เมนู

8. สิงฺคาลปิตุตฺเถรคาถา

[18]

‘‘อหุ พุทฺธสฺส ทายาโท, ภิกฺขุ เภสกฬาวเน;

เกวลํ อฏฺฐิสญฺญาย, อผรี ปถวิํ [ปฐวิํ (สี. สฺยา.)] อิมํ;

มญฺเญหํ กามราคํ โส, ขิปฺปเมว ปหิสฺสตี’’ติ [ปหียภิ (สพฺพตฺถ ปาฬิยํ)]

… สิงฺคาลปิตา [สีคาลปิตา (สี.)] เถโร…ฯ

9. กุลตฺเถรคาถา

[19]

[ธ. ป. 80, 145 ธมฺมปเทปิ] ‘‘อุทกํ หิ นยนฺติ เนตฺติกา, อุสุการา นมยนฺติ [ทมยนฺติ (ก.)] เตชนํ;

ทารุํ นมยนฺติ ตจฺฉกา, อตฺตานํ ทมยนฺติ สุพฺพตา’’ติฯ

… กุโล [กุณฺฑโล (สี.), กุโฬ (สฺยา. ก.)] เถโร…ฯ

10. อชิตตฺเถรคาถา

[20]

‘‘มรเณ เม ภยํ นตฺถิ, นิกนฺติ นตฺถิ ชีวิเต;

สนฺเทหํ นิกฺขิปิสฺสามิ, สมฺปชาโน ปฏิสฺสโต’’ติ [ปติสฺสโตติ (สี. สฺยา.)];;

… อชิโต เถโร …ฯ

วคฺโค ทุติโย นิฏฺฐิโตฯ

ตสฺสุทฺทานํ –

จูฬวจฺโฉ มหาวจฺโฉ, วนวจฺโฉ จ สีวโก;

กุณฺฑธาโน จ เพลฏฺฐิ, ทาสโก จ ตโตปริ;

สิงฺคาลปิติโก เถโร, กุโล จ อชิโต ทสาติฯ

3. ตติยวคฺโค

1. นิคฺโรธตฺเถรคาถา

[21]

‘‘นาหํ ภยสฺส ภายามิ, สตฺถา โน อมตสฺส โกวิโท;

ยตฺถ ภยํ นาวติฏฺฐติ, เตน มคฺเคน วชนฺติ ภิกฺขโว’’ติฯ

… นิคฺโรโธ เถโร…ฯ

2. จิตฺตกตฺเถรคาถา

[22]

‘‘นีลา สุคีวา สิขิโน, โมรา การมฺภิยํ [การํวิยํ (สี.), การวิยํ (สฺยา.)] อภินทนฺติ;

เต สีตวาตกีฬิตา [สีตวาตกทฺทิตกลิตา (สี.), สีตวาตกลิตา (สฺยา.)], สุตฺตํ ฌายํ [ฌานํ (สฺยา.), ฌายิํ (?)] นิโพเธนฺตี’’ติฯ

… จิตฺตโก เถโร…ฯ

3. โคสาลตฺเถรคาถา

[23]

‘‘อหํ โข เวฬุคุมฺพสฺมิํ, ภุตฺวาน มธุปายสํ;

ปทกฺขิณํ สมฺมสนฺโต, ขนฺธานํ อุทยพฺพยํ;

สานุํ ปฏิคมิสฺสามิ, วิเวกมนุพฺรูหย’’นฺติฯ

… โคสาโล เถโร…ฯ

4. สุคนฺธตฺเถรคาถา

[24]

‘‘อนุวสฺสิโก ปพฺพชิโต, ปสฺส ธมฺมสุธมฺมตํ;

ติสฺโส วิชฺชา อนุปฺปตฺตา, กตํ พุทฺธสฺส สาสน’’นฺติฯ

… สุคนฺโธ เถโร…ฯ

5. นนฺทิยตฺเถรคาถา

[25]

‘‘โอภาสชาตํ ผลคํ, จิตฺตํ ยสฺส อภิณฺหโส;

ตาทิสํ ภิกฺขุมาสชฺช, กณฺห ทุกฺขํ นิคจฺฉสี’’ติฯ

… นนฺทิโย เถโร…ฯ

6. อภยตฺเถรคาถา

[26]

‘‘สุตฺวา สุภาสิตํ วาจํ, พุทฺธสฺสาทิจฺจพนฺธุโน;

ปจฺจพฺยธิํ หิ นิปุณํ, วาลคฺคํ อุสุนา ยถา’’ติฯ

… อภโย เถโร…ฯ