เมนู

1. สกจินฺตนิยตฺเถรอปทานํ

[1]

‘‘ปวนํ กานนํ ทิสฺวา, อปฺปสทฺทมนฺนาวิลํ;

อิสีนํ อนุจิณฺณํว, อาหุตีนํ ปฏิคฺคหํฯ

[2]

‘‘ถูปํ กตฺวาน ปุลินํ [เวฬุนา (อฏฺฐ.), เวฬินํ (สฺยา.)], นานาปุปฺผํ สโมกิริํ;

สมฺมุขา วิย สมฺพุทฺธํ, นิมฺมิตํ อภิวนฺทหํฯ

[3]

‘‘สตฺตรตนสมฺปนฺโน , ราชา รฏฺฐมฺหิ อิสฺสโร;

สกกมฺมาภิรทฺโธหํ, ปุปฺผปูชายิทํ [ถูปปูชายิทํ (สี.)] ผลํฯ

[4]

‘‘เอกนวุติโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, ปุปฺผปูชายิทํ [ถูปปูชายิทํ (สี.)] ผลํฯ

[5]

‘‘อสีติกปฺเปนนฺตยโส, จกฺกวตฺตี อโหสหํ;

สตฺตรตนสมฺปนฺโน, จตุทีปมฺหิ อิสฺสโรฯ

[6]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา สกจินฺตนิโย เถโร อิมา คาถาโย อภาสิตฺถาติฯ

สกจินฺตนิยตฺเถรสฺสาปทานํ ปฐมํฯ

2. อโวปุปฺผิยตฺเถรอปทานํ

[7]

‘‘วิหารา อภินิกฺขมฺม, อพฺภุฏฺฐหิย [อพฺภุฏฺฐาสิ จ (สฺยา. ก.)] จงฺกเม;

จตุสจฺจํ ปกาสนฺโต, เทเสติ [เทเสนฺโต (สฺยา. ก.)] อมตํ ปทํฯ

[8]

‘‘สิขิสฺส คิรมญฺญาย, พุทฺธเสฏฺฐสฺส ตาทิโน;

นานาปุปฺผํ คเหตฺวาน, อากาสมฺหิ สโมกิริํฯ

[9]

‘‘เตน กมฺเมน ทฺวิปทินฺท, โลกเชฏฺฐ นราสภ;

ปตฺโตมฺหิ อจลํ ฐานํ, หิตฺวา ชยปราชยํฯ

[10]

‘‘เอกตฺติํเส อิโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, ปุปฺผปูชายิทํ ผลํฯ

[11]

‘‘อิโต วีสติกปฺปมฺหิ, สุเมโธ นาม ขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[12]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อโวปุปฺผิโย เถโร อิมา คาถาโย อภาสิตฺถาติฯ

อโวปุปฺผิยตฺเถรสฺสาปทานํ ทุติยํฯ

3. ปจฺจาคมนิยตฺเถรอปทานํ

[13]

‘‘สินฺธุยา นทิยา ตีเร, จกฺกวาโก อหํ ตทา;

สุทฺธเสวาลภกฺโขหํ, ปาเปสุ จ สุสญฺญโตฯ

[14]

‘‘อทฺทสํ วิรชํ พุทฺธํ, คจฺฉนฺตํ อนิลญฺชเส;

ตุณฺเฑน สาลํ ปคฺคยฺห, วิปสฺสิสฺสาภิโรปยิํฯ

[15]

‘‘ยสฺส สทฺธา ตถาคเต, อจลา สุปติฏฺฐิตา;

เตน จิตฺตปฺปสาเทน, ทุคฺคติํ โส น คจฺฉติฯ

[16]

‘‘สฺวาคตํ วต เม อาสิ, พุทฺธเสฏฺฐสฺส สนฺติเก;

วิหงฺคเมน สนฺเตน, สุพีชํ โรปิตํ มยาฯ

[17]

‘‘เอกนวุติโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, พุทฺธปูชายิทํ [ปุปฺผปูชายิทํ (สี.)] ผลํฯ

[18]

‘‘สุจารุทสฺสนา นาม, อฏฺเฐเต เอกนามกา;

กปฺเป สตฺตรเส อาสุํ, จกฺกวตฺตี มหพฺพลาฯ

[19]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปจฺจาคมนิโย เถโร อิมา คาถาโย อภาสิตฺถาติฯ

ปจฺจาคมนิยตฺเถรสฺสาปทานํ ตติยํฯ