เมนู

‘‘‘วินิปาตํ อคนฺตฺวาน, มนุสฺสตฺตํ คมิสฺสติ;

หิรญฺญํ ตสฺส [หิรญฺญสฺส จ (สี. ก.)] นิจิตํ, โกฏิสตมนปฺปกํฯ

[136]

‘‘‘นิพฺพตฺติสฺสติ โยนิมฺหิ, พฺราหฺมเณ โส ภวิสฺสติ;

วงฺคนฺตสฺส สุโต ธีมา, สาริยา โอรโส ปิโยฯ

[137]

‘‘‘โส จ ปจฺฉา ปพฺพชิตฺวา, องฺคีรสสฺส สาสเน;

จูฬจุนฺโทติ [จูลจุนฺโทติ (สี.)] นาเมน, เหสฺสติ สตฺถุ สาวโกฯ

[138]

‘‘‘สามเณโรว โส สนฺโต, ขีณาสโว ภวิสฺสติ;

สพฺพาสเว ปริญฺญาย, นิพฺพายิสฺสตินาสโว’ฯ

[139]

‘‘อุปฏฺฐหิํ มหาวีรํ, อญฺเญ จ เปสเล พหู;

ภาตรํ เม จุปฏฺฐาสิํ, อุตฺตมตฺถสฺส ปตฺติยาฯ

[140]

‘‘ภาตรํ เม อุปฏฺฐิตฺวา, ธาตุํ ปตฺตมฺหิ โอหิย [โอปิย (สี.), โอจิย (สฺยา.)];

สมฺพุทฺธํ อุปนาเมสิํ, โลกเชฏฺฐํ นราสภํฯ

[141]

‘‘อุโภ หตฺเถหิ ปคฺคยฺห, พุทฺโธ โลเก สเทวเก;

สนฺทสฺสยนฺโต ตํ ธาตุํ, กิตฺตยิ อคฺคสาวกํฯ

[142]

‘‘จิตฺตญฺจ สุวิมุตฺตํ เม, สทฺธา มยฺหํ ปติฏฺฐิตา;

สพฺพาสเว ปริญฺญาย, วิหรามิ อนาสโวฯ

[143]

‘‘ปฏิสมฺภิทานุปฺปตฺตา, วิโมกฺขาปิ จ ผสฺสิตา [ปฏิสมฺภิทา จตสฺโส, วิโมกฺขาปิ จ อฏฺฐิเม (สฺยา.)];

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา จุนฺโท เถโร อิมา คาถาโย อภาสิตฺถาติฯ

จุนฺทตฺเถรสฺสาปทานํ ทสมํฯ

อุปาลิวคฺโค ปญฺจโมฯ

ตสฺสุทฺทานํ –

อุปาลิ โสโณ ภทฺทิโย, สนฺนิฏฺฐาปกหตฺถิโย;

ฉทนํ เสยฺยจงฺกมํ, สุภทฺโท จุนฺทสวฺหโย;

คาถาสตํ สตาลีสํ [จ ตาลีสํ (สี. สฺยา.)], จตสฺโส จ ตทุตฺตริฯ

6. พีชนิวคฺโค

1. วิธูปนทายกตฺเถรอปทานํ

[1]

‘‘ปทุมุตฺตรพุทฺธสฺส , โลกเชฏฺฐสฺส ตาทิโน;

พีชนิกา [วีชนิกา (สี. สฺยา.)] มยา ทินฺนา, ทฺวิปทินฺทสฺส ตาทิโนฯ

[2]

‘‘สกํ จิตฺตํ ปสาเทตฺวา, ปคฺคเหตฺวาน อญฺชลิํ;

สมฺพุทฺธมภิวาเทตฺวา, ปกฺกมิํ อุตฺตรามุโขฯ

[3]

‘‘พีชนิํ ปคฺคเหตฺวาน, สตฺถา โลกคฺคนายโก [โลเก อนุตฺตโร (สี.)];

ภิกฺขุสงฺเฆ ฐิโต สนฺโต, อิมา คาถา อภาสถฯ

[4]

‘‘‘อิมินา พีชนิทาเนน, จิตฺตสฺส ปณิธีหิ [เจตนาปณิธีหิ (อญฺญตฺถ)] จ;

กปฺปานํ สตสหสฺสํ, วินิปาตํ น คจฺฉติ’ฯ

[5]

‘‘อารทฺธวีริโย ปหิตตฺโต, เจโตคุณสมาหิโต;

ชาติยา สตฺตวสฺโสหํ, อรหตฺตํ อปาปุณิํฯ

[6]

‘‘สฏฺฐิกปฺปสหสฺสมฺหิ, พีชมานสนามกา;

โสฬสาสิํสุ ราชาโน, จกฺกวตฺตี มหพฺพลาฯ

[7]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา วิธูปนทายโก เถโร อิมา คาถาโย อภาสิตฺถาติฯ

วิธูปนทายกตฺเถรสฺสาปทานํ ปฐมํฯ

2. สตรํสิตฺเถรอปทานํ

[8]

‘‘อุพฺพิทฺธํ เสลมารุยฺห, นิสีทิ ปุริสุตฺตโม;

ปพฺพตสฺสาวิทูรมฺหิ, พฺราหฺมโณ มนฺตปารคูฯ

[9]

‘‘อุปวิฏฺฐํ มหาวีรํ, เทวเทวํ นราสภํ;

อญฺชลิํ ปคฺคเหตฺวาน, สนฺถวิํ โลกนายกํฯ

[10]