‘‘สพฺเพ กามา สมุจฺฉินฺนา, เย ทิพฺพา เย จ มานุสา;

วิกฺขีโณ ชาติสํสาโร, นตฺถิ ทานิ ปุนพฺภโว’’ติฯ

… อปรา อุตฺตมา เถรี…ฯ

4. ทนฺติกาเถรีคาถา

[48]

‘‘ทิวาวิหารา นิกฺขมฺม, คิชฺฌกูฏมฺหิ ปพฺพเต;

นาคํ โอคาหมุตฺติณฺณํ, นทีตีรมฺหิ อทฺทสํฯ

[49]

‘‘ปุริโส องฺกุสมาทาย, ‘เทหิ ปาท’นฺติ ยาจติ;

นาโค ปสารยี ปาทํ, ปุริโส นาคมารุหิฯ

[50]

‘‘ทิสฺวา อทนฺตํ ทมิตํ, มนุสฺสานํ วสํ คตํ;

ตโต จิตฺตํ สมาเธสิํ, ขลุ ตาย วนํ คตา’’ติฯ

… ทนฺติกา เถรี…ฯ

5. อุพฺพิริเถรีคาถา

[51]

‘‘อมฺม ชีวาติ วนมฺหิ กนฺทสิ, อตฺตานํ อธิคจฺฉ อุพฺพิริ;

จุลฺลาสีติสหสฺสานิ [จูฬาสีติสหสฺสานิ (สี.)], สพฺพา ชีวสนามิกา;

เอตมฺหาฬาหเน ทฑฺฒา, ตาสํ กมนุโสจสิฯ

[52]

‘‘อพฺพหี [อพฺพุตี (สฺยา.), อพฺพุฬฺหํ (ก.)] วต เม สลฺลํ, ทุทฺทสํ หทยสฺสิตํ [หทยนิสฺสิตํ (สี. สฺยา.)];

ยํ เม โสกปเรตาย, ธีตุโสกํ พฺยปานุทิฯ

[53]

‘‘สาชฺช อพฺพูฬฺหสลฺลาหํ, นิจฺฉาตา ปรินิพฺพุตา;

พุทฺธํ ธมฺมญฺจ สงฺฆญฺจ, อุเปมิ สรณํ มุนิ’’นฺติฯ

… อุพฺพิรี เถรี…ฯ

6. สุกฺกาเถรีคาถา

[54]

‘‘กิํเม กตา ราชคเห มนุสฺสา, มธุํ ปีตาว [มธุปีตาว (สี.)] อจฺฉเร;

เย สุกฺกํ น อุปาสนฺติ, เทเสนฺติํ พุทฺธสาสนํฯ

[55]

‘‘ตญฺจ อปฺปฏิวานียํ, อเสจนกโมชวํ;

ปิวนฺติ มญฺเญ สปฺปญฺญา, วลาหกมิวทฺธคูฯ

[56]

‘‘สุกฺกา สุกฺเกหิ ธมฺเมหิ, วีตราคา สมาหิตา;

ธาเรติ อนฺติมํ เทหํ, เชตฺวา มารํ สวาหน’’นฺติฯ

… สุกฺกา เถรี…ฯ

7. เสลาเถรีคาถา

[57]

‘‘นตฺถิ นิสฺสรณํ โลเก, กิํ วิเวเกน กาหสิ;

ภุญฺชาหิ กามรติโย, มาหุ ปจฺฉานุตาปินี’’ฯ

[58]

‘‘สตฺติสูลูปมา กามา, ขนฺธาสํ อธิกุฏฺฏนา;

ยํ ตฺวํ ‘กามรติํ’ พฺรูสิ, ‘อรตี’ ทานิ สา มมฯ

[59]

‘‘สพฺพตฺถ วิหตา นนฺที [นนฺทิ (สี. สฺยา.)], ตโมขนฺโธ ปทาลิโต;

เอวํ ชานาหิ ปาปิม, นิหโต ตฺวมสิ อนฺตกา’’ติฯ

… เสลา เถรี…ฯ

8. โสมาเถรีคาถา

[60]

‘‘ยํ ตํ อิสีหิ ปตฺตพฺพํ, ฐานํ ทุรภิสมฺภวํ;

น ตํ ทฺวงฺคุลปญฺญาย, สกฺกา ปปฺโปตุมิตฺถิยา’’ฯ

[61]

‘‘อิตฺถิภาโว โน กิํ กยิรา, จิตฺตมฺหิ สุสมาหิเต;

ญาณมฺหิ วตฺตมานมฺหิ, สมฺมา ธมฺมํ วิปสฺสโตฯ

[62]

‘‘สพฺพตฺถ วิหตา นนฺที, ตโมขนฺโธ ปทาลิโต;

เอวํ ชานาหิ ปาปิม, นิหโต ตฺวมสิ อนฺตกา’’ติฯ

… โสมา เถรี…ฯ

ติกนิปาโต นิฏฺฐิโตฯ

4. จตุกฺกนิปาโต