‘‘วิปฺโผฏิโต คณฺฑมูโล, ตณฺหาชาโล สมูหโต;

โส ขีณสํสาโร น จตฺถิ กิญฺจนํ,

จนฺโท ยถา โทสินา ปุณฺณมาสิย’’นฺติฯ

… ธมฺมิโก เถโร…ฯ

11. สปฺปกตฺเถรคาถา

[307]

‘‘ยทา พลากา สุจิปณฺฑรจฺฉทา, กาฬสฺส เมฆสฺส ภเยน ตชฺชิตา;

ปเลหิติ อาลยมาลเยสินี, ตทา นที อชกรณี รเมติ มํฯ

[308]

‘‘ยทา พลากา สุวิสุทฺธปณฺฑรา, กาฬสฺส เมฆสฺส ภเยน ตชฺชิตา;

ปริเยสติ เลณมเลณทสฺสินี, ตทา นที อชกรณี รเมติ มํฯ

[309]

‘‘กํ นุ ตตฺถ น รเมนฺติ, ชมฺพุโย อุภโต ตหิํ;

โสเภนฺติ อาปคากูลํ, มม เลณสฺส [มหาเลณสฺส (สฺยา. ก.)] ปจฺฉโตฯ

[310]

‘‘ตา มตมทสงฺฆสุปฺปหีนา,

เภกา มนฺทวตี ปนาทยนฺติ;

‘นาชฺช คิรินทีหิ วิปฺปวาสสมโย,

เขมา อชกรณี สิวา สุรมฺมา’’’ติฯ

… สปฺปโก เถโร…ฯ

12. มุทิตตฺเถรคาถา

[311]

‘‘ปพฺพชิํ ชีวิกตฺโถหํ, ลทฺธาน อุปสมฺปทํ;

ตโต สทฺธํ ปฏิลภิํ, ทฬฺหวีริโย ปรกฺกมิํฯ

[312]

‘‘กามํ ภิชฺชตุยํ กาโย, มํสเปสี วิสียรุํ [วิสิยนฺตุ (ก.)];

อุโภ ชณฺณุกสนฺธีหิ, ชงฺฆาโย ปปตนฺตุ เมฯ

[313]

‘‘นาสิสฺสํ น ปิวิสฺสามิ, วิหารา จ น นิกฺขเม;

นปิ ปสฺสํ นิปาเตสฺสํ, ตณฺหาสลฺเล อนูหเตฯ

[314]

‘‘ตสฺส เมวํ วิหรโต, ปสฺส วีริยปรกฺกมํ;

ติสฺโส วิชฺชา อนุปฺปตฺตา, กตํ พุทฺธสฺส สาสน’’นฺติฯ

… มุทิโต เถโร…ฯ

จตุกฺกนิปาโต นิฏฺฐิโตฯ

ตตฺรุทฺทานํ –

นาคสมาโล ภคุ จ, สภิโย นนฺทโกปิ จ;

ชมฺพุโก เสนโก เถโร, สมฺภูโต ราหุโลปิ จฯ

ภวติ จนฺทโน เถโร, ทเสเต [อิทานิ นเวว เถรา ทิสฺสนฺติ] พุทฺธสาวกา;

ธมฺมิโก สปฺปโก เถโร, มุทิโต จาปิ เต ตโย;

คาถาโย ทฺเว จ ปญฺญาส, เถรา สพฺเพปิ เตรสาติ [อิทานิ ทฺวาทเสว เถรา ทิสฺสนฺติ]ฯ

5. ปญฺจกนิปาโต