มิคสิโร สิวโก จ, อุปวาโน จ ปณฺฑิโต;

อิสิทินฺโน จ กจฺจาโน, นิตโก จ มหาวสี;

โปฏิริยปุตฺโต นิสโภ, อุสโภ กปฺปฏกุโรติฯ

5. ปญฺจมวคฺโค

1. กุมารกสฺสปตฺเถรคาถา

[201]

‘‘อโห พุทฺธา อโห ธมฺมา, อโห โน สตฺถุ สมฺปทา;

ยตฺถ เอตาทิสํ ธมฺมํ, สาวโก สจฺฉิกาหิ’’ติฯ

[202]

‘‘อสงฺเขยฺเยสุ กปฺเปสุ, สกฺกายาธิคตา อหู;

เตสมยํ ปจฺฉิมโก, จริโมยํ สมุสฺสโย;

ชาติมรณสํสาโร, นตฺถิ ทานิ ปุนพฺภโว’’ติฯ

… กุมารกสฺสโป เถโร…ฯ

2. ธมฺมปาลตฺเถรคาถา

[203]

‘‘โย หเว ทหโร ภิกฺขุ, ยุญฺชติ พุทฺธสาสเน;

ชาคโร ส หิ สุตฺเตสุ [ปติสุตฺเตสุ (สี. ก.)], อโมฆํ ตสฺส ชีวิตํฯ

[204]

‘‘ตสฺมา สทฺธญฺจ สีลญฺจ, ปสาทํ ธมฺมทสฺสนํ;

อนุยุญฺเชถ เมธาวี, สรํ พุทฺธาน สาสน’’นฺติฯ

… ธมฺมปาโล เถโร…ฯ

3. พฺรหฺมาลิตฺเถรคาถา

[205]

‘‘กสฺสินฺทฺริยานิ สมถงฺคตานิ, อสฺสา ยถา สารถินา สุทนฺตา;

ปหีนมานสฺส อนาสวสฺส, เทวาปิ กสฺส [ตสฺส (พหูสุ)] ปิหยนฺติ ตาทิโน’’ติฯ

[206]

[ธ. ป. 94 ธมฺมปเทปิ] ‘‘มยฺหินฺทฺริยานิ สมถงฺคตานิ, อสฺสา ยถา สารถินา สุทนฺตา;

ปหีนมานสฺส อนาสวสฺส, เทวาปิ มยฺหํ ปิหยนฺติ ตาทิโน’’ติฯ

… พฺรหฺมาลิ เถโร…ฯ

4. โมฆราชตฺเถรคาถา

[207]

‘‘ฉวิปาปก จิตฺตภทฺทก, โมฆราช สตตํ สมาหิโต;

เหมนฺติกสีตกาลรตฺติโย [เหมนฺติกกาลรตฺติโย (ก.)], ภิกฺขุ ตฺวํสิ กถํ กริสฺสสิ’’ฯ

[208]

‘‘สมฺปนฺนสสฺสา มคธา, เกวลา อิติ เม สุตํ;

ปลาลจฺฉนฺนโก เสยฺยํ, ยถญฺเญ สุขชีวิโน’’ติฯ

… โมฆราชา เถโร…ฯ

5. วิสาขปญฺจาลปุตฺตตฺเถรคาถา

[209]

‘‘น อุกฺขิเป โน จ ปริกฺขิเป ปเร, โอกฺขิเป ปารคตํ น เอรเย;

น จตฺตวณฺณํ ปริสาสุ พฺยาหเร, อนุทฺธโต สมฺมิตภาณิ สุพฺพโตฯ

[210]

‘‘สุสุขุมนิปุณตฺถทสฺสินา, มติกุสเลน นิวาตวุตฺตินา;

สํเสวิตวุทฺธสีลินา, นิพฺพานํ น หิ เตน ทุลฺลภ’’นฺติฯ

… วิสาโข ปญฺจาลปุตฺโต เถโร …ฯ

6. จูฬกตฺเถรคาถา

[211]

‘‘นทนฺติ โมรา สุสิขา สุเปขุณา, สุนีลคีวา สุมุขา สุคชฺชิโน;

สุสทฺทลา จาปิ มหามหี อยํ, สุพฺยาปิตมฺพุ สุวลาหกํ นภํฯ

[212]