กุมารกสฺสโป เถโร, ธมฺมปาโล จ พฺรหฺมาลิ;

โมฆราชา วิสาโข จ, จูฬโก จ อนูปโม;

วชฺชิโต สนฺธิโต เถโร, กิเลสรชวาหโนติฯ

ทุกนิปาโต นิฏฺฐิโตฯ

ตตฺรุทฺทานํ –

คาถาทุกนิปาตมฺหิ, นวุติ เจว อฏฺฐ จ;

เถรา เอกูนปญฺญาสํ, ภาสิตา นยโกวิทาติฯ

3. ติกนิปาโต

1. องฺคณิกภารทฺวาชตฺเถรคาถา

[219]

‘‘อโยนิ สุทฺธิมนฺเวสํ, อคฺคิํ ปริจริํ วเน;

สุทฺธิมคฺคํ อชานนฺโต, อกาสิํ อมรํ ตปํ [อกาสิํ อปรํ ตปํ (สฺยา.), อกาสิํ อมตํ ตปํ (ก.)]ฯ

[220]

‘‘ตํ สุเขน สุขํ ลทฺธํ, ปสฺส ธมฺมสุธมฺมตํ;

ติสฺโส วิชฺชา อนุปฺปตฺตา, กตํ พุทฺธสฺส สาสนํฯ

[221]

‘‘พฺรหฺมพนฺธุ ปุเร อาสิํ, อิทานิ โขมฺหิ พฺราหฺมโณ;

เตวิชฺโช นฺหาตโก [นหาตโก (สี. อฏฺฐ.)] จมฺหิ, โสตฺติโย จมฺหิ เวทคู’’ติฯ

… องฺคณิกภารทฺวาโช เถโร…ฯ

2. ปจฺจยตฺเถรคาถา

[222]

‘‘ปญฺจาหาหํ ปพฺพชิโต, เสโข อปฺปตฺตมานโส,

วิหารํ เม ปวิฏฺฐสฺส, เจตโส ปณิธี อหุฯ

[223]

‘‘นาสิสฺสํ น ปิวิสฺสามิ, วิหารโต น นิกฺขเม;

นปิ ปสฺสํ นิปาเตสฺสํ, ตณฺหาสลฺเล อนูหเตฯ

[224]

‘‘ตสฺส เมวํ วิหรโต, ปสฺส วีริยปรกฺกมํ;

ติสฺโส วิชฺชา อนุปฺปตฺตา, กตํ พุทฺธสฺส สาสน’’นฺติฯ

… ปจฺจโย เถโร…ฯ

3. พากุลตฺเถรคาถา

[225]

‘‘โย ปุพฺเพ กรณียานิ, ปจฺฉา โส กาตุมิจฺฉติ;

สุขา โส ธํสเต ฐานา, ปจฺฉา จ มนุตปฺปติฯ

[226]

‘‘ยญฺหิ กยิรา ตญฺหิ วเท, ยํ น กยิรา น ตํ วเท;

อกโรนฺตํ ภาสมานํ, ปริชานนฺติ ปณฺฑิตาฯ

[227]