เมนู

‘‘‘เอส พุทฺโธ มหาวีโร, วรธมฺมปฺปกาสโก;

ชลติ อคฺคิขนฺโธว, ภิกฺขุสงฺฆปุรกฺขโตฯ

[11]

‘‘‘มหาสมุทฺโทว‘กฺขุพฺโภ [’กฺโขโภ (สี. สฺยา.)], อณฺณโวว ทุรุตฺตโร;

มิคราชาวสมฺภีโต [ฉมฺภิโต (ก.)], ธมฺมํ เทเสติ จกฺขุมา’ฯ

[12]

‘‘มม สงฺกปฺปมญฺญาย, ปทุมุตฺตรนายโก;

ภิกฺขุสงฺเฆ ฐิโต สตฺถา, อิมา คาถา อภาสถฯ

[13]

‘‘‘เยนายํ [เยนาหํ (ก.)] อญฺชลี ทินฺโน, พุทฺธเสฏฺโฐ จ โถมิโต;

ติํสกปฺปสหสฺสานิ, เทวรชฺชํ กริสฺสติฯ

[14]

‘‘‘กปฺปสตสหสฺสมฺหิ, องฺคีรสสนามโก;

วิวฏฺฏจฺฉโท [วิวตฺถจฺฉทฺโท (สี.)] สมฺพุทฺโธ, อุปฺปชฺชิสฺสติ ตาวเทฯ

[15]

‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;

สตรํสีติ นาเมน, อรหา โส ภวิสฺสติ’ฯ

[16]

‘‘ชาติยา สตฺตวสฺโสหํ, ปพฺพชิํ อนคาริยํ;

สตรํสิมฺหิ นาเมน, ปภา นิทฺธาวเต มมฯ

[17]

‘‘มณฺฑเป รุกฺขมูเล วา, ฌายี ฌานรโต อหํ;

ธาเรมิ อนฺติมํ เทหํ, สมฺมาสมฺพุทฺธสาสเนฯ

[18]

‘‘สฏฺฐิกปฺปสหสฺสมฺหิ, จตุโร รามนามกา;

สตฺตรตนสมฺปนฺนา, จกฺกวตฺตี มหพฺพลาฯ

[19]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สตรํสิ เถโร อิมา คาถาโย อภาสิตฺถาติฯ

สตรํสิตฺเถรสฺสาปทานํ ทุติยํฯ

3. สยนทายกตฺเถรอปทานํ

[20]

‘‘ปทุมุตฺตรพุทฺธสฺส, สพฺพโลกานุกมฺปิโน;

สยนํ ตสฺส ปาทาสิํ, วิปฺปสนฺเนน เจตสาฯ

[21]

‘‘เตน สยนทาเนน, สุเขตฺเต พีชสมฺปทา;

โภคา นิพฺพตฺตเร ตสฺส, สยนสฺส อิทํ ผลํฯ

[22]

‘‘อากาเส เสยฺยํ กปฺเปมิ, ธาเรมิ ปถวิํ อิมํ;

ปาเณสุ เม อิสฺสริยํ, สยนสฺส อิทํ ผลํฯ

[23]

‘‘ปญฺจกปฺปสหสฺสมฺหิ, อฏฺฐ อาสุํ มหาเตชา [มหาวรา (สี.), มหาวีรา (สฺยา.)];

จตุตฺติํเส กปฺปสเต, จตุโร จ มหพฺพลาฯ

[24]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สยนทายโก เถโร อิมา คาถาโย อภาสิตฺถาติฯ

สยนทายกตฺเถรสฺสาปทานํ ตติยํฯ

4. คนฺโธทกิยตฺเถรอปทานํ

[25]

‘‘ปทุมุตฺตรพุทฺธสฺส , มหาโพธิมโห อหุ;

วิจิตฺตํ ฆฏมาทาย, คนฺโธทกมทาสหํฯ

[26]

‘‘นฺหานกาเล จ โพธิยา, มหาเมโฆ ปวสฺสถ;

นินฺนาโท จ มหา อาสิ, อสนิยา ผลนฺติยาฯ

[27]

‘‘เตเนวาสนิเวเคน, ตตฺถ กาลงฺกโต [กาลกโต (สี. สฺยา.)] อหํ [อหุํ (สี.)];

เทวโลเก ฐิโต สนฺโต, อิมา คาถา อภาสหํฯ

[28]

‘‘‘อโห พุทฺโธ อโห ธมฺโม, อโห โน สตฺถุสมฺปทา;

กเฬวรํ [กเลพรํ (สี.)] เม ปติตํ, เทวโลเก รมามหํฯ

[29]

‘‘‘อุพฺพิทฺธํ ภวนํ มยฺหํ, สตภูมํ สมุคฺคตํ;

กญฺญาสตสหสฺสานิ, ปริวาเรนฺติ มํ สทาฯ

[30]

‘‘‘อาพาธา เม น วิชฺชนฺติ, โสโก มยฺหํ น วิชฺชติ;

ปริฬาหํ น ปสฺสามิ, ปุญฺญกมฺมสฺสิทํ ผลํฯ

[31]

‘‘‘อฏฺฐวีเส กปฺปสเต, ราชา สํวสิโต อหุํ;

สตฺตรตนสมฺปนฺโน, จกฺกวตฺตี มหพฺพโล’ฯ

[32]