1. คหฺวรตีริยตฺเถรคาถา
[31]
‘‘ผุฏฺโฐ ฑํเสหิ มกเสหิ, อรญฺญสฺมิํ พฺรหาวเน;
นาโค สํคามสีเสว, สโต ตตฺราธิวาสเย’’ติฯ
… คหฺวรตีริโย เถโร…ฯ
2. สุปฺปิยตฺเถรคาถา
[32]
‘‘อชรํ ชีรมาเนน, ตปฺปมาเนน นิพฺพุติํ;
นิมิยํ [นิมฺมิสฺสํ (สี.), นิรามิสํ (สฺยา.), นิมิเนยฺยํ (?)] ปรมํ สนฺติํ, โยคกฺเขมํ อนุตฺตร’’นฺติฯ
… สุปฺปิโย เถโร…ฯ
3. โสปากตฺเถรคาถา
[33]
‘‘ยถาปิ เอกปุตฺตสฺมิํ, ปิยสฺมิํ กุสลี สิยา;
เอวํ สพฺเพสุ ปาเณสุ, สพฺพตฺถ กุสโล สิยา’’ติฯ
… โสปาโก เถโร…ฯ
4. โปสิยตฺเถรคาถา
[34]
‘‘อนาสนฺนวรา เอตา, นิจฺจเมว วิชานตา;
คามา อรญฺญมาคมฺม, ตโต เคหํ อุปาวิสิ [อุปาวิสิํ (สี.)];
ตโต อุฏฺฐาย ปกฺกามิ, อนามนฺเตตฺวา [อนามนฺติย (สี.)] โปสิโย’’ติฯ
… โปสิโย เถโร…ฯ
5. สามญฺญกานิตฺเถรคาถา
[35]
‘‘สุขํ สุขตฺโถ ลภเต ตทาจรํ, กิตฺติญฺจ ปปฺโปติ ยสสฺส วฑฺฒติ;
โย อริยมฏฺฐงฺคิกมญฺชสํ อุชุํ, ภาเวติ มคฺคํ อมตสฺส ปตฺติยา’’ติฯ
… สามญฺญกานิตฺเถโร…ฯ
6. กุมาปุตฺตตฺเถรคาถา
[36]
‘‘สาธุ สุตํ สาธุ จริตกํ, สาธุ สทา อนิเกตวิหาโร;
อตฺถปุจฺฉนํ ปทกฺขิณกมฺมํ, เอตํ สามญฺญมกิญฺจนสฺสา’’ติฯ
… กุมาปุตฺโต เถโร…ฯ
7. กุมาปุตฺตสหายกตฺเถรคาถา
[37]
‘‘นานาชนปทํ ยนฺติ, วิจรนฺตา อสญฺญตา;
สมาธิญฺจ วิราเธนฺติ, กิํสุ รฏฺฐจริยา กริสฺสติ;
ตสฺมา วิเนยฺย สารมฺภํ, ฌาเยยฺย อปุรกฺขโต’’ติฯ
… กุมาปุตฺตตฺเถรสฺส สหายโก เถโร…ฯ
8. ควมฺปติตฺเถรคาถา
[38]
‘‘โย อิทฺธิยา สรภุํ อฏฺฐเปสิ, โส ควมฺปติ อสิโต อเนโช;
ตํ สพฺพสงฺคาติคตํ มหามุนิํ, เทวา นมสฺสนฺติ ภวสฺส ปารคุ’’นฺติฯ
… ควมฺปติตฺเถโร…ฯ
9. ติสฺสตฺเถรคาถา
[39]
[สํ. นิ. 1.21, 97]‘‘สตฺติยา วิย โอมฏฺโฐ, ฑยฺหมาโนว [ฑยฺหมาเนว (สพฺพตฺถ)] มตฺถเก;
กามราคปฺปหานาย, สโต ภิกฺขุ ปริพฺพเช’’ติฯ
… ติสฺโส เถโร…ฯ
10. วฑฺฒมานตฺเถรคาถา
[40]
‘‘สตฺติยา วิย โอมฏฺโฐ, ฑยฺหมาโนว มตฺถเก;
ภวราคปฺปหานาย, สโต ภิกฺขุ ปริพฺพเช’’ติฯ
… วฑฺฒมาโน เถโร…ฯ
วคฺโค จตุตฺโถ นิฏฺฐิโตฯ
ตสฺสุทฺทานํ –