4. คงฺคาตีริยตฺเถรคาถา
[127]
‘‘ติณฺณํ เม ตาลปตฺตานํ, คงฺคาตีเร กุฏี กตา;
ฉวสิตฺโตว เม ปตฺโต, ปํสุกูลญฺจ จีวรํฯ
[128]
‘‘ทฺวินฺนํ อนฺตรวสฺสานํ, เอกา วาจา เม ภาสิตา;
ตติเย อนฺตรวสฺสมฺหิ, ตโมขนฺโธ [ตโมกฺขนฺโธ (สี. สฺยา.)] ปทาลิโต’’ติฯ
… คงฺคาตีริโย เถโร…ฯ
5. อชินตฺเถรคาถา
[129]
‘‘อปิ เจ โหติ เตวิชฺโช, มจฺจุหายี อนาสโว;
อปฺปญฺญาโตติ นํ พาลา, อวชานนฺติ อชานตาฯ
[130]
‘‘โย จ โข อนฺนปานสฺส, ลาภี โหตีธ ปุคฺคโล;
ปาปธมฺโมปิ เจ โหติ, โส เนสํ โหติ สกฺกโต’’ติฯ
… อชิโน เถโร…ฯ
6. เมฬชินตฺเถรคาถา
[131]
‘‘ยทาหํ ธมฺมมสฺโสสิํ, ภาสมานสฺส สตฺถุโน;
น กงฺขมภิชานามิ, สพฺพญฺญูอปราชิเตฯ
[132]
‘‘สตฺถวาเห มหาวีเร, สารถีนํ วรุตฺตเม;
มคฺเค ปฏิปทายํ วา, กงฺขา มยฺหํ น วิชฺชตี’’ติฯ
… เมฬชิโน เถโร…ฯ
7. ราธตฺเถรคาถา
[133]
[ธ. ป. 13 ธมฺมปเท] ‘‘ยถา อคารํ ทุจฺฉนฺนํ, วุฏฺฐี สมติวิชฺฌติ;
เอวํ อภาวิตํ จิตฺตํ, ราโค สมติวิชฺฌติฯ
[134]
[ธ. ป. 14 ธมฺมปเท] ‘‘ยถา อคารํ สุจฺฉนฺนํ, วุฑฺฒี น สมติวิชฺฌติ;
เอวํ สุภาวิตํ จิตฺตํ, ราโค น สมติวิชฺฌตี’’ติฯ
… ราโธ เถโร…ฯ
8. สุราธตฺเถรคาถา
[135]
‘‘ขีณา หิ มยฺหํ ชาติ, วุสิตํ ชินสาสนํ;
ปหีโน ชาลสงฺขาโต, ภวเนตฺติ สมูหตาฯ
[136]
‘‘ยสฺสตฺถาย ปพฺพชิโต, อคารสฺมานคาริยํ;
โส เม อตฺโถ อนุปฺปตฺโต, สพฺพสํโยชนกฺขโย’’ติฯ
… สุราโธ เถโร…ฯ
9. โคตมตฺเถรคาถา
[137]
‘‘สุขํ สุปนฺติ มุนโย, เย อิตฺถีสุ น พชฺฌเร;
สทา เว รกฺขิตพฺพาสุ, ยาสุ สจฺจํ สุทุลฺลภํฯ
[138]
‘‘วธํ จริมฺห เต กาม, อนณา ทานิ เต มยํ;
คจฺฉาม ทานิ นิพฺพานํ, ยตฺถ คนฺตฺวา น โสจตี’’ติฯ
… โคตโม เถโร…ฯ
10. วสภตฺเถรคาถา
[139]
‘‘ปุพฺเพ หนติ อตฺตานํ, ปจฺฉา หนติ โส ปเร;
สุหตํ หนฺติ อตฺตานํ, วีตํเสเนว ปกฺขิมาฯ
[140]
‘‘น พฺราหฺมโณ พหิวณฺโณ, อนฺโต วณฺโณ หิ พฺราหฺมโณ;
ยสฺมิํ ปาปานิ กมฺมานิ, ส เว กณฺโห สุชมฺปตี’’ติฯ
… วสโภ เถโร…ฯ
วคฺโค ปฐโม นิฏฺฐิโตฯ
ตสฺสุทฺทานํ –
อุตฺตโร เจว ปิณฺโฑโล, วลฺลิโย ตีริโย อิสิ;
อชิโน จ เมฬชิโน, ราโธ สุราโธ โคตโม;
วสเภน อิเม โหนฺติ, ทส เถรา มหิทฺธิกาติฯ
2. ทุติยวคฺโค