‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา จงฺกมนทายโก เถโร อิมา คาถาโย อภาสิตฺถาติฯ

จงฺกมนทายกตฺเถรสฺสาปทานํ อฏฺฐมํฯ

9. สุภทฺทตฺเถรอปทานํ

[101]

‘‘ปทุมุตฺตโร โลกวิทู, อาหุตีนํ ปฏิคฺคโห;

ชนตํ อุทฺธริตฺวาน, นิพฺพายติ มหายโสฯ

[102]

‘‘นิพฺพายนฺเต จ สมฺพุทฺเธ, ทสสหสฺสิ กมฺปถ;

ชนกาโย มหา อาสิ, เทวา สนฺนิปตุํ ตทาฯ

[103]

‘‘จนฺทนํ ปูรยิตฺวาน, ตครามลฺลิกาหิ จ;

หฏฺโฐ หฏฺเฐน จิตฺเตน, อาโรปยิํ [อาเลเปสิํ (สี.), อาโรเปสิํ (สฺยา.)] นรุตฺตมํฯ

[104]

‘‘มม สงฺกปฺปมญฺญาย, สตฺถา โลเก อนุตฺตโร;

นิปนฺนโกว สมฺพุทฺโธ, อิมา คาถา อภาสถฯ

[105]

‘‘‘โย เม ปจฺฉิมเก กาเล, คนฺธมาเลน [คนฺธมลฺเลน (สฺยา. ก.) นปุํสเกกตฺตํ มนสิกาตพฺพํ] ฉาทยิ;

ตมหํ กิตฺตยิสฺสามิ, สุณาถ มม ภาสโตฯ

[106]

‘‘‘อิโต จุโต อยํ โปโส, ตุสิตกายํ คมิสฺสติ;

ตตฺถ รชฺชํ กริตฺวาน, นิมฺมานํ โส คมิสฺสติฯ

[107]

‘‘‘เอเตเนว อุปาเยน, ทตฺวา มาลํ [มลฺยํ (สี.), มลฺลํ (สฺยา. ก.)] วรุตฺตมํ;

สกกมฺมาภิรทฺโธ โส, สมฺปตฺติํ อนุโภสฺสติฯ

[108]

‘‘‘ปุนาปิ ตุสิเต กาเย, นิพฺพตฺติสฺสติยํ นโร;

ตมฺหา กายา จวิตฺวาน, มนุสฺสตฺตํ คมิสฺสติฯ

[109]

‘‘‘สกฺยปุตฺโต มหานาโค, อคฺโค โลเก สเทวเก;

โพธยิตฺวา พหู สตฺเต, นิพฺพายิสฺสติ จกฺขุมาฯ

[110]

‘‘‘ตทา โสปคโต สนฺโต, สุกฺกมูเลน โจทิโต;

อุปสงฺกมฺม สมฺพุทฺธํ, ปญฺหํ ปุจฺฉิสฺสติ ตทาฯ

[111]

‘‘‘หาสยิตฺวาน สมฺพุทฺโธ, สพฺพญฺญู โลกนายโก;

ปุญฺญกมฺมํ ปริญฺญาย, สจฺจานิ วิวริสฺสติฯ

[112]

‘‘‘อารทฺโธ จ อยํ ปญฺโห, ตุฏฺโฐ เอกคฺคมานโส;

สตฺถารํ อภิวาเทตฺวา, ปพฺพชฺชํ ยาจยิสฺสติฯ

[113]

‘‘‘ปสนฺนมานสํ ทิสฺวา, สกกมฺเมน โตสิตํ;

ปพฺพาเชสฺสติ โส พุทฺโธ, อคฺคมคฺคสฺส โกวิโทฯ

[114]

‘‘‘วายมิตฺวานยํ โปโส, สมฺมาสมฺพุทฺธสาสเน;

สพฺพาสเว ปริญฺญาย, นิพฺพายิสฺสตินาสโว’ฯ

ปญฺจมภาณวารํฯ

[115]

‘‘ปุพฺพกมฺเมน สํยุตฺโต, เอกคฺโค สุสมาหิโต;

พุทฺธสฺส โอรโส ปุตฺโต, ธมฺมโชมฺหิ สุนิมฺมิโตฯ

[116]

‘‘ธมฺมราชํ อุปคมฺม, อปุจฺฉิํ ปญฺหมุตฺตมํ;

กถยนฺโต จ เม ปญฺหํ, ธมฺมโสตํ อุปานยิฯ

[117]

‘‘ตสฺสาหํ ธมฺมมญฺญาย, วิหาสิํ สาสเน รโต;

สพฺพาสเว ปริญฺญาย, วิหรามิ อนาสโวฯ

[118]

‘‘สตสหสฺสิโต กปฺเป, ชลชุตฺตมนายโก;

นิพฺพายิ อนุปาทาโน, ทีโปว เตลสงฺขยาฯ

[119]

‘‘สตฺตโยชนิกํ อาสิ, ถูปญฺจ รตนามยํ;

ธชํ ตตฺถ อปูเชสิํ, สพฺพภทฺทํ มโนรมํฯ

[120]

‘‘กสฺสปสฺส จ พุทฺธสฺส, ติสฺโส นามคฺคสาวโก;

ปุตฺโต เม โอรโส อาสิ, ทายาโท ชินสาสเนฯ

[121]

‘‘ตสฺส หีเนน มนสา, วาจํ ภาสิํ อภทฺทกํ;

เตน กมฺมวิปาเกน, ปจฺฉา เม อาสิ ภทฺทกํ [ปจฺฉิเม อทฺทสํ ชินํ (สี.)]ฯ

[122]

‘‘อุปวตฺตเน สาลวเน, ปจฺฉิเม สยเน มุนิ;

ปพฺพาเชสิ มหาวีโร, หิโต การุณิโก ชิโนฯ

[123]

‘‘อชฺเชว ทานิ ปพฺพชฺชา, อชฺเชว อุปสมฺปทา;

อชฺเชว ปรินิพฺพานํ, สมฺมุขา ทฺวิปทุตฺตเมฯ

[124]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สุภทฺโท เถโร อิมา คาถาโย อภาสิตฺถาติฯ

สุภทฺทตฺเถรสฺสาปทานํ นวมํฯ

10. จุนฺทตฺเถรอปทานํ

[125]

‘‘สิทฺธตฺถสฺส ภควโต, โลกเชฏฺฐสฺส ตาทิโน;

อคฺฆิยํ การยิตฺวาน, ชาติปุปฺเผหิ ฉาทยิํฯ

[126]

‘‘นิฏฺฐาเปตฺวาน ตํ ปุปฺผํ, พุทฺธสฺส อุปนามยิํ;

ปุปฺผาวเสสํ ปคฺคยฺห, พุทฺธสฺส อภิโรปยิํฯ

[127]

‘‘กญฺจนคฺฆิยสงฺกาสํ , พุทฺธํ โลกคฺคนายกํ;

ปสนฺนจิตฺโต สุมโน, ปุปฺผคฺฆิยมุปานยิํฯ

[128]

‘‘วิติณฺณกงฺโข สมฺพุทฺโธ, ติณฺโณเฆหิ ปุรกฺขโต;

ภิกฺขุสงฺเฆ นิสีทิตฺวา, อิมา คาถา อภาสถฯ

[129]

‘‘‘ทิพฺพคนฺธํ ปวายนฺตํ, โย เม ปุปฺผคฺฆิยํ อทา;

ตมหํ กิตฺตยิสฺสามิ, สุณาถ มม ภาสโตฯ

[130]

‘‘‘อิโต จุโต อยํ โปโส, เทวสงฺฆปุรกฺขโต;

ชาติปุปฺเผหิ ปริกิณฺโณ, เทวโลกํ คมิสฺสติฯ

[131]

‘‘‘อุพฺพิทฺธํ ภวนํ ตสฺส, โสวณฺณญฺจ มณีมยํ;

พฺยมฺหํ ปาตุภวิสฺสติ, ปุญฺญกมฺมปฺปภาวิตํฯ

[132]

‘‘‘จตุสตฺตติกฺขตฺตุํ โส, เทวรชฺชํ กริสฺสติ;

อนุโภสฺสติ สมฺปตฺติํ, อจฺฉราหิ ปุรกฺขโตฯ

[133]

‘‘‘ปถพฺยา รชฺชํ ติสตํ, วสุธํ อาวสิสฺสติ;

ปญฺจสตฺตติกฺขตฺตุญฺจ, จกฺกวตฺตี ภวิสฺสติฯ

[134]

‘‘‘ทุชฺชโย นาม นาเมน, เหสฺสติ มนุชาธิโป;

อนุโภตฺวาน ตํ ปุญฺญํ, สกกมฺมํ อปสฺสิโต [สกกมฺมูปสํหิโต (สฺยา.)]ฯ

[135]