‘‘ทุมฺเมเธหิ ปสํสา จ, วิญฺญูหิ ครหา จ ยา;

ครหาว เสยฺโย วิญฺญูหิ, ยํ เจ พาลปฺปสํสนาฯ

[669]

‘‘สุขญฺจ กามมยิกํ, ทุกฺขญฺจ ปวิเวกิยํ;

ปวิเวกทุกฺขํ เสยฺโย, ยํ เจ กามมยํ สุขํฯ

[670]

‘‘ชีวิตญฺจ อธมฺเมน, ธมฺเมน มรณญฺจ ยํ;

มรณํ ธมฺมิกํ เสยฺโย, ยํ เจ ชีเว อธมฺมิกํฯ

[671]

‘‘กามโกปปฺปหีนา เย, สนฺตจิตฺตา ภวาภเว;

จรนฺติ โลเก อสิตา, นตฺถิ เตสํ ปิยาปิยํฯ

[672]

‘‘ภาวยิตฺวาน โพชฺฌงฺเค, อินฺทฺริยานิ พลานิ จ;

ปปฺปุยฺย ปรมํ สนฺติํ, ปรินิพฺพนฺตินาสวา’’ติฯ

… โคทตฺโต เถโร…ฯ

จุทฺทสกนิปาโต นิฏฺฐิโตฯ

ตตฺรุทฺทานํ –

เรวโต เจว โคทตฺโต, เถรา ทฺเว เต มหิทฺธิกา;

จุทฺทสมฺหิ นิปาตมฺหิ, คาถาโย อฏฺฐวีสตีติฯ

15. โสฬสกนิปาโต