป;

อทฺทสํ วิรชํ พุทฺธํ, คจฺฉนฺตํ คนฺธมาทนํฯ

[46]

‘‘ชหิตฺวา ครุฬวณฺณํ, มาณวกํ อธารยิํ;

เอกํ วตฺถํ มยา ทินฺนํ, ทฺวิปทินฺทสฺส ตาทิโนฯ

[47]

‘‘ตญฺจ ทุสฺสํ ปฏิคฺคยฺห, พุทฺโธ โลกคฺคนายโก;

อนฺตลิกฺเข ฐิโต สตฺถา, อิมา คาถา อภาสถฯ

[48]

‘‘‘อิมินา วตฺถทาเนน, จิตฺตสฺส ปณิธีหิ จ;

ปหาย ครุฬํ โยนิํ, เทวโลเก รมิสฺสติ’ฯ

[49]

‘‘อตฺถทสฺสี ตุ ภควา, โลกเชฏฺโฐ นราสโภ;

วตฺถทานํ ปสํสิตฺวา, ปกฺกามิ อุตฺตรามุโขฯ

[50]

‘‘ภเว นิพฺพตฺตมานมฺหิ, โหนฺติ เม วตฺถสมฺปทา;

อากาเส ฉทนํ โหติ, วตฺถทานสฺสิทํ ผลํฯ

[51]

‘‘อรุณวา [อรุณกา (สี.), อรุณสา (สฺยา.)] สตฺต ชนา, จกฺกวตฺตี มหพฺพลา;

ฉตฺติํสติมฺหิ อาสิํสุ, กปฺปมฺหิ มนุชาธิปาฯ

[52]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา วตฺถทายโก เถโร อิมา คาถาโย อภาสิตฺถาติฯ

วตฺถทายกตฺเถรสฺสาปทานํ สตฺตมํฯ

8. อมฺพทายกตฺเถรอปทานํ

[53]

‘‘อโนมทสฺสี ภควา, นิสินฺโน ปพฺพตนฺตเร;

เมตฺตาย อผริ โลเก, อปฺปมาเณ นิรูปธิฯ

[54]

‘‘กปิ อหํ ตทา อาสิํ, หิมวนฺเต นคุตฺตเม;

ทิสฺวา อโนมทสฺสิํ ตํ [อโนมํ อมิตํ (สี.), อโนมมธิตํ (สฺยา.)], พุทฺเธ จิตฺตํ ปสาทยิํฯ

[55]

‘‘อวิทูเร หิมวนฺตสฺส, อมฺพาสุํ ผลิโน ตทา;

ตโต ปกฺกํ คเหตฺวาน, อมฺพํ สมธุกํ อทํฯ

[56]

‘‘ตํ เม พุทฺโธ วิยากาสิ, อโนมทสฺสี มหามุนิ;

อิมินา มธุทาเนน, อมฺพทาเนน จูภยํฯ

[57]

‘‘สตฺตปญฺญาสกปฺปมฺหิ, เทวโลเก รมิสฺสติ;

อวเสเสสุ กปฺเปสุ, โวกิณฺณํ สํสริสฺสติฯ

[58]

‘‘เขเปตฺวา ปาปกํ กมฺมํ, ปริปกฺกาย พุทฺธิยา;

วินิปาตมคนฺตฺวาน, กิเลเส ฌาปยิสฺสติฯ

[59]

‘‘ทเมน อุตฺตเมนาหํ, ทมิโตมฺหิ มเหสินา;

ปตฺโตมฺหิ อจลํ ฐานํ, หิตฺวา ชยปราชยํฯ

[60]

‘‘สตฺตสตฺตติกปฺปสเต, อมฺพฏฺฐชสนามกา;

จตุทฺทส เต ราชาโน, จกฺกวตฺตี มหพฺพลาฯ

[61]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อมฺพทายโก เถโร อิมา คาถาโย อภาสิตฺถาติฯ

อมฺพทายกตฺเถรสฺสาปทานํ อฏฺฐมํฯ