‘‘‘เยนายํ โรปิตา โพธิ, พุทฺธปูชา จ สกฺกตา;

ตมหํ กิตฺตยิสฺสามิ, สุณาถ มม ภาสโตฯ

[84]

‘‘‘ติํสกปฺปานิ เทเวสุ, เทวรชฺชํ กริสฺสติ;

จตุสฏฺฐิ จกฺขตฺตุํ โส, จกฺกวตฺตี ภวิสฺสติฯ

[85]

‘‘‘ตุสิตา หิ จวิตฺวาน, สุกฺกมูเลน โจทิโต;

ทฺเว สมฺปตฺตี อนุโภตฺวา, มนุสฺสตฺเต รมิสฺสติฯ

[86]

‘‘‘ปธานปหิตตฺโต โส, อุปสนฺโต นิรูปธิ;

สพฺพาสเว ปริญฺญาย, นิพฺพายิสฺสตินาสโว’ฯ

[87]

‘‘วิเวกมนุยุตฺโตหํ , อุปสนฺโต นิรูปธิ;

นาโคว พนฺธนํ เฉตฺวา, วิหรามิ อนาสโวฯ

[88]

‘‘ทฺเวนวุเต อิโต กปฺเป, โพธิํ โรเปสหํ ตทา;

ทุคฺคติํ นาภิชานามิ, โพธิโรปสฺสิทํ ผลํฯ

[89]

‘‘จตุสตฺตติโต กปฺเป, ทณฺฑเสโนติ วิสฺสุโต;

สตฺตรตนสมฺปนฺโน, จกฺกวตฺตี ตทา อหุํฯ

[90]

‘‘เตสตฺตติมฺหิโต กปฺเป, สตฺตาเหสุํ มหีปตี;

สมนฺตเนมินาเมน, ราชาโน จกฺกวตฺติโนฯ

[91]

‘‘ปณฺณวีสติโต กปฺเป, ปุณฺณโก นาม ขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[92]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อสนโพธิโย เถโร อิมา คาถาโย อภาสิตฺถาติฯ

อสนโพธิยตฺเถรสฺสาปทานํ ทสมํฯ

พีชนิวคฺโค ฉฏฺโฐฯ

ตสฺสุทฺทานํ –

พีชนี สตรํสี จ, สยโนทกิวาหิโย;

ปริวาโร ปทีปญฺจ, ธโช ปทุมปูชโก;

โพธิ จ ทสโม วุตฺโต, คาถา ทฺเวนวุติ ตถาฯ

7. สกจินฺตนิยวคฺโค

1. สกจินฺตนิยตฺเถรอปทานํ

[1]

‘‘ปวนํ กานนํ ทิสฺวา, อปฺปสทฺทมนฺนาวิลํ;

อิสีนํ อนุจิณฺณํว, อาหุตีนํ ปฏิคฺคหํฯ

[2]

‘‘ถูปํ กตฺวาน ปุลินํ [เวฬุนา (อฏฺฐ.), เวฬินํ (สฺยา.)], นานาปุปฺผํ สโมกิริํ;

สมฺมุขา วิย สมฺพุทฺธํ, นิมฺมิตํ อภิวนฺทหํฯ

[3]

‘‘สตฺตรตนสมฺปนฺโน , ราชา รฏฺฐมฺหิ อิสฺสโร;

สกกมฺมาภิรทฺโธหํ, ปุปฺผปูชายิทํ [ถูปปูชายิทํ (สี.)] ผลํฯ

[4]

‘‘เอกนวุติโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, ปุปฺผปูชายิทํ [ถูปปูชายิทํ (สี.)] ผลํฯ

[5]

‘‘อสีติกปฺเปนนฺตยโส, จกฺกวตฺตี อโหสหํ;

สตฺตรตนสมฺปนฺโน, จตุทีปมฺหิ อิสฺสโรฯ

[6]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา สกจินฺตนิโย เถโร อิมา คาถาโย อภาสิตฺถาติฯ

สกจินฺตนิยตฺเถรสฺสาปทานํ ปฐมํฯ

2. อโวปุปฺผิยตฺเถรอปทานํ

[7]

‘‘วิหารา อภินิกฺขมฺม, อพฺภุฏฺฐหิย [อพฺภุฏฺฐาสิ จ (สฺยา. ก.)] จงฺกเม;

จตุสจฺจํ ปกาสนฺโต, เทเสติ [เทเสนฺโต (สฺยา. ก.)] อมตํ ปทํฯ

[8]

‘‘สิขิสฺส คิรมญฺญาย, พุทฺธเสฏฺฐสฺส ตาทิโน;

นานาปุปฺผํ คเหตฺวาน, อากาสมฺหิ สโมกิริํฯ

[9]

‘‘เตน กมฺเมน ทฺวิปทินฺท, โลกเชฏฺฐ นราสภ;

ปตฺโตมฺหิ อจลํ ฐานํ, หิตฺวา ชยปราชยํฯ

[10]