1. อปราสามาเถรีคาถา
[39]
‘‘ปณฺณวีสติวสฺสานิ , ยโต ปพฺพชิตาย เม;
นาภิชานามิ จิตฺตสฺส, สมํ ลทฺธํ กุทาจนํฯ
[40]
‘‘อลทฺธา เจตโส สนฺติํ, จิตฺเต อวสวตฺตินี;
ตโต สํเวคมาปาทิํ, สริตฺวา ชินสาสนํฯ
[41]
‘‘พหูหิ ทุกฺขธมฺเมหิ, อปฺปมาทรตาย เม;
ตณฺหกฺขโย อนุปฺปตฺโต, กตํ พุทฺธสฺส สาสนํ;
อชฺช เม สตฺตมี รตฺติ, ยโต ตณฺหา วิโสสิตา’’ติฯ
… อปรา สามา เถรี…ฯ
2. อุตฺตมาเถรีคาถา
[42]
‘‘จตุกฺขตฺตุํ ปญฺจกฺขตฺตุํ, วิหารา อุปนิกฺขมิํ;
อลทฺธา เจตโส สนฺติํ, จิตฺเต อวสวตฺตินีฯ
[43]
‘‘สา ภิกฺขุนิํ อุปคจฺฉิํ, ยา เม สทฺธายิกา อหุ;
สา เม ธมฺมมเทเสสิ, ขนฺธายตนธาตุโยฯ
[44]
‘‘ตสฺสา ธมฺมํ สุณิตฺวาน, ยถา มํ อนุสาสิ สา;
สตฺตาหํ เอกปลฺลงฺเกน, นิสีทิํ ปีติสุขสมปฺปิตา [นิสีทิํ สุขสมปฺปิตา (สี.)];
อฏฺฐมิยา ปาเท ปสาเรสิํ, ตโมขนฺธํ ปทาลิยา’’ติฯ
… อุตฺตมา เถรี…ฯ
3. อปราอุตฺตมาเถรีคาถา
[45]
‘‘เย อิเม สตฺต โพชฺฌงฺคา, มคฺคา นิพฺพานปตฺติยา;
ภาวิตา เต มยา สพฺเพ, ยถา พุทฺเธน เทสิตาฯ
[46]
‘‘สุญฺญตสฺสานิมิตฺตสฺส, ลาภินีหํ ยทิจฺฉกํ;
โอรสา ธีตา พุทฺธสฺส, นิพฺพานาภิรตา สทาฯ
[47]
‘‘สพฺเพ กามา สมุจฺฉินฺนา, เย ทิพฺพา เย จ มานุสา;
วิกฺขีโณ ชาติสํสาโร, นตฺถิ ทานิ ปุนพฺภโว’’ติฯ
… อปรา อุตฺตมา เถรี…ฯ
4. ทนฺติกาเถรีคาถา
[48]
‘‘ทิวาวิหารา นิกฺขมฺม, คิชฺฌกูฏมฺหิ ปพฺพเต;
นาคํ โอคาหมุตฺติณฺณํ, นทีตีรมฺหิ อทฺทสํฯ
[49]
‘‘ปุริโส องฺกุสมาทาย, ‘เทหิ ปาท’นฺติ ยาจติ;
นาโค ปสารยี ปาทํ, ปุริโส นาคมารุหิฯ
[50]
‘‘ทิสฺวา อทนฺตํ ทมิตํ, มนุสฺสานํ วสํ คตํ;
ตโต จิตฺตํ สมาเธสิํ, ขลุ ตาย วนํ คตา’’ติฯ
… ทนฺติกา เถรี…ฯ
5. อุพฺพิริเถรีคาถา
[51]
‘‘อมฺม ชีวาติ วนมฺหิ กนฺทสิ, อตฺตานํ อธิคจฺฉ อุพฺพิริ;
จุลฺลาสีติสหสฺสานิ [จูฬาสีติสหสฺสานิ (สี.)], สพฺพา ชีวสนามิกา;
เอตมฺหาฬาหเน ทฑฺฒา, ตาสํ กมนุโสจสิฯ
[52]
‘‘อพฺพหี [อพฺพุตี (สฺยา.), อพฺพุฬฺหํ (ก.)] วต เม สลฺลํ, ทุทฺทสํ หทยสฺสิตํ [หทยนิสฺสิตํ (สี. สฺยา.)];
ยํ เม โสกปเรตาย, ธีตุโสกํ พฺยปานุทิฯ
[53]
‘‘สาชฺช อพฺพูฬฺหสลฺลาหํ, นิจฺฉาตา ปรินิพฺพุตา;
พุทฺธํ ธมฺมญฺจ สงฺฆญฺจ, อุเปมิ สรณํ มุนิ’’นฺติฯ
… อุพฺพิรี เถรี…ฯ
6. สุกฺกาเถรีคาถา
[54]
‘‘กิํเม กตา ราชคเห มนุสฺสา, มธุํ ปีตาว [มธุปีตาว (สี.)] อจฺฉเร;
เย สุกฺกํ น อุปาสนฺติ, เทเสนฺติํ พุทฺธสาสนํฯ
[55]
‘‘ตญฺจ อปฺปฏิวานียํ, อเสจนกโมชวํ;
ปิวนฺติ มญฺเญ สปฺปญฺญา, วลาหกมิวทฺธคูฯ
[56]