‘‘สพฺเพ กามา ปหีนา เม, ภวา สพฺเพ ปทาลิตา [วิทาลิตา (สี. ปี. อฏฺฐ.)];

วิกฺขีโณ ชาติสํสาโร, นตฺถิ ทานิ ปุนพฺภโว’’ติฯ

… อุตฺตรปาโล เถโร…ฯ

13. อภิภูตตฺเถรคาถา

[255]

‘‘สุณาถ ญาตโย สพฺเพ, ยาวนฺเตตฺถ สมาคตา;

ธมฺมํ โว เทสยิสฺสามิ, ทุกฺขา ชาติ ปุนปฺปุนํฯ

[256]

[สํ. นิ. 1.185] ‘‘อารมฺภถ [อารภถ (สี. สฺยา.), อารพฺภถ (ก.)] นิกฺกมถ, ยุญฺชถ พุทฺธสาสเน;

ธุนาถ มจฺจุโน เสนํ, นฬาคารํว กุญฺชโรฯ

[257]

‘‘โย อิมสฺมิํ ธมฺมวินเย, อปฺปมตฺโต วิหสฺสติ [วิเหสฺสติ (สฺยา. ปี.)];

ปหาย ชาติสํสารํ, ทุกฺขสฺสนฺตํ กริสฺสตี’’ติฯ

… อภิภูโต เถโร…ฯ

14. โคตมตฺเถรคาถา

[258]

‘‘สํสรํ หิ นิรยํ อคจฺฉิสฺสํ, เปตโลกมคมํ ปุนปฺปุนํ;

ทุกฺขมมฺหิปิ ติรจฺฉานโยนิยํ, เนกธา หิ วุสิตํ จิรํ มยาฯ

[259]

‘‘มานุโสปิ จ ภโวภิราธิโต, สคฺคกายมคมํ สกิํ สกิํ;

รูปธาตุสุ อรูปธาตุสุ, เนวสญฺญิสุ อสญฺญิสุฏฺฐิตํฯ

[260]

‘‘สมฺภวา สุวิทิตา อสารกา, สงฺขตา ปจลิตา สเทริตา;

ตํ วิทิตฺวา มหมตฺตสมฺภวํ, สนฺติเมว สติมา สมชฺฌค’’นฺติฯ

… โคตโม เถโร…ฯ

15. หาริตตฺเถรคาถา

[261]

‘‘โย ปุพฺเพ กรณียานิ, ปจฺฉา โส กาตุมิจฺฉติ;

สุขา โส ธํสเต ฐานา, ปจฺฉา จ มนุตปฺปติฯ

[262]

‘‘ยญฺหิ กยิรา ตญฺหิ วเท, ยํ น กยิรา น ตํ วเท;

อกโรนฺตํ ภาสมานํ, ปริชานนฺติ ปณฺฑิตาฯ

[263]

‘‘สุสุขํ วต นิพฺพานํ, สมฺมาสมฺพุทฺธเทสิตํ;

อโสกํ วิรชํ เขมํ, ยตฺถ ทุกฺขํ นิรุชฺฌตี’’ติฯ

… หาริโต เถโร…ฯ

16. วิมลตฺเถรคาถา

[264]

‘‘ปาปมิตฺเต วิวชฺเชตฺวา, ภเชยฺยุตฺตมปุคฺคลํ;

โอวาเท จสฺส ติฏฺเฐยฺย, ปตฺเถนฺโต อจลํ สุขํฯ

[265]

‘‘ปริตฺตํ ทารุมารุยฺห, ยถา สีเท มหณฺณเว;

เอวํ กุสีตมาคมฺม, สาธุชีวีปิ สีทติ;

ตสฺมา ตํ ปริวชฺเชยฺย, กุสีตํ หีนวีริยํฯ

[266]

‘‘ปวิวิตฺเตหิ อริเยหิ, ปหิตตฺเตหิ ฌายิภิ;

นิจฺจํ อารทฺธวีริเยหิ, ปณฺฑิเตหิ สหาวเส’’ติฯ

… วิมโล เถโร…ฯ

ติกนิปาโต นิฏฺฐิโตฯ

ตตฺรุทฺทานํ –

องฺคณิโก ภารทฺวาโช, ปจฺจโย พากุโล อิสิ;

ธนิโย มาตงฺคปุตฺโต, โสภิโต วารโณ อิสิฯ

วสฺสิโก จ ยโสโช จ, สาฏิมตฺติยุปาลิ จ;

อุตฺตรปาโล อภิภูโต, โคตโม หาริโตปิ จฯ

เถโร ติกนิปาตมฺหิ, นิพฺพาเน วิมโล กโต;

อฏฺฐตาลีส คาถาโย, เถรา โสฬส กิตฺติตาติฯ

4. จตุกนิปาโต