‘‘อนุสาสิ มํ อริยวตา, อนุกมฺปิ อนุคฺคหิ;
อโมโฆ ตุยฺหโมวาโท, อนฺเตวาสิมฺหิ สิกฺขิโต’’ติฯ
… สุมโน เถโร…ฯ
5. วฑฺฒตฺเถรคาถา
[335]
‘‘สาธู หิ กิร เม มาตา, ปโตทํ อุปทํสยิ;
ยสฺสาหํ วจนํ สุตฺวา, อนุสิฏฺโฐ ชเนตฺติยา;
อารทฺธวีริโย ปหิตตฺโต, ปตฺโต สมฺโพธิมุตฺตมํฯ
[336]
‘‘อรหา ทกฺขิเณยฺโยมฺหิ, เตวิชฺโช อมตทฺทโส;
เชตฺวา นมุจิโน เสนํ, วิหรามิ อนาสโวฯ
[337]
‘‘อชฺฌตฺตญฺจ พหิทฺธา จ, เย เม วิชฺชิํสุ อาสวา;
สพฺเพ อเสสา อุจฺฉินฺนา, น จ อุปฺปชฺชเร ปุนฯ
[338]
‘‘วิสารทา โข ภคินี, เอตมตฺถํ อภาสยิ;
‘อปิหา นูน มยิปิ, วนโถ เต น วิชฺชติ’ฯ
[339]
‘‘ปริยนฺตกตํ ทุกฺขํ, อนฺติโมยํ สมุสฺสโย;
ชาติมรณสํสาโร, นตฺถิ ทานิ ปุนพฺภโว’’ติฯ
… วฑฺโฒ เถโร…ฯ
6. นทีกสฺสปตฺเถรคาถา
[340]
‘‘อตฺถาย วต เม พุทฺโธ, นทิํ เนรญฺชรํ อคา;
ยสฺสาหํ ธมฺมํ สุตฺวาน, มิจฺฉาทิฏฺฐิํ วิวชฺชยิํฯ
[341]
‘‘ยชิํ อุจฺจาวเจ ยญฺเญ, อคฺคิหุตฺตํ ชุหิํ อหํ;
‘เอสา สุทฺธี’ติ มญฺญนฺโต, อนฺธภูโต [อนฺธีภูโต (ก.)] ปุถุชฺชโนฯ
[342]
‘‘ทิฏฺฐิคหนปกฺขนฺโท [ปกฺขนฺโต (สี.), ปกฺขนฺโน (สฺยา. ปี.)], ปรามาเสน โมหิโต;
อสุทฺธิํ มญฺญิสํ สุทฺธิํ, อนฺธภูโต อวิทฺทสุฯ
[343]
‘‘มิจฺฉาทิฏฺฐิ ปหีนา เม, ภวา สพฺเพ ปทาลิตา [วิทาลิตา (ก.)];
ชุหามิ ทกฺขิเณยฺยคฺคิํ, นมสฺสามิ ตถาคตํฯ
[344]
‘‘โมหา สพฺเพ ปหีนา เม, ภวตณฺหา ปทาลิตา;
วิกฺขีโณ ชาติสํสาโร, นตฺถิ ทานิ ปุนพฺภโว’’ติฯ
… นทีกสฺสโป เถโร…ฯ
7. คยากสฺสปตฺเถรคาถา
[345]
‘‘ปาโต มชฺฌนฺหิกํ สายํ, ติกฺขตฺตุํ ทิวสสฺสหํ;
โอตริํ อุทกํ โสหํ, คยาย คยผคฺคุยาฯ
[346]
‘‘‘ยํ มยา ปกตํ ปาปํ, ปุพฺเพ อญฺญาสุ ชาติสุ;
ตํ ทานีธ ปวาเหมิ’, เอวํทิฏฺฐิ ปุเร อหุํฯ
[347]
‘‘สุตฺวา สุภาสิตํ วาจํ, ธมฺมตฺถสหิตํ ปทํ;
ตถํ ยาถาวกํ อตฺถํ, โยนิโส ปจฺจเวกฺขิสํ;
[348]
‘‘นินฺหาตสพฺพปาโปมฺหิ, นิมฺมโล ปยโต สุจิ;
สุทฺโธ สุทฺธสฺส ทายาโท, ปุตฺโต พุทฺธสฺส โอรโสฯ
[349]
‘‘โอคยฺหฏฺฐงฺคิกํ โสตํ, สพฺพปาปํ ปวาหยิํ;
ติสฺโส วิชฺชา อชฺฌคมิํ, กตํ พุทฺธสฺส สาสน’’นฺติฯ
… คยากสฺสโป เถโร…ฯ
8. วกฺกลิตฺเถรคาถา
[350]
‘‘วาตโรคาภินีโต ตฺวํ, วิหรํ กานเน วเน;
ปวิฏฺฐโคจเร ลูเข, กถํ ภิกฺขุ กริสฺสสิฯ
[351]
‘‘ปีติสุเขน วิปุเลน, ผรมาโน สมุสฺสยํ;
ลูขมฺปิ อภิสมฺโภนฺโต, วิหริสฺสามิ กานเนฯ
[352]
‘‘ภาเวนฺโต สติปฏฺฐาเน, อินฺทฺริยานิ พลานิ จ;
โพชฺฌงฺคานิ จ ภาเวนฺโต, วิหริสฺสามิ กานเนฯ
[353]
‘‘อารทฺธวีริเย ปหิตตฺเต, นิจฺจํ ทฬฺหปรกฺกเม [อารทฺธวีริโย ปหิตตฺโต, นิจฺจํ ทฬฺหปรกฺกโม (สี.)];
สมคฺเค สหิเต ทิสฺวา, วิหริสฺสามิ กานเนฯ
[354]
‘‘อนุสฺสรนฺโต สมฺพุทฺธํ, อคฺคํ ทนฺตํ สมาหิตํ;
อตนฺทิโต รตฺตินฺทิวํ, วิหริสฺสามิ กานเน’’ติฯ
… วกฺกลิตฺเถโร…ฯ