เมนู

7. โลมสกงฺคิยตฺเถรคาถา

[27]

‘‘ทพฺพํ กุสํ โปฏกิลํ, อุสีรํ มุญฺชปพฺพชํ;

อุรสา ปนุทิสฺสามิ, วิเวกมนุพฺรูหย’’นฺติฯ

… โลมสกงฺคิโย เถโร…ฯ

8. ชมฺพุคามิกปุตฺตตฺเถรคาถา

[28]

‘‘กจฺจิ โน วตฺถปสุโต, กจฺจิ โน ภูสนารโต;

กจฺจิ สีลมยํ คนฺธํ, กิํ ตฺวํ วายสิ [กจฺจิ สีลมยํ คนฺธํ, ตฺวํ วาสิ (สฺยา.)] เนตรา ปชา’’ติฯ

… ชมฺพุคามิกปุตฺโต เถโร…ฯ

9. หาริตตฺเถรคาถา

[29]

‘‘สมุนฺนมยมตฺตานํ, อุสุกาโรว เตชนํ;

จิตฺตํ อุชุํ กริตฺวาน, อวิชฺชํ ภินฺท หาริตา’’ติฯ

… หาริโต เถโร…ฯ

10. อุตฺติยตฺเถรคาถา

[30]

‘‘อาพาเธ เม สมุปฺปนฺเน, สติ เม อุทปชฺชถ;

อาพาโธ เม สมุปฺปนฺโน, กาโล เม นปฺปมชฺชิตุ’’นฺติฯ

… อุตฺติโย เถโร…ฯ

วคฺโค ตติโย นิฏฺฐิโตฯ

ตสฺสุทฺทานํ –

นิคฺโรโธ จิตฺตโก เถโร, โคสาลเถโร สุคนฺโธ;

นนฺทิโย อภโย เถโร, เถโร โลมสกงฺคิโย;

ชมฺพุคามิกปุตฺโต จ, หาริโต อุตฺติโย อิสีติฯ

4. จตุตฺถวคฺโค

1. คหฺวรตีริยตฺเถรคาถา

[31]

‘‘ผุฏฺโฐ ฑํเสหิ มกเสหิ, อรญฺญสฺมิํ พฺรหาวเน;

นาโค สํคามสีเสว, สโต ตตฺราธิวาสเย’’ติ

… คหฺวรตีริโย เถโร…ฯ

2. สุปฺปิยตฺเถรคาถา

[32]

‘‘อชรํ ชีรมาเนน, ตปฺปมาเนน นิพฺพุติํ;

นิมิยํ [นิมฺมิสฺสํ (สี.), นิรามิสํ (สฺยา.), นิมิเนยฺยํ (?)] ปรมํ สนฺติํ, โยคกฺเขมํ อนุตฺตร’’นฺติฯ

… สุปฺปิโย เถโร…ฯ

3. โสปากตฺเถรคาถา

[33]

‘‘ยถาปิ เอกปุตฺตสฺมิํ, ปิยสฺมิํ กุสลี สิยา;

เอวํ สพฺเพสุ ปาเณสุ, สพฺพตฺถ กุสโล สิยา’’ติฯ

… โสปาโก เถโร…ฯ

4. โปสิยตฺเถรคาถา

[34]

‘‘อนาสนฺนวรา เอตา, นิจฺจเมว วิชานตา;

คามา อรญฺญมาคมฺม, ตโต เคหํ อุปาวิสิ [อุปาวิสิํ (สี.)];

ตโต อุฏฺฐาย ปกฺกามิ, อนามนฺเตตฺวา [อนามนฺติย (สี.)] โปสิโย’’ติฯ

… โปสิโย เถโร…ฯ

5. สามญฺญกานิตฺเถรคาถา

[35]

‘‘สุขํ สุขตฺโถ ลภเต ตทาจรํ, กิตฺติญฺจ ปปฺโปติ ยสสฺส วฑฺฒติ;

โย อริยมฏฺฐงฺคิกมญฺชสํ อุชุํ, ภาเวติ มคฺคํ อมตสฺส ปตฺติยา’’ติฯ

… สามญฺญกานิตฺเถโร…ฯ