[ธ. ป. 94 ธมฺมปเทปิ] ‘‘มยฺหินฺทฺริยานิ สมถงฺคตานิ, อสฺสา ยถา สารถินา สุทนฺตา;
ปหีนมานสฺส อนาสวสฺส, เทวาปิ มยฺหํ ปิหยนฺติ ตาทิโน’’ติฯ
… พฺรหฺมาลิ เถโร…ฯ
4. โมฆราชตฺเถรคาถา
[207]
‘‘ฉวิปาปก จิตฺตภทฺทก, โมฆราช สตตํ สมาหิโต;
เหมนฺติกสีตกาลรตฺติโย [เหมนฺติกกาลรตฺติโย (ก.)], ภิกฺขุ ตฺวํสิ กถํ กริสฺสสิ’’ฯ
[208]
‘‘สมฺปนฺนสสฺสา มคธา, เกวลา อิติ เม สุตํ;
ปลาลจฺฉนฺนโก เสยฺยํ, ยถญฺเญ สุขชีวิโน’’ติฯ
… โมฆราชา เถโร…ฯ
5. วิสาขปญฺจาลปุตฺตตฺเถรคาถา
[209]
‘‘น อุกฺขิเป โน จ ปริกฺขิเป ปเร, โอกฺขิเป ปารคตํ น เอรเย;
น จตฺตวณฺณํ ปริสาสุ พฺยาหเร, อนุทฺธโต สมฺมิตภาณิ สุพฺพโตฯ
[210]
‘‘สุสุขุมนิปุณตฺถทสฺสินา, มติกุสเลน นิวาตวุตฺตินา;
สํเสวิตวุทฺธสีลินา, นิพฺพานํ น หิ เตน ทุลฺลภ’’นฺติฯ
… วิสาโข ปญฺจาลปุตฺโต เถโร …ฯ
6. จูฬกตฺเถรคาถา
[211]
‘‘นทนฺติ โมรา สุสิขา สุเปขุณา, สุนีลคีวา สุมุขา สุคชฺชิโน;
สุสทฺทลา จาปิ มหามหี อยํ, สุพฺยาปิตมฺพุ สุวลาหกํ นภํฯ
[212]
‘‘สุกลฺลรูโป สุมนสฺส ฌายตํ [ฌายิตํ (สฺยา. ก.)], สุนิกฺกโม สาธุ สุพุทฺธสาสเน;
สุสุกฺกสุกฺกํ นิปุณํ สุทุทฺทสํ, ผุสาหิ ตํ อุตฺตมมจฺจุตํ ปท’’นฺติฯ
… จูฬโก [จูลโก (สี. อฏฺฐ.)] เถโร…ฯ
7. อนูปมตฺเถรคาถา
[213]
‘‘นนฺทมานาคตํ จิตฺตํ, สูลมาโรปมานกํ;
เตน เตเนว วชสิ, เยน สูลํ กลิงฺครํฯ
[214]
‘‘ตาหํ จิตฺตกลิํ พฺรูมิ, ตํ พฺรูมิ จิตฺตทุพฺภกํ;
สตฺถา เต ทุลฺลโภ ลทฺโธ, มานตฺเถ มํ นิโยชยี’’ติฯ
… อนูปโม เถโร…ฯ
8. วชฺชิตตฺเถรคาถา
[215]
‘‘สํสรํ ทีฆมทฺธานํ, คตีสุ ปริวตฺติสํ;
อปสฺสํ อริยสจฺจานิ, อนฺธภูโต [อนฺธีภูโต (ก.)] ปุถุชฺชโนฯ
[216]
‘‘ตสฺส เม อปฺปมตฺตสฺส, สํสารา วินฬีกตา;
สพฺพา คตี สมุจฺฉินฺนา, นตฺถิ ทานิ ปุนพฺภโว’’ติฯ
… วชฺชิโต เถโร…ฯ
9. สนฺธิตตฺเถรคาถา
[217]
‘‘อสฺสตฺเถ หริโตภาเส, สํวิรูฬฺหมฺหิ ปาทเป;
เอกํ พุทฺธคตํ สญฺญํ, อลภิตฺถํ [อลภิํ หํ (ก.)] ปติสฺสโตฯ
[218]
‘‘เอกติํเส อิโต กปฺเป, ยํ สญฺญมลภิํ ตทา;
ตสฺสา สญฺญาย วาหสา, ปตฺโต เม อาสวกฺขโย’’ติฯ
… สนฺธิโต เถโร…ฯ
วคฺโค ปญฺจโม นิฏฺฐิโตฯ
ตสฺสุทฺทานํ –