เมนู

‘‘วุฏฺฐมฺหิ เทเว จตุรงฺคุลมฺหิ, ติเณ อนิเลริตองฺคณมฺหิ;

ฐตฺวาน โยคสฺส ปยุตฺตตาทิโน, ตโตตฺตริํ ปารมตา น วิชฺชติฯ

[51]

‘‘อุตฺตเม ทมเถ ทนฺโต, จิตฺตํ เม สุปณีหิตํ;

ภาโร เม โอหิโต สพฺโพ, นิพฺพุโตมฺหิ อนาสโวฯ

[52]

‘‘องฺคีรโส มหานาโค, อภิชาโตว เกสรี;

ภิกฺขุสงฺเฆ นิสีทิตฺวา, เอตทคฺเค ฐเปสิ มํฯ

[53]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โสโณ โกฬิวิโส [โกฬิยเวสฺโส (สี. สฺยา.), โกฏิกณฺโณ (ก.)] เถโร อิมา คาถาโย อภาสิตฺถาติฯ

โสณโกฬิวิสตฺเถรสฺสาปทานํ ทุติยํฯ

3. กาฬิโคธาปุตฺตภทฺทิยตฺเถรอปทานํ

[54]

‘‘ปทุมุตฺตรสมฺพุทฺธํ , เมตฺตจิตฺตํ มหามุนิํ;

อุเปติ ชนตา สพฺพา, สพฺพโลกคฺคนายกํฯ

[55]

‘‘สตฺตุกญฺจ พทฺธกญฺจ [วตฺถํ เสนาสนญฺเจว (สี.), สตฺตุกญฺจ ปทกญฺจ (สี. อฏฺฐ.), สตฺตุกญฺจ ปวากญฺจ (สฺยา.)], อามิสํ ปานโภชนํ;

ททนฺติ สตฺถุโน สพฺเพ, ปุญฺญกฺเขตฺเต อนุตฺตเรฯ

[56]

‘‘อหมฺปิ ทานํ ทสฺสามิ, เทวเทวสฺส ตาทิโน;

พุทฺธเสฏฺฐํ นิมนฺเตตฺวา, สงฺฆมฺปิ จ อนุตฺตรํฯ

[57]

‘‘อุยฺโยชิตา มยา เจเต, นิมนฺเตสุํ ตถาคตํ;

เกวลํ ภิกฺขุสงฺฆญฺจ, ปุญฺญกฺเขตฺตํ อนุตฺตรํฯ

[58]

‘‘สตสหสฺสปลฺลงฺกํ, โสวณฺณํ โคนกตฺถตํ;

ตูลิกาปฏลิกาย, โขมกปฺปาสิเกหิ จ;

มหารหํ ปญฺญาปยิํ, อาสนํ พุทฺธยุตฺตกํฯ

[59]

‘‘ปทุมุตฺตโร โลกวิทู, เทวเทโว นราสโภ;

ภิกฺขุสงฺฆปริพฺยูฬฺโห, มม ทฺวารมุปาคมิฯ

[60]

‘‘ปจฺจุคฺคนฺตฺวาน สมฺพุทฺธํ, โลกนาถํ ยสสฺสินํ;

ปสนฺนจิตฺโต สุมโน, อภินามยิํ สงฺฆรํ [สกํ ฆรํ (สี.)]

[61]

‘‘ภิกฺขูนํ สตสหสฺสํ, พุทฺธญฺจ โลกนายกํ;

ปสนฺนจิตฺโต สุมโน, ปรมนฺเนน ตปฺปยิํฯ

[62]

‘‘ปทุมุตฺตโร โลกวิทู, อาหุตีนํ ปฏิคฺคโห;

ภิกฺขุสงฺเฆ นิสีทิตฺวา, อิมา คาถา อภาสถฯ

[63]

‘‘‘เยนิทํ อาสนํ ทินฺนํ, โสวณฺณํ โคนกตฺถตํ;

ตมหํ กิตฺตยิสฺสามิ, สุณาถ มม ภาสโตฯ

[64]

‘‘‘จตุสตฺตติกฺขตฺตุํ โส, เทวรชฺชํ กริสฺสติ;

อนุโภสฺสติ สมฺปตฺติํ, อจฺฉราหิ ปุรกฺขโตฯ

[65]

‘‘‘ปเทสรชฺชํ สหสฺสํ, วสุธํ อาวสิสฺสติ;

เอกปญฺญาสกฺขตฺตุญฺจ, จกฺกวตฺตี ภวิสฺสติฯ

[66]

‘‘‘สพฺพาสุ ภวโยนีสุ, อุจฺจากุลี [อุจฺจากุเล (ก.)] ภวิสฺสติ;

โส จ ปจฺฉา ปพฺพชิตฺวา, สุกฺกมูเลน โจทิโต;

ภทฺทิโย นาม นาเมน, เหสฺสติ สตฺถุ สาวโกฯ

[67]

‘‘‘วิเวกมนุยุตฺโตมฺหิ, ปนฺตเสนนิวาสหํ;

ผลญฺจาธิคตํ สพฺพํ, จตฺตกฺเลโสมฺหิ อชฺชหํฯ

[68]

‘‘‘มม สพฺพํ [กมฺมํ (?)] อภิญฺญาย, สพฺพญฺญู โลกนายโก;

ภิกฺขุสงฺเฆ นิสีทิตฺวา, เอตทคฺเค ฐเปสิ มํ’ฯ

[69]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ภทฺทิโย กาฬิโคธาย ปุตฺโต เถโร อิมา คาถาโย อภาสิตฺถาติฯ

ภทฺทิยสฺส กาฬิโคธาย ปุตฺตตฺเถรสฺสาปทานํ ตติยํฯ

4. สนฺนิฏฺฐาปกตฺเถรอปทานํ

[70]

‘‘อรญฺเญ กุฏิกํ กตฺวา, วสามิ ปพฺพตนฺตเร;

ลาภาลาเภน สนฺตุฏฺโฐ, ยเสน อยเสน จฯ

[71]

‘‘ปทุมุตฺตโร โลกวิทู, อาหุตีนํ ปฏิคฺคโห;

วสีสตสหสฺเสหิ [ภิกฺขุสตสหสฺเสหิ (สฺยา.)], อาคจฺฉิ มม สนฺติกํฯ

[72]

‘‘อุปาคตํ มหานาคํ [มหาวีรํ (สี.)], ชลชุตฺตมนามกํ;

ติณสนฺถรํ [ติณตฺถรํ (ก.)] ปญฺญาเปตฺวา, อทาสิํ สตฺถุโน อหํฯ

[73]

‘‘ปสนฺนจิตฺโต สุมโน, อามณฺฑํ ปานียญฺจหํ;

อทาสิํ อุชุภูตสฺส, วิปฺปสนฺเนน เจตสาฯ

[74]

‘‘สตสหสฺสิโต กปฺเป [สตสหสฺเส อิโต กปฺเป (สี.)], ยํ ทานมททิํ ตทา;

ทุคฺคติํ นาภิชานามิ, อามณฺฑสฺส อิทํ ผลํฯ

[75]

‘‘เอกตาลีสกปฺปมฺหิ, เอโก อาสิํ อรินฺทโม;

สตฺตรตนสมฺปนฺโน, จกฺกวตฺตี มหพฺพโลฯ

[76]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สนฺนิฏฺฐาปโก [สนฺนิธาปโก (สี.)] เถโร อิมา คาถาโย อภาสิตฺถาติฯ

สนฺนิฏฺฐาปกตฺเถรสฺสาปทานํ จตุตฺถํฯ

5. ปญฺจหตฺถิยตฺเถรอปทานํ

[77]

‘‘สุเมโธ นาม สมฺพุทฺโธ, คจฺฉเต อนฺตราปเณ;

โอกฺขิตฺตจกฺขุ [ขิตฺตจกฺขุ (ก. สี. ก.)] มิตภาณี, สติมา สํวุตินฺทฺริโยฯ

[78]

‘‘ปญฺจ อุปฺปลหตฺถานิ, อาเวฬตฺถํ อหํสุ เม;

เตน พุทฺธํ อปูเชสิํ, ปสนฺโน เสหิ ปาณิภิฯ

[79]

‘‘อาโรปิตา จ เต ปุปฺผา, ฉทนํ อสฺสุ สตฺถุโน;

สมาธิํสุ [สํสาวิํสุ (สี.)] มหานาคํ, สิสฺสา อาจริยํ ยถาฯ

[80]