1. องฺคณิกภารทฺวาชตฺเถรคาถา

[219]

‘‘อโยนิ สุทฺธิมนฺเวสํ, อคฺคิํ ปริจริํ วเน;

สุทฺธิมคฺคํ อชานนฺโต, อกาสิํ อมรํ ตปํ [อกาสิํ อปรํ ตปํ (สฺยา.), อกาสิํ อมตํ ตปํ (ก.)]ฯ

[220]

‘‘ตํ สุเขน สุขํ ลทฺธํ, ปสฺส ธมฺมสุธมฺมตํ;

ติสฺโส วิชฺชา อนุปฺปตฺตา, กตํ พุทฺธสฺส สาสนํฯ

[221]

‘‘พฺรหฺมพนฺธุ ปุเร อาสิํ, อิทานิ โขมฺหิ พฺราหฺมโณ;

เตวิชฺโช นฺหาตโก [นหาตโก (สี. อฏฺฐ.)] จมฺหิ, โสตฺติโย จมฺหิ เวทคู’’ติฯ

… องฺคณิกภารทฺวาโช เถโร…ฯ

2. ปจฺจยตฺเถรคาถา

[222]

‘‘ปญฺจาหาหํ ปพฺพชิโต, เสโข อปฺปตฺตมานโส,

วิหารํ เม ปวิฏฺฐสฺส, เจตโส ปณิธี อหุฯ

[223]

‘‘นาสิสฺสํ น ปิวิสฺสามิ, วิหารโต น นิกฺขเม;

นปิ ปสฺสํ นิปาเตสฺสํ, ตณฺหาสลฺเล อนูหเตฯ

[224]

‘‘ตสฺส เมวํ วิหรโต, ปสฺส วีริยปรกฺกมํ;

ติสฺโส วิชฺชา อนุปฺปตฺตา, กตํ พุทฺธสฺส สาสน’’นฺติฯ

… ปจฺจโย เถโร…ฯ

3. พากุลตฺเถรคาถา

[225]

‘‘โย ปุพฺเพ กรณียานิ, ปจฺฉา โส กาตุมิจฺฉติ;

สุขา โส ธํสเต ฐานา, ปจฺฉา จ มนุตปฺปติฯ

[226]

‘‘ยญฺหิ กยิรา ตญฺหิ วเท, ยํ น กยิรา น ตํ วเท;

อกโรนฺตํ ภาสมานํ, ปริชานนฺติ ปณฺฑิตาฯ

[227]

‘‘สุสุขํ วต นิพฺพานํ, สมฺมาสมฺพุทฺธเทสิตํ;

อโสกํ วิรชํ เขมํ, ยตฺถ ทุกฺขํ นิรุชฺฌตี’’ติฯ

… พากุโล [พากฺกุโล (สี.)] เถโร…ฯ

4. ธนิยตฺเถรคาถา

[228]

‘‘สุขํ เจ ชีวิตุํ อิจฺเฉ, สามญฺญสฺมิํ อเปกฺขวา;

สงฺฆิกํ นาติมญฺเญยฺย, จีวรํ ปานโภชนํฯ

[229]

‘‘สุขํ เจ ชีวิตุํ อิจฺเฉ, สามญฺญสฺมิํ อเปกฺขวา;

อหิ มูสิกโสพฺภํว, เสเวถ สยนาสนํฯ

[230]

‘‘สุขํ เจ ชีวิตุํ อิจฺเฉ, สามญฺญสฺมิํ อเปกฺขวา;

อิตรีตเรน ตุสฺเสยฺย, เอกธมฺมญฺจ ภาวเย’’ติฯ

… ธนิโย เถโร…ฯ

5. มาตงฺคปุตฺตตฺเถรคาถา

[231]

‘‘อติสีตํ อติอุณฺหํ, อติสายมิทํ อหุ;

อิติ วิสฺสฏฺฐกมฺมนฺเต, ขณา อจฺเจนฺติ มาณเวฯ

[232]

‘‘โย จ สีตญฺจ อุณฺหญฺจ, ติณา ภิยฺโย น มญฺญติ;

กรํ ปุริสกิจฺจานิ, โส สุขา น วิหายติฯ

[233]

‘‘ทพฺพํ กุสํ โปฏกิลํ, อุสีรํ มุญฺชปพฺพชํ;

อุรสา ปนุทิสฺสามิ, วิเวกมนุพฺรูหย’’นฺติฯ

… มาตงฺคปุตฺโต เถโร…ฯ

6. ขุชฺชโสภิตตฺเถรคาถา

[234]

‘‘เย จิตฺตกถี พหุสฺสุตา, สมณา ปาฏลิปุตฺตวาสิโน;

เตสญฺญตโรยมายุวา, ทฺวาเร ติฏฺฐติ ขุชฺชโสภิโตฯ

[235]