1. สีสูปจาลาเถรีคาถา
[196]
‘‘ภิกฺขุนี สีลสมฺปนฺนา, อินฺทฺริเยสุ สุสํวุตา;
อธิคจฺเฉ ปทํ สนฺตํ, อเสจนกโมชวํ’’ฯ
[197]
‘‘ตาวติํสา จ ยามา จ, ตุสิตา จาปิ เทวตา;
นิมฺมานรติโน เทวา, เย เทวา วสวตฺติโน;
ตตฺถ จิตฺตํ ปณีเธหิ, ยตฺถ เต วุสิตํ ปุเร’’ฯ
[198]
‘‘ตาวติํสา จ ยามา จ, ตุสิตา จาปิ เทวตา;
นิมฺมานรติโน เทวา, เย เทวา วสวตฺติโนฯ
[199]
‘‘กาลํ กาลํ ภวาภวํ, สกฺกายสฺมิํ ปุรกฺขตา;
อวีติวตฺตา สกฺกายํ, ชาติมรณสาริโนฯ
[200]
‘‘สพฺโพ อาทีปิโต โลโก, สพฺโพ โลโก ปทีปิโต;
สพฺโพ ปชฺชลิโต โลโก, สพฺโพ โลโก ปกมฺปิโตฯ
[201]
‘‘อกมฺปิยํ อตุลิยํ, อปุถุชฺชนเสวิตํ;
พุทฺโธ ธมฺมมเทเสสิ, ตตฺถ เม นิรโต มโนฯ
[202]
‘‘ตสฺสาหํ วจนํ สุตฺวา, วิหริํ สาสเน รตา;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[203]
‘‘สพฺพตฺถ วิหตา นนฺที, ตโมขนฺโธ ปทาลิโต;
เอวํ ชานาหิ ปาปิม, นิหโต ตฺวมสิ อนฺตก’’ฯ
… สีสูปจาลา เถรี…ฯ
อฏฺฐกนิปาโต นิฏฺฐิโตฯ
9. นวกนิปาโต
1. วฑฺฒมาตุเถรีคาถา
[204]
‘‘มา สุ เต วฑฺฒ โลกมฺหิ, วนโถ อาหุ กุทาจนํ;
มา ปุตฺตก ปุนปฺปุนํ, อหุ ทุกฺขสฺส ภาคิมาฯ
[205]
‘‘สุขญฺหิ วฑฺฒ มุนโย, อเนชา ฉินฺนสํสยา;
สีติภูตา ทมปฺปตฺตา, วิหรนฺติ อนาสวาฯ
[206]
‘‘เตหานุจิณฺณํ อิสีภิ, มคฺคํ ทสฺสนปตฺติยา;
ทุกฺขสฺสนฺตกิริยาย, ตฺวํ วฑฺฒ อนุพฺรูหย’’ฯ
[207]
‘‘วิสารทาว ภณสิ, เอตมตฺถํ ชเนตฺติ เม;
มญฺญามิ นูน มามิเก, วนโถ เต น วิชฺชติ’’ฯ
[208]
‘‘เย เกจิ วฑฺฒ สงฺขารา, หีนา อุกฺกฏฺฐมชฺฌิมา;
อณูปิ อณุมตฺโตปิ, วนโถ เม น วิชฺชติฯ
[209]
‘‘สพฺเพ เม อาสวา ขีณา, อปฺปมตฺตสฺส ฌายโต;
ติสฺโส วิชฺชา อนุปฺปตฺตา, กตํ พุทฺธสฺส สาสนํ’’ฯ
[210]
‘‘อุฬารํ วต เม มาตา, ปโตทํ สมวสฺสริ;
ปรมตฺถสญฺหิตา คาถา, ยถาปิ อนุกมฺปิกาฯ
[211]
‘‘ตสฺสาหํ วจนํ สุตฺวา, อนุสิฏฺฐิํ ชเนตฺติยา;
ธมฺมสํเวคมาปาทิํ, โยคกฺเขมสฺส ปตฺติยาฯ
[212]
‘‘โสหํ ปธานปหิตตฺโต, รตฺตินฺทิวมตนฺทิโต;
มาตรา โจทิโต สนฺโต, อผุสิํ สนฺติมุตฺตมํ’’ฯ
… วฑฺฒมาตา เถรี…ฯ
นวกนิปาโต นิฏฺฐิโตฯ
10. เอกาทสนิปาโต