1. อุตฺตรตฺเถรคาถา
[161]
‘‘ขนฺธา มยา ปริญฺญาตา, ตณฺหา เม สุสมูหตา;
ภาวิตา มม โพชฺฌงฺคา, ปตฺโต เม อาสวกฺขโยฯ
[162]
‘‘โสหํ ขนฺเธ ปริญฺญาย, อพฺพหิตฺวาน [อพฺพุหิตฺวาน (ก.)] ชาลินิํ;
ภาวยิตฺวาน โพชฺฌงฺเค, นิพฺพายิสฺสํ อนาสโว’’ติฯ
… อุตฺตโร เถโร…ฯ
2. ภทฺทชิตฺเถรคาถา
[163]
‘‘ปนาโท นาม โส ราชา, ยสฺส ยูโป สุวณฺณโย;
ติริยํ โสฬสุพฺเพโธ [โสฬสปพฺเพโธ (สี. อฏฺฐ.), โสฬสพฺพาโณ (?)], อุพฺภมาหุ [อุทฺธมาหุ (สี.), อุจฺจมาหุ (สฺยา.)] สหสฺสธาฯ
[164]
‘‘สหสฺสกณฺโฑ สตเคณฺฑุ, ธชาลุ หริตามโย;
อนจฺจุํ ตตฺถ คนฺธพฺพา, ฉสหสฺสานิ สตฺตธา’’ติฯ
… ภทฺทชิตฺเถโร…ฯ
3. โสภิตตฺเถรคาถา
[165]
‘‘สติมา ปญฺญวา ภิกฺขุ, อารทฺธพลวีริโย;
ปญฺจ กปฺปสตานาหํ, เอกรตฺติํ อนุสฺสริํฯ
[166]
‘‘จตฺตาโร สติปฏฺฐาเน, สตฺต อฏฺฐ จ ภาวยํ;
ปญฺจ กปฺปสตานาหํ, เอกรตฺติํ อนุสฺสริ’’นฺติฯ
… โสภิโต เถโร…ฯ
4. วลฺลิยตฺเถรคาถา
[167]
‘‘ยํ กิจฺจํ ทฬฺหวีริเยน, ยํ กิจฺจํ โพทฺธุมิจฺฉตา;
กริสฺสํ นาวรชฺฌิสฺสํ [นาวรุชฺฌิสฺสํ (ก. สี. ก.)], ปสฺส วีริยํ ปรกฺกมฯ
[168]
‘‘ตฺวญฺจ เม มคฺคมกฺขาหิ, อญฺชสํ อมโตคธํ;
อหํ โมเนน โมนิสฺสํ, คงฺคาโสโตว สาคร’’นฺติฯ
… วลฺลิโย เถโร…ฯ
5. วีตโสกตฺเถรคาถา
[169]
‘‘เกเส เม โอลิขิสฺสนฺติ, กปฺปโก อุปสงฺกมิ;
ตโต อาทาสมาทาย, สรีรํ ปจฺจเวกฺขิสํฯ
[170]
‘‘ตุจฺโฉ กาโย อทิสฺสิตฺถ, อนฺธกาโร ตโม พฺยคา;
สพฺเพ โจฬา สมุจฺฉินฺนา, นตฺถิ ทานิ ปุนพฺภโว’’ติฯ
… วีตโสโก เถโร…ฯ
6. ปุณฺณมาสตฺเถรคาถา
[171]
‘‘ปญฺจ นีวรเณ หิตฺวา, โยคกฺเขมสฺส ปตฺติยา;
ธมฺมาทาสํ คเหตฺวาน, ญาณทสฺสนมตฺตโนฯ
[172]
‘‘ปจฺจเวกฺขิํ อิมํ กายํ, สพฺพํ สนฺตรพาหิรํ;
อชฺฌตฺตญฺจ พหิทฺธา จ, ตุจฺโฉ กาโย อทิสฺสถา’’ติฯ
… ปุณฺณมาโส เถโร…ฯ
7. นนฺทกตฺเถรคาถา
[173]
‘‘ยถาปิ ภทฺโท อาชญฺโญ, ขลิตฺวา ปติติฏฺฐติ;
ภิยฺโย ลทฺทาน สํเวคํ, อทีโน วหเต ธุรํฯ
[174]
‘‘เอวํ ทสฺสนสมฺปนฺนํ, สมฺมาสมฺพุทฺธสาวกํ;
อาชานียํ มํ ธาเรถ, ปุตฺตํ พุทฺธสฺส โอรส’’นฺติฯ
… นนฺทโก เถโร…ฯ
8. ภรตตฺเถรคาถา
[175]
‘‘เอหิ นนฺทก คจฺฉาม, อุปชฺฌายสฺส สนฺติกํ;
สีหนาทํ นทิสฺสาม, พุทฺธเสฏฺฐสฺส สมฺมุขาฯ
[176]
‘‘ยาย โน อนุกมฺปาย, อมฺเห ปพฺพาชยี มุนิ;
โส โน อตฺโถ อนุปฺปตฺโต, สพฺพสํโยชนกฺขโย’’ติฯ
… ภรโต เถโร…ฯ