1. อญฺญาสิโกณฺฑญฺญตฺเถรคาถา
[673]
‘‘เอส ภิยฺโย ปสีทามิ, สุตฺวา ธมฺมํ มหารสํ;
วิราโค เทสิโต ธมฺโม, อนุปาทาย สพฺพโสฯ
[674]
‘‘พหูนิ โลเก จิตฺรานิ, อสฺมิํ ปถวิมณฺฑเล;
มเถนฺติ มญฺเญ สงฺกปฺปํ, สุภํ ราคูปสํหิตํฯ
[675]
‘‘รชมุหตญฺจ วาเตน, ยถา เมโฆปสมฺมเย;
เอวํ สมฺมนฺติ สงฺกปฺปา, ยทา ปญฺญาย ปสฺสติฯ
[676]
[ธ. ป. 277 ธมฺมปเท] ‘‘สพฺเพ สงฺขารา อนิจฺจาติ, ยทา ปญฺญาย ปสฺสติ;
อถ นิพฺพินฺทติ ทุกฺเข, เอส มคฺโค วิสุทฺธิยาฯ
[677 .
[ธ. ป. 278 ธมฺมปเท] ‘‘สพฺเพ สงฺขารา ทุกฺขาติ, ยทา ปญฺญาย ปสฺสติ
อถ นิพฺพินฺทติ ทุกฺเข, เอส มคฺโค วิสุทฺธิยาฯ
[678]
[ธ. ป. 279 ธมฺมปเท] ‘‘สพฺเพ ธมฺมา อนตฺตาติ, ยทา ปญฺญาย ปสฺสติ;
อถ นิพฺพินฺทติ ทุกฺเข, เอส มคฺโค วิสุทฺธิยาฯ
[679]
‘‘พุทฺธานุพุทฺโธ โย เถโร, โกณฺฑญฺโญ ติพฺพนิกฺกโม;
ปหีนชาติมรโณ, พฺรหฺมจริยสฺส เกวลีฯ
[680]
‘‘โอฆปาโส ทฬฺหขิโล [ทฬฺโห ขิโล (สฺยา. ก.)], ปพฺพโต ทุปฺปทาลโย;
เฉตฺวา ขิลญฺจ ปาสญฺจ, เสลํ เภตฺวาน [เฉตฺวาน (ก.)] ทุพฺภิทํ;
ติณฺโณ ปารงฺคโต ฌายี, มุตฺโต โส มารพนฺธนาฯ
[681]
‘‘อุทฺธโต จปโล ภิกฺขุ, มิตฺเต อาคมฺม ปาปเก;
สํสีทติ มโหฆสฺมิํ, อูมิยา ปฏิกุชฺชิโตฯ
[682]
‘‘อนุทฺธโต อจปโล, นิปโก สํวุตินฺทฺริโย;
กลฺยาณมิตฺโต เมธาวี, ทุกฺขสฺสนฺตกโร สิยาฯ
[683]
‘‘กาลปพฺพงฺคสงฺกาโส, กิโส ธมนิสนฺถโต;
มตฺตญฺญู อนฺนปานสฺมิํ, อทีนมนโส นโรฯ
[684]
‘‘ผุฏฺโฐ ฑํเสหิ มกเสหิ, อรญฺญสฺมิํ พฺรหาวเน;
นาโค สงฺคามสีเสว, สโต ตตฺราธิวาสเยฯ
[685]
‘‘นาภินนฺทามิ มรณํ…เป.… นิพฺพิสํ ภตโก ยถาฯ
[686]
‘‘นาภินนฺทามิ มรณํ…เป.… สมฺปชานาเอ ปติสฺสโตฯ
[687]
‘‘ปริจิณฺโณ มยา สตฺถา…เป.… ภวเนตฺติ สมูหตาฯ
[688]
‘‘ยสฺส จตฺถาย ปพฺพชิโต, อคารสฺมานคาริยํ;
โส เม อตฺโถ อนุปฺปตฺโต, กิํ เม สทฺธิวิหารินา’’ติฯ
… อญฺญาสิโกณฺฑญฺโญ [อญฺญาโกณฺฑญฺโญ (สี. สฺยา.)] เถโร…ฯ
2. อุทายิตฺเถรคาถา
[689]
[อ. นิ. 6.43] ‘‘มนุสฺสภูตํ สมฺพุทฺธํ, อตฺตทนฺตํ สมาหิตํ;
อิริยมานํ พฺรหฺมปเถ, จิตฺตสฺสูปสเม รตํฯ
[690]
‘‘ยํ มนุสฺสา นมสฺสนฺติ, สพฺพธมฺมาน ปารคุํ;
เทวาปิ ตํ นมสฺสนฺติ, อิติ เม อรหโต สุตํฯ
[691]
‘‘สพฺพสํโยชนาตีตํ , วนา นิพฺพนมาคตํ;
กาเมหิ เนกฺขมฺมรตํ [นิกฺขมฺมรตํ (ก.)], มุตฺตํ เสลาว กญฺจนํฯ
[692]
‘‘ส เว อจฺจรุจิ นาโค, หิมวาวญฺเญ สิลุจฺจเย;
สพฺเพสํ นาคนามานํ, สจฺจนาโม อนุตฺตโรฯ
[693]
‘‘นาคํ โว กิตฺตยิสฺสามิ, น หิ อาคุํ กโรติ โส;
โสรจฺจํ อวิหิํสา จ, ปาทา นาคสฺส เต ทุเวฯ
[694]
‘‘สติ จ สมฺปชญฺญญฺจ, จรณา นาคสฺส เตปเร;
สทฺธาหตฺโถ มหานาโค, อุเปกฺขาเสตทนฺตวาฯ
[695]
‘‘สติ คีวา สิโร ปญฺญา, วีมํสา ธมฺมจินฺตนา;
ธมฺมกุจฺฉิสมาวาโส, วิเวโก ตสฺส วาลธิฯ
[696]
‘‘โส ฌายี อสฺสาสรโต, อชฺฌตฺตํ สุสมาหิโต;
คจฺฉํ สมาหิโต นาโค, ฐิโต นาโค สมาหิโตฯ
[697]
‘‘สยํ สมาหิโต นาโค, นิสินฺโนปิ สมาหิโต;
สพฺพตฺถ สํวุโต นาโค, เอสา นาคสฺส สมฺปทาฯ
[698]