3. วนวจฺฉตฺเถรคาถา
[13]
‘‘นีลพฺภวณฺณา รุจิรา, สีตวารี สุจินฺธรา;
อินฺทโคปกสญฺฉนฺนา, เต เสลา รมยนฺติ ม’’นฺติฯ
… วนวจฺโฉ เถโร…ฯ
4. สิวกสามเณรคาถา
[14]
‘‘อุปชฺฌาโย มํ อวจ, อิโต คจฺฉาม สีวก;
คาเม เม วสติ กาโย, อรญฺญํ เม คโต มโน;
เสมานโกปิ คจฺฉามิ, นตฺถิ สงฺโค วิชานต’’นฺติฯ
… สิวโก สามเณโร…ฯ
5. กุณฺฑธานตฺเถรคาถา
[15]
‘‘ปญฺจ ฉินฺเท ปญฺจ ชเห, ปญฺจ จุตฺตริ ภาวเย;
ปญฺจสงฺคาติโค ภิกฺขุ, โอฆติณฺโณติ วุจฺจตี’’ติฯ
… กุณฺฑธาโน เถโร…ฯ
6. เพลฏฺฐสีสตฺเถรคาถา
[16]
‘‘ยถาปิ ภทฺโท อาชญฺโญ, นงฺคลาวตฺตนี สิขี;
คจฺฉติ อปฺปกสิเรน, เอวํ รตฺตินฺทิวา มม;
คจฺฉนฺติ อปฺปกสิเรน, สุเข ลทฺเธ นิรามิเส’’ติฯ
… เพลฏฺฐสีโส เถโร…ฯ
7. ทาสกตฺเถรคาถา
[17]
‘‘มิทฺธี ยทา โหติ มหคฺฆโส จ, นิทฺทายิตา สมฺปริวตฺตสายี;
มหาวราโหว นิวาปปุฏฺโฐ, ปุนปฺปุนํ คพฺภมุเปติ มนฺโท’’ติฯ
… ทาสโก เถโร…ฯ
8. สิงฺคาลปิตุตฺเถรคาถา
[18]
‘‘อหุ พุทฺธสฺส ทายาโท, ภิกฺขุ เภสกฬาวเน;
เกวลํ อฏฺฐิสญฺญาย, อผรี ปถวิํ [ปฐวิํ (สี. สฺยา.)] อิมํ;
มญฺเญหํ กามราคํ โส, ขิปฺปเมว ปหิสฺสตี’’ติ [ปหียภิ (สพฺพตฺถ ปาฬิยํ)]ฯ
… สิงฺคาลปิตา [สีคาลปิตา (สี.)] เถโร…ฯ
9. กุลตฺเถรคาถา
[19]
[ธ. ป. 80, 145 ธมฺมปเทปิ] ‘‘อุทกํ หิ นยนฺติ เนตฺติกา, อุสุการา นมยนฺติ [ทมยนฺติ (ก.)] เตชนํ;
ทารุํ นมยนฺติ ตจฺฉกา, อตฺตานํ ทมยนฺติ สุพฺพตา’’ติฯ
… กุโล [กุณฺฑโล (สี.), กุโฬ (สฺยา. ก.)] เถโร…ฯ
10. อชิตตฺเถรคาถา
[20]
‘‘มรเณ เม ภยํ นตฺถิ, นิกนฺติ นตฺถิ ชีวิเต;
สนฺเทหํ นิกฺขิปิสฺสามิ, สมฺปชาโน ปฏิสฺสโต’’ติ [ปติสฺสโตติ (สี. สฺยา.)];;
… อชิโต เถโร …ฯ
วคฺโค ทุติโย นิฏฺฐิโตฯ
ตสฺสุทฺทานํ –
จูฬวจฺโฉ มหาวจฺโฉ, วนวจฺโฉ จ สีวโก;
กุณฺฑธาโน จ เพลฏฺฐิ, ทาสโก จ ตโตปริ;
สิงฺคาลปิติโก เถโร, กุโล จ อชิโต ทสาติฯ
3. ตติยวคฺโค
1. นิคฺโรธตฺเถรคาถา
[21]
‘‘นาหํ ภยสฺส ภายามิ, สตฺถา โน อมตสฺส โกวิโท;
ยตฺถ ภยํ นาวติฏฺฐติ, เตน มคฺเคน วชนฺติ ภิกฺขโว’’ติฯ
… นิคฺโรโธ เถโร…ฯ