1. วฑฺฒมาตุเถรีคาถา
[204]
‘‘มา สุ เต วฑฺฒ โลกมฺหิ, วนโถ อาหุ กุทาจนํ;
มา ปุตฺตก ปุนปฺปุนํ, อหุ ทุกฺขสฺส ภาคิมาฯ
[205]
‘‘สุขญฺหิ วฑฺฒ มุนโย, อเนชา ฉินฺนสํสยา;
สีติภูตา ทมปฺปตฺตา, วิหรนฺติ อนาสวาฯ
[206]
‘‘เตหานุจิณฺณํ อิสีภิ, มคฺคํ ทสฺสนปตฺติยา;
ทุกฺขสฺสนฺตกิริยาย, ตฺวํ วฑฺฒ อนุพฺรูหย’’ฯ
[207]
‘‘วิสารทาว ภณสิ, เอตมตฺถํ ชเนตฺติ เม;
มญฺญามิ นูน มามิเก, วนโถ เต น วิชฺชติ’’ฯ
[208]
‘‘เย เกจิ วฑฺฒ สงฺขารา, หีนา อุกฺกฏฺฐมชฺฌิมา;
อณูปิ อณุมตฺโตปิ, วนโถ เม น วิชฺชติฯ
[209]
‘‘สพฺเพ เม อาสวา ขีณา, อปฺปมตฺตสฺส ฌายโต;
ติสฺโส วิชฺชา อนุปฺปตฺตา, กตํ พุทฺธสฺส สาสนํ’’ฯ
[210]
‘‘อุฬารํ วต เม มาตา, ปโตทํ สมวสฺสริ;
ปรมตฺถสญฺหิตา คาถา, ยถาปิ อนุกมฺปิกาฯ
[211]
‘‘ตสฺสาหํ วจนํ สุตฺวา, อนุสิฏฺฐิํ ชเนตฺติยา;
ธมฺมสํเวคมาปาทิํ, โยคกฺเขมสฺส ปตฺติยาฯ
[212]
‘‘โสหํ ปธานปหิตตฺโต, รตฺตินฺทิวมตนฺทิโต;
มาตรา โจทิโต สนฺโต, อผุสิํ สนฺติมุตฺตมํ’’ฯ
… วฑฺฒมาตา เถรี…ฯ
นวกนิปาโต นิฏฺฐิโตฯ
10. เอกาทสนิปาโต
1. กิสาโคตมีเถรีคาถา
[213]
‘‘กลฺยาณมิตฺตตา มุนินา, โลกํ อาทิสฺส วณฺณิตา;
กลฺยาณมิตฺเต ภชมาโน, อปิ พาโล ปณฺฑิโต อสฺสฯ
[214]
‘‘ภชิตพฺพา สปฺปุริสา, ปญฺญา ตถา วฑฺฒติ ภชนฺตานํ;
ภชมาโน สปฺปุริเส, สพฺเพหิปิ ทุกฺเขหิ ปมุจฺเจยฺยฯ
[215]
‘‘ทุกฺขญฺจ วิชาเนยฺย, ทุกฺขสฺส จ สมุทยํ นิโรธํ;
อฏฺฐงฺคิกญฺจ มคฺคํ, จตฺตาริปิ อริยสจฺจานิฯ
[216]
‘‘ทุกฺโข อิตฺถิภาโว, อกฺขาโต ปุริสทมฺมสารถินา;
สปตฺติกมฺปิ หิ ทุกฺขํ, อปฺเปกจฺจา สกิํ วิชาตาโยฯ
[217]
‘‘คลเก อปิ กนฺตนฺติ, สุขุมาลินิโย วิสานิ ขาทนฺติ;
ชนมารกมชฺฌคตา, อุโภปิ พฺยสนานิ อนุโภนฺติฯ
[218]
‘‘อุปวิชญฺญา คจฺฉนฺตี, อทฺทสาหํ ปติํ มตํ;
ปนฺถมฺหิ วิชายิตฺวาน, อปฺปตฺตาว สกํ ฆรํฯ
[219]
‘‘ทฺเว ปุตฺตา กาลกตา, ปตี จ ปนฺเถ มโต กปณิกาย;
มาตา ปิตา จ ภาตา, ฑยฺหนฺติ จ เอกจิตกายํฯ
[220]
‘‘ขีณกุลีเน กปเณ, อนุภูตํ เต ทุขํ อปริมาณํ;
อสฺสู จ เต ปวตฺตํ, พหูนิ จ ชาติสหสฺสานิฯ
[221]
‘‘วสิตา สุสานมชฺเฌ, อโถปิ ขาทิตานิ ปุตฺตมํสานิ;
หตกุลิกา สพฺพครหิตา, มตปติกา อมตมธิคจฺฉิํฯ
[222]
‘‘ภาวิโต เม มคฺโค, อริโย อฏฺฐงฺคิโก อมตคามี;
นิพฺพานํ สจฺฉิกตํ, ธมฺมาทาสํ อเวกฺขิํหํ [อเปกฺขิหํ (สี.)]ฯ
[223]
‘‘อหมมฺหิ กนฺตสลฺลา, โอหิตภารา กตญฺหิ กรณียํ;
กิสา โคตมี เถรี, วิมุตฺตจิตฺตา อิมํ ภณี’’ติฯ
… กิสา โคตมี เถรี…ฯ
เอกาทสนิปาโต นิฏฺฐิโตฯ
11. ทฺวาทสกนิปาโต