เมนู

4. ปรปฺปสาทกตฺเถรอปทานํ

[20]

‘‘อุสภํ ปวรํ วีรํ, มเหสิํ วิชิตาวินํ;

สุวณฺณวณฺณํ สมฺพุทฺธํ, โก ทิสฺวา นปฺปสีทติฯ

[21]

‘‘หิมวาวาปริเมยฺโย, สาคโรว ทุรุตฺตโร;

ตเถว ฌานํ พุทฺธสฺส, โก ทิสฺวา นปฺปสีทติฯ

[22]

‘‘วสุธา ยถาปฺปเมยฺยา, จิตฺตา วนวฏํสกา;

ตเถว สีลํ พุทฺธสฺส, โก ทิสฺวา นปฺปสีทติฯ

[23]

‘‘อนิลญฺชสาสงฺขุพฺโภ [อนิลโชว อสงฺโขโภ (สี.)], ยถากาโส อสงฺขิโย;

ตเถว ญาณํ พุทฺธสฺส, โก ทิสฺวา นปฺปสีทติฯ

[24]

‘‘อิมาหิ จตุคาถาหิ, พฺราหฺมโณ เสนสวฺหโย;

พุทฺธเสฏฺฐํ ถวิตฺวาน, สิทฺธตฺถํ อปราชิตํฯ

[25]

‘‘จตุนฺนวุติกปฺปานิ, ทุคฺคติํ นุปปชฺชถ;

สุคติํ สุขสมฺปตฺติํ [สุคตีสุ สุสุมฺปตฺติํ (สี. สฺยา.)], อนุโภสิมนปฺปกํฯ

[26]

‘‘จตุนฺนวุติโต กปฺเป, ถวิตฺวา โลกนายกํ;

ทุคฺคติํ นาภิชานามิ, โถมนาย [โถมนสฺส (สฺยา.)] อิทํ ผลํฯ

[27]

‘‘จาตุทฺทสมฺหิ กปฺปมฺหิ, จตุโร อาสุมุคฺคตา;

สตฺตรตนสมฺปนฺนา, จกฺกวตฺตี มหพฺพลาฯ

[28]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปรปฺปสาทโก เถโร อิมา คาถาโย อภาสิตฺถาติฯ

ปรปฺปสาทกตฺเถรสฺสาปทานํ จตุตฺถํฯ

5. ภิสทายกตฺเถรอปทานํ

[29]

‘‘เวสฺสภู นาม นาเมน, อิสีนํ ตติโย อหุ;

กานนํ วนโมคยฺห, วิหาสิ ปุริสุตฺตโมฯ

[30]

‘‘ภิสมุฬาลํ คณฺหิตฺวา, อคมํ พุทฺธสนฺติกํ;

ตญฺจ พุทฺธสฺส ปาทาสิํ, ปสนฺโน เสหิ ปาณิภิฯ

[31]

‘‘กเรน จ ปรามฏฺโฐ, เวสฺสภูวรพุทฺธินา;

สุขาหํ นาภิชานามิ, สมํ เตน กุโตตฺตริํฯ

[32]

‘‘จริโม วตฺตเต มยฺหํ, ภวา สพฺเพ สมูหตา;

หตฺถินาเคน สนฺเตน, กุสลํ โรปิตํ มยา [นาโคว พนฺธนํ เฉตฺวา, วิหรามิ อนาสโว (สฺยา.)]

[33]

‘‘เอกตฺติํเส อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, ภิสทานสฺสิทํ ผลํฯ

[34]

‘‘สโมธานา จ ราชาโน, โสฬส มนุชาธิปา;

กปฺปมฺหิ จุทฺทเส [เตรเส (สี. สฺยา.)] อาสุํ, จกฺกวตฺตี มหพฺพลาฯ

[35]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ภิสทายโก เถโร อิมา คาถาโย อภาสิตฺถาติฯ

ภิสทายกตฺเถรสฺสาปทานํ ปญฺจมํฯ

6. สุจินฺติตตฺเถรอปทานํ

[36]

‘‘คิริทุคฺคจโร อาสิํ, อภิชาโตว เกสรี;

มิคสงฺฆํ วธิตฺวาน, ชีวามิ ปพฺพตนฺตเรฯ

[37]

‘‘อตฺถทสฺสี ตุ ภควา, สพฺพญฺญู วทตํ วโร;

มมุทฺธริตุกาโม โส, อาคจฺฉิ ปพฺพตุตฺตมํฯ

[38]

‘‘ปสทญฺจ มิคํ หนฺตฺวา, ภกฺขิตุํ สมุปาคมิํ;

ภควา ตมฺหิ สมเย, ภิกฺขมาโน [สิกฺขาจาโร (สฺยา.)] อุปาคมิฯ

[39]

‘‘วรมํสานิ ปคฺคยฺห, อทาสิํ ตสฺส สตฺถุโน;

อนุโมทิ มหาวีโร, นิพฺพาเปนฺโต มมํ ตทาฯ

[40]

‘‘เตน จิตฺตปฺปสาเทน, คิริทุคฺคํ ปวิสิํ อหํ;

ปีติํ อุปฺปาทยิตฺวาน, ตตฺถ กาลงฺกโต อหํฯ

[41]