3. วนวจฺฉตฺเถรคาถา

[13]

‘‘นีลพฺภวณฺณา รุจิรา, สีตวารี สุจินฺธรา;

อินฺทโคปกสญฺฉนฺนา, เต เสลา รมยนฺติ ม’’นฺติฯ

… วนวจฺโฉ เถโร…ฯ

4. สิวกสามเณรคาถา

[14]

‘‘อุปชฺฌาโย มํ อวจ, อิโต คจฺฉาม สีวก;

คาเม เม วสติ กาโย, อรญฺญํ เม คโต มโน;

เสมานโกปิ คจฺฉามิ, นตฺถิ สงฺโค วิชานต’’นฺติฯ

… สิวโก สามเณโร…ฯ

5. กุณฺฑธานตฺเถรคาถา

[15]

‘‘ปญฺจ ฉินฺเท ปญฺจ ชเห, ปญฺจ จุตฺตริ ภาวเย;

ปญฺจสงฺคาติโค ภิกฺขุ, โอฆติณฺโณติ วุจฺจตี’’ติฯ

… กุณฺฑธาโน เถโร…ฯ

6. เพลฏฺฐสีสตฺเถรคาถา

[16]

‘‘ยถาปิ ภทฺโท อาชญฺโญ, นงฺคลาวตฺตนี สิขี;

คจฺฉติ อปฺปกสิเรน, เอวํ รตฺตินฺทิวา มม;

คจฺฉนฺติ อปฺปกสิเรน, สุเข ลทฺเธ นิรามิเส’’ติฯ

… เพลฏฺฐสีโส เถโร…ฯ

7. ทาสกตฺเถรคาถา

[17]

‘‘มิทฺธี ยทา โหติ มหคฺฆโส จ, นิทฺทายิตา สมฺปริวตฺตสายี;

มหาวราโหว นิวาปปุฏฺโฐ, ปุนปฺปุนํ คพฺภมุเปติ มนฺโท’’ติฯ

… ทาสโก เถโร…ฯ